Hazard | കാസർകോട്ട് ദേശീയപാതയിലെങ്ങും മരണക്കുഴികൾ; ജനങ്ങൾ ദുരിതത്തിൽ

കുമ്പള: (KasargodVartha) ആരിക്കാടി, കുമ്പള, മൊഗ്രാൽ, മൊഗ്രാൽ പുത്തൂർ പോലുള്ള പ്രദേശങ്ങളിലെ ദേശീയപാത സർവീസ് റോഡുകളിൽ പരന്നു കിടക്കുന്ന മരണക്കുഴികൾ ജനങ്ങളെ ദുരിതത്തിലാക്കുന്നു. മഴക്കാലത്ത് ഈ കുഴികൾ കൂടുതൽ ആഴത്തിലാകുകയും വലിയൊരു അപകട ഭീഷണിയായി മാറുകയും ചെയ്യുന്നു.

ഇരുചക്രവാഹനയാത്രികർ ഇത്തരം കുഴികളിൽ വീഴുന്നത് പതിവാണെന്ന് നാട്ടുകാർ പരാതിപ്പെടുന്നു. ഈ പ്രശ്‌നം നിരവധി തവണ അധികൃതരുടെ ശ്രദ്ധയിൽപ്പെടുത്തിയിട്ടുണ്ടെങ്കിലും, താൽക്കാലിക പരിഹാരമായി കുഴികളിൽ ജെല്ലിപ്പൊടി നിറയ്ക്കുന്നത് മാത്രമാണ് ഇവർ ചെയ്യുന്നത്. എന്നാൽ ഇത് വളരെ ചുരുങ്ങിയ സമയത്തേക്ക് മാത്രമേ പ്രയോജനപ്പെടൂ.

കുഴികളിൽ വെള്ളം നിറയുന്നതുമൂലം അവയുടെ ആഴം മനസ്സിലാക്കാൻ ബുദ്ധിമുട്ടാണ്. ഇത് അപകട സാധ്യത വർദ്ധിപ്പിക്കുന്നു. അടിപ്പാതകളും കലുങ്കുകളും ഉള്ള ഭാഗങ്ങളിലാണ് ഈ പ്രശ്‌നം കൂടുതലായി അനുഭവപ്പെടുന്നത്. വാഹനങ്ങൾ കടന്നുപോകുമ്പോൾ ഉണ്ടാകുന്ന ചെളിവെള്ളം കാൽനടയാത്രികരുടെ ദേഹത്തേക്ക് പതിക്കുന്നതും മറ്റൊരു പ്രശ്‌നമാണ്.

ഈ പ്രശ്‌നങ്ങൾക്ക് സ്ഥിരമായ പരിഹാരം കാണണമെന്ന് ആവശ്യപ്പെട്ട് നാട്ടുകാർ നിരവധി തവണ അധികൃതരെ സമീപിച്ചിട്ടുണ്ട്. എന്നാൽ, മഴക്കാലമായതിനാൽ ഇതിനായി ഒന്നും ചെയ്യാൻ കഴിയില്ലെന്നാണ് അധികൃതരുടെ മറുപടി. എന്നാൽ, ജനങ്ങളുടെ ജീവനും സുരക്ഷയ്ക്കും ഭീഷണിയായ ഈ പ്രശ്‌നത്തെ അധികൃതർ ഗൗരവമായി കണക്കാക്കണം എന്നാണ് നാട്ടുകാരുടെ ആവശ്യം.