ആഇശയുടെ മരണം: അന്വേഷണം ഡിവൈഎസ്പി ഏറ്റെടുത്തു, വനിതാ പഞ്ചായത്ത് പ്രസിഡണ്ടിനെയടക്കം ചോദ്യം ചെയ്യുമെന്ന് ഡിവൈഎസ്പി

ബദിയടുക്ക: (www.kasargodvartha.com 13/12/2016) ബദിയടുക്ക ഏത്തടുക്കയിലെ അംഗണ്‍വാടി അധ്യാപികയായ ആഇശ (30) വിഷം കഴിച്ചു മരിച്ച സംഭവത്തില്‍ അന്വേഷണം ഡിവൈഎസ്പി ഏറ്റെടുത്തു. വിശദമായ അന്വേഷണം നടത്തി ആഇശയുടെ മരണത്തിലെ ദുരൂഹത അകറ്റണമെന്ന പ്രതിഷേധം ശക്തമായതോടെയാണ് അന്വേഷണം ഡിവൈഎസ്പി ഏറ്റെടുത്തത്.

അതേസമയം മരണത്തില്‍ വിശദമായ അന്വേഷണം നടത്തണമെന്നാവശ്യപ്പെട്ട് നാട്ടുകാര്‍ ആക്ഷന്‍ കമ്മിറ്റി രൂപീകരിക്കാനൊരുങ്ങിയിരിക്കുകയാണ്. നവംബര്‍ 23നാണ് ആഇശയെ വിഷം കഴിച്ച നിലയില്‍ കണ്ടെത്തിയത്. ഉടന്‍ ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല. സംഭവത്തില്‍ ബദിയടുക്ക പോലീസ് അന്വേഷണം നടത്തി പലരെയും ചോദ്യ ചെയ്തിരുന്നു. ആയിശയുടെ മൊബൈല്‍ ഫോണ്‍ വിവരങ്ങള്‍ ശേഖരിച്ചും അന്വേഷണം നടത്തിയിരുന്നു.

മരണത്തിന് ഉത്തരവാദിയാണെന്ന് ആരോപിക്കപ്പെട്ട വനിതാ പഞ്ചായത്ത് പ്രസിഡണ്ടിനെയടക്കം ചോദ്യം ചെയ്യുമെന്ന് അന്വേഷണം ഏറ്റെടുത്ത ഡിവൈഎസ്പി എം.വി സുകുമാരന്‍ കാസര്‍കോട് വാര്‍ത്തയോട് പറഞ്ഞു.