തെരുവുനായ്ക്കളെ പൊതു ഇടങ്ങളിൽനിന്ന് നീക്കണം, നിരീക്ഷണത്തിന് പട്രോളിങ് സംഘം വേണം; സുപ്രീം കോടതി

ന്യൂഡെല്‍ഹി: (KasargodVartha) തെരുവുനായ പ്രശ്‌നത്തിൽ സുപ്രധാന ഇടക്കാല ഉത്തരവുമായി സുപ്രീം കോടതി. റോഡുകളിൽ നിന്നും പൊതുയിടങ്ങളിൽ നിന്നും തെരുവുനായ്ക്കളെ നീക്കണമെന്നും നിരീക്ഷണത്തിനായി പട്രോളിങ് സംഘത്തെ നിയോഗിക്കണമെന്നും സുപ്രീം കോടതി നിർദേശം നൽകി.

ദേശീയപാതയടക്കം റോഡുകളിൽ നിന്ന് കന്നുകാലികൾ, നായ്ക്കൾ എന്നിവയടക്കമുള്ള മൃഗങ്ങളെ സുരക്ഷിത കേന്ദ്രങ്ങളിലേക്ക് മാറ്റാനാണ് നിർദേശം. ഇതിന് സംസ്ഥാന സർക്കാരുകളും ദേശീയപാത അതോറിറ്റികളും അടിയന്തരമായി നടപടി സ്വീകരിക്കണം. അതിനിടെ, മൃഗങ്ങളെ കണ്ടെത്താനും നീക്കം ചെയ്യാനും പെട്രോളിങ് സംഘത്തെ നിയോഗിക്കണമെന്നും കോടതി വ്യക്തമാക്കി.

പൊതു ഇടങ്ങളിൽ നടപടി വേണം

സംസ്ഥാന സർക്കാരുകൾ സർക്കാർ ഓഫീസുകൾ, സ്‌പോർട്‌സ് കോംപ്ലക്‌സുകൾ, ബസ് സ്റ്റാൻഡ്, റെയിൽവേ സ്റ്റേഷൻ ഉൾപ്പെടെയുള്ള പൊതുവിടങ്ങളിൽ നിന്ന് തെരുവുനായ്ക്കളെ നീക്കാൻ നടപടി സ്വീകരിക്കണം. വിദ്യാഭ്യാസ സ്ഥാപനങ്ങൾ, ആശുപത്രികൾ അടക്കം പൊതുവിടങ്ങളിൽ നായ്ക്കൾ കയറാതിരിക്കാൻ സംവിധാനം ഒരുക്കണം. കൂടാതെ, ഇക്കാര്യത്തിൽ ദിവസേനയുള്ള പരിശോധന നടത്തണമെന്നും കോടതി നിർദേശിച്ചു.

ദേശീയപാതകളിൽ നിന്ന് മൃഗങ്ങളെ നീക്കിയ നടപടിയിൽ എട്ട് ആഴ്ചയ്ക്കുള്ളിൽ റിപ്പോർട്ട് സമർപ്പിക്കണം. നടപ്പിലാക്കിയ കാര്യങ്ങൾ അതത് സംസ്ഥാനങ്ങളിലെ ചീഫ് സെക്രട്ടറിമാർ സുപ്രീം കോടതിയെ അറിയിക്കണം.

വന്ധ്യംകരണത്തിന് ശേഷം തുറന്നുവിടരുത്

പിടികൂടുന്ന തെരുവ് നായ്ക്കളെ ഷെൽട്ടർ ഹോമുകളിലേക്ക് മാറ്റി വന്ധ്യംകരിക്കണം. ഇതിനായുള്ള നടപടികൾ മുൻസിപ്പൽ കോർപ്പറേഷൻ അടക്കമുള്ള തദ്ദേശസ്ഥാപനങ്ങൾ സ്വീകരിക്കണം. ഏറ്റവും പ്രധാനമായി, പിടികൂടുന്ന നായ്ക്കളെ വന്ധീകരണത്തിനുശേഷം പിടിച്ച അതേസ്ഥലത്ത് തുറന്നുവിടരുതെന്നും സുപ്രീം കോടതി ഇടക്കാല ഉത്തരവിൽ വ്യക്തമാക്കി.

തെരുവുനായ ശല്യം കുറയ്ക്കാൻ ഇത് സഹായകമാകുമോ? ഈ ഉത്തരവിനെക്കുറിച്ച് നിങ്ങളുടെ അഭിപ്രായം പങ്കുവെക്കുക.

Article Summary: Supreme Court orders removal of stray dogs from public places and roads.

#StrayDogs #SupremeCourt #KeralaDogIssue #PublicSafety #AnimalWelfare #CourtOrder