Criticism | സ്വാതന്ത്ര്യ ചരിത്രം വളച്ചൊടിക്കരുത്: ഡോ. എം.എം ശ്രീധരൻ

പള്ളിക്കര: (KasargodVartha) ഭാരതത്തിന്റെ സ്വാതന്ത്ര്യ ചരിത്രം വളച്ചൊടിക്കാനുള്ള ശ്രമങ്ങൾക്കെതിരെ മുതിർന്ന എഴുത്തുകാരനും സാംസ്കാരിക നായകനുമായ ഡോ. എം.എം ശ്രീധരൻ രംഗത്തെത്തി. പള്ളിക്കര മണ്ഡലം കോൺഗ്രസ് കമ്മിറ്റി സംഘടിപ്പിച്ച ദേശസ്നേഹ സദസ്സിൽ സംസാരിക്കവെയായിരുന്നു അദ്ദേഹത്തിന്റെ പ്രതികരണം.

‘ഭരണ വർഗ്ഗത്തിന് ഭാരതത്തിന്റെ സ്വാതന്ത്ര്യ ചരിത്രം തിരുത്താൻ അധികാരമില്ല. ജനാധിപത്യ രാഷ്ട്രത്തിൽ ചരിത്രം തിരുത്തുന്നത് ഗുരുതരമായ കുറ്റകൃത്യമാണ്,’ ഡോ. ശ്രീധരൻ പറഞ്ഞു. സ്വാതന്ത്ര്യ സമര സേനാനികളുടെയും സമരത്തിന്റെയും മഹത്വം വരും തലമുറകൾക്ക് കൈമാറുന്നതിൽ യാതൊരു തരത്തിലുള്ള വളച്ചൊടിച്ചലും അനുവദിക്കില്ലെന്നും അദ്ദേഹം പ്രഖ്യാപിച്ചു. ഈ സന്ദർഭത്തിൽ, സ്വാതന്ത്ര്യ സമര ചരിത്രത്തെ സംരക്ഷിക്കുന്നതിനും വളർത്തിയെടുക്കുന്നതിനും എല്ലാ ജനാധിപത്യ പ്രസ്ഥാനങ്ങളും ഒന്നിച്ചു പ്രവർത്തിക്കണമെന്നും അദ്ദേഹം ആവശ്യപ്പെട്ടു.

ചടങ്ങിൽ മണ്ഡലം പ്രസിഡന്റ് രവീന്ദ്രൻ കരിച്ചേരി അധ്യക്ഷത വഹിച്ചു. സാജിദ് മൗവൽ മുഖ്യപ്രഭാഷണം നടത്തി. വിവർത്തനത്തിനുള്ള കേരള സാഹിത്യ അക്കാദമി അവാർഡ് ജേതാവായ ഡോ. എം.എം ശ്രീധരന് പള്ളിക്കര മണ്ഡലം കോൺഗ്രസ് കമ്മിറ്റിയുടെ ഉപഹാരം കെ.പി.സി.സി അംഗം ഹക്കിം കുന്നിൽ നൽകി.
സത്യൻ പൂച്ചക്കാട്, ദിവാകരൻ കരിച്ചേരി, സി.എച്ച് രാഘവൻ, എം.പി.എം ഷാഫി, രാജേഷ് പള്ളിക്കര, ചന്ദ്രൻ തച്ചങ്ങാട്, വസന്തൻ പടുപ്പ്, വി. ബാലകൃഷ്ണൻ നായർ, ലത പനയാൽ, ജയശ്രീ മാധവൻ, ട്രസീന കരുവാക്കോട്, സുജിത്ത് തച്ചങ്ങാട്, യശോദ നാരായണൻ, അഖിലേഷ് തച്ചങ്ങാട് കാവ്യപള്ളിക്കര, കണ്ണൻ കരുവാക്കോട് എന്നിവർ സംസാരിച്ചു. സ്വാഗതം മഹേഷ് തച്ചങ്ങാടും നന്ദി ദാമോദരൻ വള്ളിയലുങ്കാലും പറഞ്ഞു.