കെട്ടിടം തകര്‍ന്ന് വീണ് അപകടം; മരണം 17 ആയി, ശിവസേന നേതാവ് അറസ്റ്റില്‍

മുംബൈ: (www.kasargodvartha.com 26.07.2017) മുംബൈയിലെ സബര്‍ബന്‍ ഖാട്കോപറില്‍ നാലുനില കെട്ടിടം തകര്‍ന്നു വീണ് മരിച്ചവരുടെ എണ്ണം 17 ആയി. അപകടത്തില്‍ മരണ നിരക്ക് ഇനിയും കൂടാന്‍ സാധ്യതയുണ്ടെന്നാണ് റിപോര്‍ട്ട്. അപകടത്തില്‍ 30 ഓളം പേര്‍ക്ക് പരുക്കേറ്റിട്ടുണ്ട്. ചൊവ്വാഴ്ച രാവിലെ 10.40 മണിയോടെയാണ് അപകടമുണ്ടായത്.

കെട്ടിടത്തിന്റെ താഴത്തെ നിലയില്‍ നവീകരണ പ്രവൃത്തി നടന്നുവരുന്നതിനിടെ കെട്ടിടം തകര്‍ന്നു വീഴുകയായിരുന്നു. കെട്ടിടത്തിന്റെ അശാസ്ത്രീയമായ നിര്‍മാണമാണ് അപകടത്തിന് കാരണമെന്നാണ് പറയുന്നത്. ഇതിന്റെ അടിസ്ഥാനത്തിലാണ് ശിവസേന നേതാവ് സുനില്‍ രമേശിനെ പോലീസ് അറസ്റ്റു ചെയ്തത്.

അപകടത്തില്‍ പരിക്കേറ്റവരെ സമീപത്തെ ആശുപത്രിയില്‍ പ്രവേശിപ്പിച്ചു. രക്ഷാപ്രവര്‍ത്തനങ്ങള്‍ പുരോഗമിക്കുകയാണ്. അതേസമയം മുഖ്യമന്ത്രി ദേവേന്ദ്ര 15 ദിവസത്തിനകം റിപോര്‍ട്ട് സമര്‍പ്പിക്കാന്‍ മുനിസിപ്പല്‍ കമ്മീഷണര്‍ അജയ് മെഹ്തയോട് ആവശ്യപ്പെട്ടിട്ടുണ്ട്.