Job Opportunity | ഉദ്യോഗാർഥികളുടെ ശ്രദ്ധയ്ക്ക്: ഡിഗ്രി ഉണ്ടെങ്കിൽ എസ്ബിഐയിൽ ജോലി നേടാം; 600 ഒഴിവുകൾ

ന്യൂഡൽഹി: (KasargodVartha) സ്റ്റേറ്റ് ബാങ്ക് ഓഫ് ഇന്ത്യ (SBI) പ്രൊബേഷണറി ഓഫീസർ (PO) തസ്തികകളിലേക്കുള്ള 2024-25 വർഷത്തെ റിക്രൂട്ട്‌മെൻ്റ് വിജ്ഞാപനം പുറത്തിറക്കി. 600 ഒഴിവുകളാണ് ഉള്ളത്. രാജ്യത്തെ ഏറ്റവും വലിയ ബാങ്കുകളിലൊന്നിൽ ജോലി നേടാൻ ആഗ്രഹിക്കുന്ന ഉദ്യോഗാർത്ഥികൾക്ക് സുവർണാവസരമാണ് ഇത്. ഓൺലൈൻ അപേക്ഷകൾ ഡിസംബർ 27 മുതൽ സ്വീകരിച്ചുതുടങ്ങി. അപേക്ഷിക്കാനുള്ള അവസാന തീയതി 2025 ജനുവരി 16 ആണ്.

പ്രധാനപ്പെട്ട തീയതികൾ ഒറ്റനോട്ടത്തിൽ

●  ഓൺലൈൻ അപേക്ഷ ആരംഭം: 2024 ഡിസംബർ 27
●  ഓൺലൈൻ അപേക്ഷ അവസാന തീയതി: 2025 ജനുവരി 16
●  പ്രാരംഭ പരീക്ഷ കോൾ ലെറ്റർ ഡൗൺലോഡ്: 2025 ഫെബ്രുവരി മൂന്നാം അല്ലെങ്കിൽ നാലാം വാരം മുതൽ
●  പ്രാരംഭ പരീക്ഷ: 2025 മാർച്ച് 8, 15

ഒഴിവുകളുടെ വിശദാംശങ്ങൾ

ഈ റിക്രൂട്ട്‌മെൻ്റിലൂടെ ആകെ 600 ഒഴിവുകളാണ് നികത്തുന്നത്. അതിൽ 586 റെഗുലർ ഒഴിവുകളും 14 ബാക്ക്‌ലോഗ് ഒഴിവുകളും ഉൾപ്പെടുന്നു.

അപേക്ഷിക്കാനുള്ള യോഗ്യത

അംഗീകൃത സർവകലാശാലയിൽ നിന്നുള്ള ഏതെങ്കിലും വിഷയത്തിലുള്ള ബിരുദമാണ് അപേക്ഷിക്കാനുള്ള അടിസ്ഥാന യോഗ്യത. അവസാന വർഷം / സെമസ്റ്റർ പരീക്ഷ എഴുതുന്നവർക്കും അപേക്ഷിക്കാം. എന്നാൽ ഇൻ്റർവ്യൂ സമയത്ത് 2025 ഏപ്രിൽ 30-നോ അതിനുമുമ്പോ ബിരുദം പാസ്സായതിന്റെ രേഖ ഹാജരാക്കണം. 2024 ഏപ്രിൽ ഒന്ന് പ്രകാരം 21 വയസ് പൂർത്തിയായിരിക്കണം. 30 വയസ് കവിയാൻ പാടില്ല. അതായത്, 1994 ഏപ്രിൽ രണ്ടിനും 2003 ഏപ്രിൽ ഒന്നിനും ഇടയിൽ ജനിച്ചവരായിരിക്കണം അപേക്ഷകർ.

തിരഞ്ഞെടുപ്പ് പ്രക്രിയ

മൂന്ന് ഘട്ടങ്ങളിലായാണ് തിരഞ്ഞെടുപ്പ് നടക്കുന്നത്:

●  ഘട്ടം 1: പ്രിലിമിനറി പരീക്ഷ (Preliminary Examination)
●  ഘട്ടം 2: മെയിൻ പരീക്ഷ (Main Examination)
●  ഘട്ടം 3: സൈക്കോമെട്രിക് ടെസ്റ്റ്, ഗ്രൂപ്പ് എക്സർസൈസ്, പേഴ്സണൽ ഇൻ്റർവ്യൂ

പ്രിലിമിനറി പരീക്ഷ ഓൺലൈനായി ഒബ്ജക്റ്റീവ് രീതിയിൽ 100 മാർക്കിനായി നടത്തും. മെയിൻ പരീക്ഷയും ഓൺലൈനായി നടത്തും. അതിൽ 200 മാർക്കിന്റെ ഒബ്ജക്റ്റീവ് ടെസ്റ്റും 50 മാർക്കിന്റെ ഡിസ്ക്രിപ്റ്റീവ് ടെസ്റ്റും ഉണ്ടായിരിക്കും. മൂന്നാം ഘട്ടത്തിലേക്ക് തിരഞ്ഞെടുക്കപ്പെടുന്ന ഉദ്യോഗാർത്ഥികൾക്ക് ബാങ്ക് സൈക്കോമെട്രിക് ടെസ്റ്റ് നടത്തും.

അപേക്ഷാ ഫീസ്

അപേക്ഷാ ഫീസ് പൊതു വിഭാഗം/ഒബിസി/ഇഡബ്ല്യുഎസ് വിഭാഗങ്ങൾക്ക് 750 രൂപയാണ്. എസ്സി/എസ്ടി/പിഡബ്ല്യുബിഡി വിഭാഗങ്ങൾക്ക് ഫീസില്ല. ഒരിക്കൽ അടച്ച ഫീസ് ഒരു കാരണവശാലും തിരികെ നൽകുന്നതല്ല.

എങ്ങനെ അപേക്ഷിക്കാം?

താൽപ്പര്യമുള്ള ഉദ്യോഗാർത്ഥികൾക്ക് ഔദ്യോഗിക വെബ്സൈറ്റായ sbi(dot)co(dot)in വഴി ഓൺലൈനായി അപേക്ഷിക്കാം. അപേക്ഷിക്കുന്നതിന് മുൻപ് വിജ്ഞാപനം ശ്രദ്ധാപൂർവ്വം വായിക്കുക.

#SBIRecruitment #POVacancies #SBIJobs #BankingJobs #JobOpportunity #SBI