Healthcare | 70 വയസിന് മുകളിലുള്ള എല്ലാവർക്കും അടക്കം 5 ലക്ഷം രൂപയുടെ സൗജന്യ ചികിത്സാ സഹായം; സർക്കാർ പദ്ധതിയുടെ പുതിയ മാറ്റങ്ങൾ; അറിയേണ്ടതെല്ലാം

ന്യൂഡൽഹി: (KasargodVartha) 70 വയസും അതിന് മുകളിലും പ്രായമുള്ള എല്ലാവർക്കും ആയുഷ്മാൻ ഭാരത് പ്രധാനമന്ത്രി ജൻ ആരോഗ്യ യോജന (എബി-പിഎം-ജെഎവൈ) പദ്ധതിപ്രകാരം പ്രതിവർഷം അഞ്ച് ലക്ഷം രൂപയുടെ സൗജന്യ ചികിത്സാ ആനുകൂല്യം ലഭ്യമാക്കാനുള്ള കേന്ദ്രസർക്കാർ തീരുമാനം പൊതുജനാരോഗ്യ രംഗത്ത് വലിയ മാറ്റമുണ്ടാക്കുമെന്ന് പ്രതീക്ഷ. 

വാർധക്യത്തിൽ ആരോഗ്യ പരിചരണത്തിന്റെ ഉയർന്ന ചെലവ് മൂലം മാനസികമായി സമ്മർദത്തിലാകുന്ന നിരവധി ഇന്ത്യക്കാർക്ക് ഈ തീരുമാനം വലിയ ആശ്വാസമാണ്. മരുന്നുകളും ചികിത്സകളും എളുപ്പത്തിൽ ലഭ്യമാക്കുന്നതിലൂടെ ഇവരുടെ ആരോഗ്യം ഉറപ്പാക്കാൻ ഈ പദ്ധതി സഹായിക്കും. മുതിർന്ന പൗരന്മാർക്കുള്ള ആയുഷ്‌മാൻ ഭാരത് പരിരക്ഷയ്ക്കു കുടുംബത്തിന്റെ വരുമാനപരിധി ബാധകമായിരിക്കില്ല.

രാജ്യത്തെ ഏറ്റവും ദരിദ്രരായ 40 ശതമാനം ജനങ്ങളെ ഉൾപ്പെടുത്തി, എല്ലാ അംഗങ്ങൾക്കും വാർഷികം അഞ്ച് ലക്ഷം രൂപ വരെ ചികിത്സാ സഹായം ലഭ്യമാക്കുന്ന ഈ പദ്ധതി ഇനി മുതൽ 70 വയസിന് മുകളിലുള്ള എല്ലാ ഇന്ത്യക്കാർക്കും ലഭ്യമാകും. അതായത്, 4.5 കോടിയിലധികം കുടുംബങ്ങളിലെ 6 കോടിയിലധികം ഇന്ത്യക്കാർക്ക് പുതിയ പദ്ധതി ഗുണം ചെയ്യുമെന്ന് കേന്ദ്രമന്ത്രി അശ്വിനി വൈഷ്‌ണവ് പറഞ്ഞു. അർഹരായ ഗുണഭോക്താക്കൾക്ക് പദ്ധതി പ്രകാരം പുതിയ കാർഡ് നൽകും. 

മറ്റ് പദ്ധതികളുടെ ആനുകൂല്യം ലഭിക്കുന്നവർ 

സെൻട്രൽ ഗവൺമെൻറ് ഹെൽത്ത് സ്കീം (CGHS), എക്സ്-സർവീസ്‌മെൻ കോൺട്രിബ്യൂട്ടറി ഹെൽത്ത് സ്കീം (ECHS), ആയുഷ്മാൻ സെൻട്രൽ ആംഡ് പൊലീസ് ഫോഴ്സ് (CAPF) തുടങ്ങിയ പൊതുജനാരോഗ്യ ഇൻഷുറൻസ് സ്കീമുകളുടെ ആനുകൂല്യങ്ങൾ ഇതിനകം ലഭിക്കുന്നവർക്ക് വേണമെങ്കിൽ  നിലവിലുള്ള പദ്ധതി തുടരാം, അല്ലെങ്കിൽ ആയുഷ്മാൻ പദ്ധതി തിരഞ്ഞെടുക്കാം.

ഒന്നിലധികം മുതിർന്നവരുണ്ടെങ്കിൽ

പദ്ധതി പ്രകാരം, ഒരു കുടുംബത്തിലെ മുതിർന്ന ഒരാൾക്ക് വർഷം 5 ലക്ഷം രൂപ വരെയുള്ള സാമ്പത്തിക സഹായം ലഭിക്കും. കുടുംബത്തിൽ ഒന്നിലധികം മുതിർന്നവരുണ്ടെങ്കിൽ ഈ തുക അവർക്കിടയിൽ വിഭജിക്കും. കുടുംബത്തിലെ മറ്റ് അംഗങ്ങൾക്ക് ഈ സഹായം ലഭ്യമല്ല. ഇതിനു പുറമേ, ആയുഷ്മാൻ ഭാരത് പദ്ധതിയിൽ ഉൾപ്പെട്ട കുടുംബങ്ങളിലെ മുതിർന്നവർക്ക് അധികമായി 5 ലക്ഷം രൂപയുടെ സാമ്പത്തിക സഹായം ലഭിക്കും. ഈ അധിക സഹായം മുതിർന്നവർക്ക് മാത്രമായിരിക്കും.

എന്തുകൊണ്ട് പദ്ധതി പ്രധാനം?

ലോങ്കിറ്റ്യൂഡിനൽ ഏജിംഗ് സ്റ്റഡി ഇൻ ഇന്ത്യ (LASI) പ്രകാരം, 60 വയസ്സിനു മുകളിലുള്ള ജനസംഖ്യ 2011-ൽ 8.6 ശതമാനത്തിൽ നിന്ന് 2050-ഓടെ 19.5 ശതമാനമായി വർദ്ധിക്കുമെന്ന് പ്രതീക്ഷിക്കുന്നു. ഇത് അർത്ഥമാക്കുന്നത് ഈ പ്രായക്കാരുടെ എണ്ണം 2011-ലെ 103 ദശലക്ഷത്തിൽ നിന്ന് 2050-ൽ 319 ദശലക്ഷമായി മൂന്നിരട്ടിയാകുമെന്നാണ്.

ഈ വർദ്ധനവ് ആരോഗ്യ സംവിധാനത്തിന് വലിയ സമ്മർദ്ദം ഉണ്ടാക്കും. കാരണം, വാർദ്ധക്യത്തോടുകൂടി അസുഖങ്ങളും രോഗങ്ങളും സാധാരണമാണ്. ഇന്ത്യ ഏജിംഗ് റിപ്പോർട്ട് പ്രകാരം, 2023-ൽ ഈ പ്രായക്കാരുടെ ആരോഗ്യ പരിരക്ഷ ചെലവ് മൊത്തം ആരോഗ്യ ചെലവിന്റെ ഏകദേശം 20 ശതമാനമാണ്. വരും വർഷങ്ങളിൽ ഈ അനുപാതം വർദ്ധിക്കാൻ സാധ്യതയുണ്ട്. അതിനാൽ പുതിയ പദ്ധതിക്ക് ഗുണങ്ങൾ ഏറെയാണ്.

എന്താണ് ആയുഷ്മാൻ പദ്ധതി?

2018-ൽ കേന്ദ്ര സർക്കാർ ആരംഭിച്ച ആയുഷ്മാൻ ഭാരത് പ്രധാനമന്ത്രി ജന ആരോഗ്യ യോജന, ഇന്ത്യയിലെ ഏറ്റവും വലിയ ആരോഗ്യ ഇൻഷുറൻസ് പദ്ധതിയാണ്. ഈ പദ്ധതിയിലൂടെ, ദേശത്തെ ദരിദ്രരായ വിഭാഗങ്ങളിലുള്ള കോടിക്കണക്കിന് ആളുകൾക്ക് സൗജന്യ ആരോഗ്യ സേവനങ്ങൾ ലഭ്യമാക്കുകയാണ് ലക്ഷ്യം.

ഈ പദ്ധതി പ്രകാരം, ഗുണഭോക്താക്കൾക്ക് ഒരു കാർഡ് നൽകുന്നു. ഈ കാർഡ് ഉപയോഗിച്ച്, കേന്ദ്ര സർക്കാർ എംപാനൽ ചെയ്ത ആശുപത്രികളിൽ ഒരു വർഷം കൊണ്ട് 5 ലക്ഷം രൂപ വരെ ചികിത്സാ ചെലവ് സർക്കാർ വഹിക്കും. ഇതിൽ ആശുപത്രിയിൽ പ്രവേശനം, മരുന്ന്, ശസ്ത്രക്രിയ തുടങ്ങിയവയെല്ലാം ഉൾപ്പെടുന്നു.

നിങ്ങൾക്ക് അർഹതയുണ്ടോ?

നിങ്ങൾക്ക് ഈ പദ്ധതിയിൽ അർഹതയുണ്ടോ എന്ന് പരിശോധിക്കാൻ, ആയുഷ്മാൻ ഭാരത് യോജനയുടെ ഔദ്യോഗിക വെബ്സൈറ്റ് സന്ദർശിക്കുക. ഈ പ്രക്രിയയിലൂടെ നിങ്ങൾക്ക് നിങ്ങളുടെ യോഗ്യത സംബന്ധിച്ച കൃത്യമായ വിവരങ്ങൾ ലഭിക്കും. ഇതിനായി എന്താണ് ചെയ്യേണ്ടത് എന്നറിയാം.

* ആദ്യം, നിങ്ങളുടെ കമ്പ്യൂട്ടർ, ലാപ്‌ടോപ്പ് അല്ലെങ്കിൽ സ്മാർട്ട്‌ഫോൺ ഉപയോഗിച്ച് ആയുഷ്മാൻ ഭാരത് യോജനയുടെ ഔദ്യോഗിക വെബ്‌സൈറ്റ് https://pmjay(dot)gov(dot)in/ സന്ദർശിക്കുക.

* തുടർന്ന് 'Am I Eligible' എന്ന ഒരു ഓപ്ഷൻ കാണും. ഈ ഓപ്ഷനിൽ ക്ലിക്ക് ചെയ്യുക. 

* നിങ്ങളുടെ രജിസ്റ്റർ ചെയ്ത മൊബൈൽ നമ്പർ നൽകുക.

* സ്ക്രീനിൽ കാണിക്കുന്ന ക്യാപ്‌ച കോഡ് (അക്ഷരങ്ങളും സംഖ്യകളും) ശരിയായി ടൈപ്പ് ചെയ്യുക.

* 'Generate OTP' ക്ലിക്ക് ചെയ്യുക. നിങ്ങളുടെ രജിസ്റ്റർ ചെയ്ത മൊബൈൽ നമ്പറിലേക്ക് ഒരു ഒ ടി പി (One Time Password) അയക്കും. ഒ ടി പി നിശ്ചിത സ്ഥലത്ത് നൽകുക. തുടർന്ന് 'Verify OTP' ക്ലിക്ക് ചെയ്യുക.

* നിങ്ങളോട് ചില വിവരങ്ങൾ നൽകാൻ ആവശ്യപ്പെടും. ഈ വിവരങ്ങൾ ശരിയായി നൽകി 'Submit' ക്ലിക്ക് ചെയ്യുക.

ഓൺലൈൻ വഴി അപേക്ഷിക്കാൻ

1. ഔദ്യോഗിക വെബ്സൈറ്റ് https://nhm(dot)gov(dot)in/ സന്ദർശിക്കുക.
2. Click Here എന്ന ഓപ്ഷൻ ക്ലിക് ചെയ്യുക.
3. നിങ്ങളുടെ മുന്നിൽ ഒരു ബോക്സ് തുറക്കും, അതിൽ മൊബൈൽ ഫോൺ നമ്പറും ആധാർ നമ്പറും നൽകുക.
4. Submit ക്ലിക് ചെയ്യുക.
5. ലോഗിൻ ഐഡിയും പാസ്‌വേഡും ലഭിക്കും.
6. തുടർന്ന് ഹോം പേജിലേക്ക് തിരികെ വന്ന് Registration ഓപ്ഷനിൽ ക്ലിക് ചെയ്യുക.
7. ഇതിന് ശേഷം നിങ്ങളുടെ മൊബൈൽ നമ്പറിൽ ഒരു OTP വരും, അത് നൽകുക.
8. തുടർന്ന് Dashboard നിങ്ങളുടെ മുന്നിൽ കാണാം. അതിൽ ക്ലിക് ചെയ്താൽ Menu കാണാം.
9. തുടർന്ന് ഇവിടെയുള്ള Ayushman Card Self Registration ക്ലിക് ചെയ്ത് മുഴുവൻ ഫോമും പൂരിപ്പിക്കുക.
10.ആവശ്യപ്പെട്ട എല്ലാ രേഖകളും സ്കാൻ ചെയ്ത് അപ്‌ലോഡ് ചെയ്യുക. ഇതിനുശേഷം, അതിന്റെ രസീത് നിങ്ങളുടെ പക്കൽ സൂക്ഷിക്കുക.

ഇതുകൂടാതെ, അടുത്തുള്ള പൊതു സേവന കേന്ദ്രം സന്ദർശിച്ചും യോഗ്യത പരിശോധിക്കുകയും രജിസ്‌ട്രേഷൻ നടത്തുകയും നടത്തുകയും ചെയ്യാം.

ആയുഷ്മാൻ ഭാരത് യോജനയുടെ ഗുണങ്ങൾ

ഗുണഭോക്താക്കൾക്ക് പ്രതിവർഷം 5 ലക്ഷം രൂപ വരെ ആരോഗ്യ പരിരക്ഷ: ഈ പദ്ധതിയിൽ ഉൾപ്പെട്ട കുടുംബങ്ങൾക്ക് പ്രതിവർഷം 5 ലക്ഷം രൂപ വരെ ആരോഗ്യ പരിരക്ഷ ലഭിക്കും. ഇതിൽ ആശുപത്രിവാസം, ചികിത്സ, രോഗനിർണയം, മരുന്നുകൾ, ശസ്ത്രക്രിയ, ചികിത്സയ്ക്കു ശേഷമുള്ള പരിചരണം തുടങ്ങിയ ചെലവുകൾ ഉൾപ്പെടുന്നു.

പൊതു-സ്വകാര്യ ആശുപത്രികളിൽ പണരഹിത സേവനങ്ങൾ: ആയുഷ്മാൻ ഭാരത് യോജന പൊതു-സ്വകാര്യ ആശുപത്രികളിലുടനീളം പണരഹിത സേവനങ്ങൾ നൽകുന്നു. ഇത് ഗുണഭോക്താക്കൾക്ക് പോക്കറ്റ് ചെലവുകൾ കുറയ്ക്കാൻ സഹായിക്കുന്നു.

കുടുംബ വലുപ്പം, പ്രായം, ലിംഗഭേദം എന്നിവയിൽ പരിധിയില്ല: മുൻ ആരോഗ്യ പദ്ധതികളിൽ നിന്ന് വ്യത്യസ്തമായി, ആയുഷ്മാൻ ഭാരത് യോജനയിൽ കുടുംബത്തിൻ്റെ വലുപ്പം, പ്രായം, ലിംഗഭേദം എന്നിവയിൽ പരിധിയില്ല.

പ്രീ-ഹോസ്പിറ്റലൈസേഷൻ, പോസ്റ്റ് ഹോസ്പിറ്റലൈസേഷൻ ചെലവുകൾ ഉൾപ്പെടുന്നു: ഈ പദ്ധതി 3 ദിവസത്തെ പ്രീ-ഹോസ്പിറ്റലൈസേഷൻ്റെയും 15 ദിവസത്തെ പോസ്റ്റ് ഹോസ്പിറ്റലൈസേഷൻ്റെയും ഡയഗ്നോസ്റ്റിക്സും മരുന്നുകളും ഉൾപ്പെടെയുള്ള ചെലവുകൾ ഉൾക്കൊള്ളുന്നു.

ഇന്ത്യയിലുടനീളം സേവനങ്ങൾ ലഭ്യം: ഗുണഭോക്താക്കൾക്ക് ഇന്ത്യയിലുടനീളമുള്ള സേവനങ്ങൾ എംപാനൽ ചെയ്ത ഏത് ആശുപത്രിയിലും ലഭിക്കും.

നിലവിലുള്ള എല്ലാ രോഗങ്ങളും ഉൾപ്പെടുന്നു: എൻറോൾമെൻ്റിൻ്റെ ആദ്യ ദിവസം മുതൽ, നിലവിലുള്ള എല്ലാ രോഗങ്ങളും പദ്ധതിയിൽ ഉൾപ്പെടുന്നു.

സാമ്പത്തിക ബാധ്യത കുറയ്ക്കുന്നു: ഗുരുതരമായ രോഗങ്ങളും ആശുപത്രിവാസവും മൂലമുണ്ടാകുന്ന സാമ്പത്തിക ബാധ്യത ലഘൂകരിക്കാനും കുടുംബങ്ങളെ ദാരിദ്ര്യത്തിലേക്ക് തള്ളിവിടുന്നത് തടയാനും ഈ പദ്ധതി സഹായിക്കുന്നു.

വിപുലമായ ചികിത്സാ പരിധി: ഫിസിഷ്യൻ ഫീസ്, റൂം ചാർജുകൾ, ഡയഗ്നോസ്റ്റിക്സ്, ഐസിയു പരിചരണം, മെഡിക്കൽ ഇംപ്ലാൻ്റുകൾ എന്നിവയ്ക്കുള്ള ചെലവുകൾ ഉൾപ്പെടെ ഏകദേശം 1,929 നടപടിക്രമങ്ങൾ ഈ സ്കീം ഉൾക്കൊള്ളുന്നു.

വിപുലമായ കവറേജ്: മെഡിക്കൽ പരിശോധനകൾ, ചികിത്സ, കൂടിയാലോചനകൾ, പ്രീ-ഹോസ്പിറ്റലൈസേഷൻ കെയർ, മരുന്നുകൾ, മെഡിക്കൽ ഉപഭോഗവസ്തുക്കൾ, ഐസിയു കെയർ, ഡയഗ്നോസ്റ്റിക്സ്, മെഡിക്കൽ ഇംപ്ലാൻ്റുകൾ, താമസം, ഭക്ഷണം, ചികിത്സയ്ക്കിടെ ഉണ്ടാകുന്ന സങ്കീർണതകൾ, ഡിസ്ചാർജ് കഴിഞ്ഞ് 15 ദിവസത്തെ തുടർ പരിചരണം തുടങ്ങിയ എല്ലാ ചെലവുകളും ഈ സ്കീം ഉൾക്കൊള്ളുന്നു.