ഭരണവിരുദ്ധ വികാരം: നിലമ്പൂരിൽ യുഡിഎഫ് മുന്നേറ്റം തുടരുമെന്ന് സാദിഖലി തങ്ങൾ

മലപ്പുറം: (KasargodVartha) നിലമ്പൂർ ഉപതിരഞ്ഞെടുപ്പിന്റെ ആദ്യ ഫലസൂചനകൾ പുറത്തുവന്നപ്പോൾ മുസ്ലിം ലീഗ് സംസ്ഥാന അധ്യക്ഷൻ പാണക്കാട് സാദിഖലി തങ്ങൾ ആത്മവിശ്വാസം പ്രകടിപ്പിച്ച് രംഗത്തെത്തി. ആദ്യം വോട്ടെണ്ണിയ വഴിക്കടവിൽ യുഡിഎഫ് മികച്ച പ്രകടനം കാഴ്ചവെച്ചെന്നും മറ്റ് പഞ്ചായത്തുകളിലും സമാനമായ മുന്നേറ്റം പ്രതീക്ഷിക്കുന്നതായും അദ്ദേഹം അഭിപ്രായപ്പെട്ടു. സർക്കാരിനെതിരായ വികാരം വോട്ടെടുപ്പിൽ പ്രതിഫലിക്കുന്നുണ്ടെന്നും എല്ലാ പഞ്ചായത്തുകളിലും യുഡിഎഫ് മുന്നേറ്റമുണ്ടാക്കുമെന്നും സാദിഖലി തങ്ങൾ വ്യക്തമാക്കി.

ഐക്യജനാധിപത്യ മുന്നണി നിലമ്പൂരിലെ തിരഞ്ഞെടുപ്പ് പ്രചാരണത്തിൽ രാഷ്ട്രീയം മാത്രമാണ് സംസാരിച്ചതെന്നും, മറ്റുള്ളവർ പലതും പറഞ്ഞെങ്കിലും അതൊന്നും മണ്ഡലത്തിൽ ഏശിയിട്ടില്ലെന്ന് തിരഞ്ഞെടുപ്പ് ഫലം തെളിയിക്കുമെന്നും സാദിഖലി തങ്ങൾ കൂട്ടിച്ചേർത്തു. യുഡിഎഫ് വളരെ കെട്ടുറപ്പോടെയും മുമ്പെങ്ങുമില്ലാത്ത വിധത്തിലുള്ള ഐക്യത്തോടെയുമാണ് മണ്ഡലത്തിലുടനീളം പ്രചാരണം നടത്തിയതെന്നും ഇതിന്റെ നല്ല പ്രതിഫലനം മണ്ഡലത്തിൽ കാണാമെന്നും മുസ്ലിം ലീഗ് സംസ്ഥാന അധ്യക്ഷൻ ഊന്നിപ്പറഞ്ഞു. യാത്രയുള്ളതുകൊണ്ടാണ് സാദിഖലി തങ്ങൾ നേരത്തെ പ്രതികരിക്കുന്നതെന്ന് പി.കെ. കുഞ്ഞാലിക്കുട്ടി വിശദീകരിച്ചു. നിലമ്പൂരിൽ വിജയം ഉറപ്പാണെന്നും കൂടുതൽ കണക്കുകൾ പുറത്തുവന്നതിന് ശേഷം ബാക്കി കാര്യങ്ങൾ പറയാമെന്നും കുഞ്ഞാലിക്കുട്ടി അറിയിച്ചു.

അതേസമയം, നിലമ്പൂരിൽ ആദ്യ രണ്ട് പഞ്ചായത്തുകളിലെ വോട്ടെണ്ണൽ പൂർത്തിയായപ്പോൾ യുഡിഎഫിന് പ്രതീക്ഷിച്ചത്ര വലിയ മുന്നേറ്റം നേടാനായില്ലെന്ന വിലയിരുത്തലുകളുമുണ്ട്. വഴിക്കടവ്, മൂത്തേടം പഞ്ചായത്തുകളിലെ വോട്ടുകളാണ് ആദ്യ മണിക്കൂറിൽ എണ്ണിത്തീർന്നത്. യുഡിഎഫിന് കൃത്യമായ സ്വാധീനമുള്ള ഇടങ്ങളിൽ പോലും സ്ഥാനാർത്ഥി ആര്യാടൻ ഷൗക്കത്തിന് പ്രതീക്ഷിച്ച വോട്ടുകൾ ലഭിച്ചിട്ടില്ല. ആദ്യമെണ്ണിയ വഴിക്കടവ് പഞ്ചായത്തിലെ 46 ബൂത്തുകളിൽ നിന്ന് യുഡിഎഫിന് 11659 വോട്ടുകളും, എൽഡിഎഫിന് 10040 വോട്ടുകളും, പി.വി. അൻവറിന് 4312 വോട്ടുകളുമാണ് ലഭിച്ചത്. ബിജെപി 1507 വോട്ടുകൾ നേടി. പി.വി. അൻവർ പ്രതീക്ഷിച്ചതിലും കൂടുതൽ മുന്നേറ്റമുണ്ടാക്കിയപ്പോൾ, വഴിക്കടവിൽ യുഡിഎഫ് വോട്ടുകളാണ് അൻവർ പിടിച്ചതെന്നാണ് വിലയിരുത്തൽ.

യുഡിഎഫ് ഏറ്റവും പ്രതീക്ഷ വെച്ചിരുന്ന മൂത്തേടം പഞ്ചായത്തിൽ 2021-ൽ 2331 വോട്ടിന്റെ ലീഡ് നേടിയിരുന്നു. ലീഗിന് വ്യക്തമായ സ്വാധീനമുള്ള മൂത്തേടത്ത് യുഡിഎഫ് വോട്ടുകൾ ചോർന്നിട്ടില്ലെന്ന് കണക്കുകൾ സൂചിപ്പിക്കുന്നു. വഴിക്കടവിലെ പോലെ ലീഗ് വോട്ടുകൾ മൂത്തേടത്ത് ചോർന്നിട്ടില്ല. ഇത്തവണ 2500 കടക്കുമെന്ന് പ്രതീക്ഷിച്ചിടത്ത് 3700-ൽ അധികം ലീഡ് നേടാൻ യുഡിഎഫിന് കഴിഞ്ഞു എന്നത് ശ്രദ്ധേയമാണ്.

നിലമ്പൂരിലെ ആര്യാടൻ ഷൗക്കത്തിന്റെ ലീഡ് നിലയെക്കുറിച്ച് എന്തു പറയുന്നു? പി.വി. അൻവറിന്റെ വോട്ടുകൾ തിരഞ്ഞെടുപ്പിനെ എങ്ങനെ സ്വാധീനിച്ചു? അഭിപ്രായങ്ങള്‍ രേഖപ്പെടുത്തൂ.

Article Summary: UDF expresses confidence in Nilambur by-election despite PV Anwar impacting early leads.

#NilamburElection, #KeralaPolitics, #ElectionResults, #UDF, #LDF, #PVAnwar