Safety | കാസർകോട്ട് ദേശീയപാത നിർമാണത്തിന്റെ ഭാഗമായി കുന്നിടിച്ച പ്രദേശങ്ങളിൽ ദുരന്തസാധ്യതയോ? വിദഗ്ധ പഠനം വരുന്നു; പാഠമായി ഷിരൂർ

കാസർകോട്:  (KasaragodVartha) ജില്ലയുടെ ദേശീയപാത വികസന പദ്ധതിയുടെ ഭാഗമായി കുന്നിടിച്ച പ്രദേശങ്ങളിൽ ദുരന്തസാധ്യത പരിശോധിക്കാൻ സംസ്ഥാന ദുരന്തനിവാരണ അതോറിറ്റിയിലെ വിദഗ്ധരുടെ സേവനം ആവശ്യപ്പെട്ടതായി ജില്ലാ കലക്ടർ കെ ഇമ്പശേഖർ അറിയിച്ചു. കലക്ടറേറ്റ് കോൺഫറൻസ് ഹാളിൽ നടന്ന ജില്ലാതല വികസന സമിതി യോഗത്തിൽ സംസാരിച്ച കലക്ടർ, വിദഗ്ധർ നടത്തിയ പരിശോധനയുടെ റിപ്പോർട്ട് ദേശീയപാത അതോറിറ്റിക്ക് കൈമാറുമെന്നും പറഞ്ഞു.

കർണാടകയിലെ ഷിരൂരിൽ ഉണ്ടായ ദുരന്തത്തിന്റെ പശ്ചാത്തലത്തിൽ ഈ നടപടി പ്രാധാന്യമർഹിക്കുന്നു. ഷിരൂരിൽ സംഭവിച്ച ദുരന്തത്തിൽ ദേശീയപാത നിർമാണ രീതിയിലെ ഗുരുതര പോരായ്മകൾ ചൂണ്ടിക്കാട്ടി ശക്തമായ വിമർശനങ്ങൾ ഉയർന്നിരുന്നു. ഷിരൂർ മുതൽ അഞ്ച് കിലോമീറ്ററോളം ദൂരത്തേക്ക് ദേശീയപാത 66-ന്റെ നിർമാണം ശാസ്ത്രീയമായ രീതിയിൽ നടന്നില്ലെന്നും, മണ്ണിടിച്ചിൽ സംഭവിച്ച പ്രദേശങ്ങളിൽ അശാസ്ത്രീയമായ രീതിയിൽ റോഡ് നിർമാണം നടത്തിയതാണെന്നും ആരോപണമുണ്ട്

കാസർകോട് ജില്ലയിൽ വീരമകലക്കുന്നിൽ അടക്കമുള്ള സ്ഥലങ്ങളിൽ മണ്ണിടിച്ചിൽ ഭീഷണിയുണ്ട്. ഇത് റോഡ് വികസനത്തിനും, ജനങ്ങളുടെ സുരക്ഷയ്ക്കും വലിയ വെല്ലുവിളിയാണ്. റോഡ് നിർമാണ പ്രവർത്തനങ്ങൾക്കും, അടിസ്ഥാന സൗകര്യങ്ങൾ മെച്ചപ്പെടുത്തുന്നതിനും കൂടുതൽ കാര്യക്ഷമമായ നടപടികൾ കൈക്കൊള്ളണമെന്നും ശാസ്ത്രീയ മാർഗനിർദേശങ്ങൾ സ്വീകരിക്കണമെന്നും ആളുകൾ ആവശ്യപ്പെടുന്നു. 

ഈ സാഹചര്യത്തിൽ ജില്ലയിൽ ദേശീയപാത വികസനത്തിന്റെ ഭാഗമായി കുന്നിടിച്ച പ്രദേശങ്ങളിൽ ദുരന്തസാധ്യത തടയുന്നതിന് പ്രത്യേക പഠനം നടത്തുന്നത് വലിയ പ്രതീക്ഷയോടെയാണ് ജനം ഉറ്റുനോക്കുന്നത്.