മൃഗസ്നേഹിയായ മനേക ഗാന്ധി നായകൾക്ക് പിന്നാലെ കാട്ടുപന്നികൾക്കും സംരക്ഷകയായി രംഗത്ത്

ന്യൂഡൽഹി: (Kasargodvartha) രാജ്യത്ത് തെരുവ് നായകളുടെ കടിയേറ്റ് ലക്ഷക്കണക്കിനാളുകൾ ചികിത്സയിലിരിക്കെയാണ് മൃഗസ്നേഹിയായ മനേക ഗാന്ധിയുടെ ഇടപെടൽ. തെരുവുനായ വിഷയത്തിൽ മാത്രം ഒതുങ്ങാത്ത അവരുടെ മൃഗസ്നേഹം ഇപ്പോൾ കാട്ടുപന്നികളെ കൊല്ലുന്നതിനെതിരെയും തിരിഞ്ഞു. ഇത് കേരള സർക്കാറിന് പുതിയ തലവേദനയായി മാറി.

കാട്ടിലെ പുലികളുടെയും കടുവകളുടെയും പ്രധാന ഭക്ഷണമാണ് കാട്ടുപന്നികളെന്നും, അവയെ കൂട്ടത്തോടെ വേട്ടയാടിയാൽ ഭക്ഷണം കിട്ടാതെ വന്യമൃഗങ്ങൾ കാടിറങ്ങുമെന്നും ഇത് അപകടകരമാണെന്നും ചൂണ്ടിക്കാട്ടി മനേക ഗാന്ധി മുഖ്യമന്ത്രി പിണറായി വിജയന് കത്തയച്ചു. 

മഹാരാഷ്ട്രയിലെ ചന്ദ്രപൂരിൽ 200 കാട്ടുപന്നികളെ കൊന്നൊടുക്കിയപ്പോൾ നൂറോളം കടുവകൾ കാടിറങ്ങിയ സംഭവം അവർ കത്തിൽ വിശദീകരിക്കുന്നുണ്ട്. ഇതിൽ നാലെണ്ണം റെയിൽവേ ട്രാക്കിൽ അപകടത്തിൽപ്പെട്ടു മരിച്ചു. പിന്നീട് കടുവകൾക്കുള്ള ഇരകളെ കാട്ടിലെത്തിച്ചാണ് സർക്കാർ ഈ പ്രശ്നത്തിൽനിന്ന് തലയൂരിയതെന്നും, ഇതേ അവസ്ഥയാണ് കേരളത്തെയും കാത്തിരിക്കുന്നതെന്നും മനേക ഗാന്ധി പറയുന്നു.

സംസ്ഥാനത്തെ ചില പഞ്ചായത്തുകൾ കാർഷിക വിളകൾ നശിപ്പിക്കുന്നതിനാൽ കാട്ടുപന്നികളെ വെടിവെച്ച് കൊല്ലാൻ പ്രഫഷണൽ വേട്ടക്കാരെ നിയോഗിച്ചിരുന്നു. ഇവരുടെ ലക്ഷ്യം പക്ഷികളും ഉടുമ്പ് അടക്കമുള്ള ചെറു മൃഗങ്ങളാണെന്നും അതിനാൽ പന്നി വേട്ട അനുവദിക്കരുതെന്നും മനേക ഗാന്ധി കത്തിൽ ആവശ്യപ്പെട്ടു.

അതിനിടെ, ഡൽഹിയിൽ അപകടകാരികളായ തെരുവ് നായകളെ മാറ്റിപ്പാർപ്പിക്കണമെന്ന സുപ്രീംകോടതിയുടെ നിർദേശത്തിനെതിരെയും മുൻ കേന്ദ്രമന്ത്രി കൂടിയായ മനേക ഗാന്ധി രംഗത്ത് വന്നിട്ടുണ്ട്. ഡൽഹിയിലെ സമ്പന്നരാണ് കോടതിയിൽ പോയതെന്നും, തെരുവിൽനിന്ന് നായ്ക്കളെ കൊണ്ടുപോകാൻ മുനിസിപ്പൽ കോർപ്പറേഷന് ഇവർ പണം നൽകുകയും, പിടിച്ച തെരുവ് നായ്ക്കളെ പാവപ്പെട്ടവരുടെ താമസസ്ഥലത്ത് കൊണ്ടുപോയി ഉപേക്ഷിക്കുകയാണ് പതിവെന്നും മനേക ഗാന്ധി കുറ്റപ്പെടുത്തുന്നു. 

ഡൽഹിയിൽ സമ്പന്നരായ ആർക്കും ഇത് വരെ തെരുവ് നായകളുടെ കടിയേറ്റിട്ടില്ലെന്നും, പാവപ്പെട്ടവർക്കും മധ്യവർഗക്കാർക്കുമാണ് കടിയേറ്റത് ഏറെയെന്നും മനേക ഗാന്ധി ചൂണ്ടിക്കാട്ടി. ഇത് അനുവദിച്ചുകൊടുക്കരുതെന്നും അവർ ആവശ്യപ്പെടുന്നു.

അതിനിടെ, കേരളത്തിൽ തെരുവ് നായ ശല്യം രൂക്ഷമായ സാഹചര്യത്തിൽ സംസ്ഥാന സർക്കാർ പുതിയ നിയമം കൊണ്ടുവരാൻ ആലോചിക്കുന്നുണ്ട്. തെരുവ് നായകളെ കൊല്ലാതെ അവയെ നിയന്ത്രിക്കുന്ന തരത്തിലുള്ള നടപടിക്കായി കരട് തയ്യാറാക്കാൻ ഉന്നതതലയോഗം തദ്ദേശസ്വയംഭരണ വകുപ്പിനെ ചുമതലപ്പെടുത്തിയിട്ടുണ്ട്. 

ഗുരുതര രോഗമുള്ളതോ അപകടം പറ്റിയതോ ആയ തെരുവ് നായകളെ ദയാവധത്തിന് വിധേയമാക്കാൻ നേരത്തെ സംസ്ഥാനം തീരുമാനിച്ചെങ്കിലും ഹൈകോടതി ഇത് തടഞ്ഞിരുന്നു. ഇതോടെയാണ് പുതിയ വഴി തേടുന്നത്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായം താഴെ കമന്റ് ചെയ്യുക, നിങ്ങളുടെ സുഹൃത്തുക്കളുമായി ഇത് ഷെയർ ചെയ്യുക.

Article Summary: Maneka Gandhi opposes wild boar culling and relocation of street dogs.

#ManekaGandhi #WildBoars #StreetDogs #KeralaPolitics #AnimalRights #Kerala