കാസർകോട് പാക്കേജിന് 80 കോടി; അതിവേഗ റെയിൽപ്പാതയും വ്യവസായ പാർക്കും ബജറ്റിൽ

കാസർകോട്: (KasargodVartha) ജില്ലയുടെ സമഗ്ര വികസനത്തിന് വേഗം കൂട്ടുന്ന പ്രഖ്യാപനങ്ങളുമായി രണ്ടാം പിണറായി സർക്കാരിന്റെ അവസാന ബജറ്റ്. കാസർകോട് വികസന പാക്കേജിനായി 80 കോടി രൂപയാണ് ബജറ്റിൽ അനുവദിച്ചിരിക്കുന്നത്. അഞ്ചുകോടി രൂപയുടെ അധിക വിഹിതം ഉൾപ്പെടെയാണിത്. പിന്നോക്കം നിൽക്കുന്ന മേഖലകളെ മുൻനിരയിലേക്ക് എത്തിക്കുന്നതിനായി റോഡ് വികസനം, അടിസ്ഥാന സൗകര്യ വികസനം, നഗര–ഗ്രാമ മേഖലകളിലെ പൊതുസൗകര്യങ്ങൾ മെച്ചപ്പെടുത്തൽ തുടങ്ങി വിവിധ പദ്ധതികൾ ഈ പാക്കേജിലൂടെ നടപ്പിലാക്കും.

ജില്ലയുടെ ദീർഘകാലമായുള്ള റെയിൽവേ അവഗണനയ്ക്ക് പരിഹാരമാകുന്ന രീതിയിലാണ് പുതിയ അതിവേഗ റെയിൽപ്പാതയുടെ പ്രഖ്യാപനം. തിരുവനന്തപുരം മുതൽ കാസർകോട് വരെ 583 കിലോമീറ്റർ ദൈർഘ്യമുള്ള പാതയുടെ നാലാം ഘട്ടത്തിലാണ് കണ്ണൂർ–കാസർകോട് ലൈൻ ഉൾപ്പെടുത്തിയിരിക്കുന്നത്. 2033-ൽ പൂർത്തിയാക്കാൻ ലക്ഷ്യമിടുന്ന ഈ പദ്ധതി യാഥാർഥ്യമാകുന്നതോടെ കേരളത്തിലെ പ്രധാന റെയിൽ ശൃംഖലാ കേന്ദ്രമായി കാസർകോട് മാറും. ഭാവിയിൽ മംഗളൂരിലേക്ക് പാത നീട്ടാനുള്ള സാധ്യതകളും സർക്കാർ മുന്നോട്ടുവെക്കുന്നുണ്ട്.

വ്യവസായ മേഖലയിലും ജില്ലയ്ക്ക് വലിയ പരിഗണനയാണ് ബജറ്റ് നൽകിയിരിക്കുന്നത്. കാസർകോട് വ്യവസായ പാർക്കിന്റെ അടിസ്ഥാന സൗകര്യ വികസനത്തിന് രണ്ടരക്കോടി രൂപ വകയിരുത്തി. അനന്തപുരത്ത് 212 ഏക്കറിൽ വ്യാപിച്ചുകിടക്കുന്ന പാർക്കിൽ ചുറ്റുമതിൽ, അഴുക്കുചാൽ സംവിധാനം എന്നിവ ഇതിലൂടെ മെച്ചപ്പെടുത്തും. മടിക്കൈയിൽ 82 ഏക്കറിൽ രണ്ടാമത്തെ വ്യവസായ പാർക്കിന്റെ നിർമാണവും പുരോഗമിക്കുകയാണ്. മികച്ച ഗതാഗത സൗകര്യങ്ങളും മനുഷ്യവിഭവശേഷിയും പ്രയോജനപ്പെടുത്തി വ്യവസായ ഭൂപടത്തിൽ ജില്ല നിർണായക സ്ഥാനമുറപ്പിക്കുകയാണ്.

കാഞ്ഞങ്ങാട് നഗരത്തിലെ ഗതാഗതക്കുരുക്കിന് ശാശ്വത പരിഹാരമായി പഴയ ബസ് സ്റ്റാൻഡ് പരിസരത്ത് മേൽനടപ്പാലം (സ്കൈവാക്ക്) നിർമ്മിക്കാൻ രണ്ടുകോടി രൂപ അനുവദിച്ചു. കാഞ്ഞങ്ങാട് ടൗൺഹാളിന് രണ്ട് കോടി രൂപയും നീലേശ്വരം ടൗൺഹാളിന് അഞ്ച് കോടി രൂപയും ബജറ്റിൽ വകയിരുത്തിയിട്ടുണ്ട്. ടൂറിസം മേഖലയ്ക്ക് പുത്തൻ ഉണർവേകാൻ കോട്ടപ്പുറം ഹൗസ് ബോട്ട് ടെർമിനൽ മുതൽ കവ്വായി കായലിലൂടെ തയ്യൽ സൗത്ത് വരെ സർവീസ് നടത്തുന്നതിന് കറ്റമറൈൻ ബോട്ട് വാങ്ങാൻ ഒരു കോടി രൂപയും അനുവദിച്ചു. ഐഎച്ച്‌ആർഡി കോളേജുകൾക്കും കാസർകോട് മെഡിക്കൽ കോളേജ് ഉൾപ്പെടെയുള്ള സ്ഥാപനങ്ങളുടെ വികസനത്തിനും ബജറ്റിൽ പ്രത്യേക ഊന്നൽ നൽകിയിട്ടുണ്ട്.

കാസർകോട് വാർത്തയുടെ വാട്സ്ആപ്പ് ചാനൽ ഫോളോ ചെയ്യുക. പുതിയ അപ്‌ഡേറ്റുകൾ ഉടൻ ലഭിക്കാൻ ഞങ്ങളുടെ ഫേസ്ബുക്ക് പേജ് ഫോളോ ചെയ്യുക. ഈ വാർത്ത സുഹൃത്തുകൾക്കും വാട്സ്ആപ്പ് ഗ്രൂപ്പുകളിലും ഷെയർ ചെയ്യൂ. അഭിപ്രായം കമന്റായി രേഖപ്പെടുത്താൻ മറക്കരുത്.

Article Summary: Kerala Budget 2026 allocates ₹80 crore for the Kasaragod development package and includes the district in the final phase of the Thiruvananthapuram-Kasaragod high-speed rail project. 

#Kasaragod #KeralaBudget #Development #HighSpeedRail #IndustrialPark #Infrastructure