പൗരത്വ നിയമ ഭേദഗതി പ്രതിഷേധത്തിനിടെ മംഗളൂരുവില്‍ കൊല്ലപ്പെട്ടവരുടെ കുടുംബത്തിന് 10 ലക്ഷം രൂപ ധനസഹായം നല്‍കുമെന്ന് കര്‍ണാടക മുഖ്യമന്ത്രി യെദ്യൂരപ്പ

By Desk DeltaDec 22, 2019, 15:07 IST

ബംഗളൂരു: (www.kasaragodvartha.com 21.12.2019) പൗരത്വ നിയമ ഭേദഗതി പ്രതിഷേധത്തിനിടെ മംഗളൂരുവില്‍ പൊലീസ് വെടിവെപ്പില്‍ കൊല്ലപ്പെട്ടവരുടെ കുടുംബത്തിന് 10 ലക്ഷം രൂപ ധനസഹായം നല്‍കുമെന്ന് കര്‍ണാടക മുഖ്യമന്ത്രി യെദ്യൂരപ്പ. മംഗളൂരു അക്രമ സംഭവത്തിന്റെ പേരില്‍ കടുത്ത വിമര്‍ശനമാണ് സംസ്ഥാന സര്‍ക്കാര്‍ നേരിടുന്നത്. ജലീല്‍ കുദ്രോളി, നൗഷീന്‍ എന്നിവര്‍ക്കാണ് ഡിസംബര്‍ 19നു പോലീസ് നടത്തിയ വെടിവെയ്പ്പില്‍ ജീവന്‍ നഷ്ടമായത്.

പൗരത്വ നിയമ ഭേദഗതിക്കെതിരെ വന്‍ പ്രതിഷേധമാണ് രാജ്യത്ത് അലയടിക്കുന്നത്. കര്‍ണാടകയുടെ വിവിധ ഭാഗങ്ങളില്‍ ഇപ്പോഴും പ്രതിഷേധം നടക്കുന്നുണ്ട്. ഈ സാഹചര്യത്തിലാണ് മരണപ്പെട്ടവരുടെ കുടുംബത്തിന് ധനസഹായം പ്രഖ്യാപിച്ചിരിക്കുന്നത്.

ഉത്തര്‍പ്രദേശിലും നിയമത്തിനെതിരെ വലിയ രീതിയിലാണ് പ്രതിഷേധം നടക്കുന്നത്. യുപിയില്‍ മാത്രം ഇതുവരെ 18 ജീവനുകളാണ് പൊലിഞ്ഞത്.