പരീക്ഷാപ്പേടി: 17 കാരന്‍ സ്വയം വെടിവെച്ചു മരിച്ചു

ഉഡുപ്പി: പരീക്ഷാപ്പേടി മൂലം പ്രീ- യൂനിവേര്‍സിറ്റി വിദ്യാര്‍ത്ഥി സ്വയം വെടിവെച്ചുമരിച്ചു. ബ്രഹ്മാവര്‍ കര്‍ജെയിലെ സുരേഷ് ഷെട്ടിയുടെ മകന്‍ ശ്രേയസ് ഷെട്ടി (17) ആണ് വ്യാഴാഴ്ച ആത്മഹത്യ ചെയ്തത്. കുരങ്ങനെ വെടിവെക്കാനാണെന്ന് പറഞ്ഞ് അമ്മയോട് വീട്ടിലെ ലൈസന്‍സുള്ള തോക്കുവാങ്ങി കാട്ടിലേക്ക് പോയ ശ്രേയസ് നെഞ്ചിലേക്ക് നിറയൊഴിക്കുകയായിരുന്നു.

കുട്ടി തിരിച്ചുവരാതിരുന്നതിനെ തുടര്‍ന്നു നടത്തിയ തിരച്ചിലിലാണ് കാട്ടില്‍ മൃതദേഹം കണ്ടത്. വിദ്യോദയ പബ്ലിക് സ്‌കൂളിലെ ഒന്നാംവര്‍ഷ പി.യു.സി വിദ്യാര്‍ത്ഥിയാണ് ശ്രേയസ്. പരീക്ഷ ഭയന്ന് കുട്ടി നേരത്തെ രണ്ടുതവണ വീടുവിട്ടിറങ്ങിയിരുന്നു. കര്‍ജെ ഗ്രാമ പഞ്ചായത്ത് മുന്‍ പ്രസിഡന്റും കര്‍ഷകനുമായ സുരേഷ് ഷെട്ടിയുടേയും വിമലയുടെയും മൂന്ന് മക്കളില്‍ ഇളയവനാണ് ശ്രേയസ്.

ഇവരുടെ പറമ്പില്‍ കാട്ടുമൃഗങ്ങളുടെ ശല്യം അനുഭവപ്പെടുന്നതിനെ തുടര്‍ന്നാണ് വീട്ടില്‍ ലൈസന്‍സ് ഉള്ള തോക്ക് സൂക്ഷിച്ചിരുന്നത്. സംഭവത്തില്‍ ബ്രഹ്മാവര്‍ പോലീസ് കേസെടുത്തു.