ഇനി പ്രായമായ അച്ഛനമ്മമാരെ വൃദ്ധസദനത്തിൽ തളച്ചിടാനാവില്ല: രാജ്യത്താദ്യമായി വയോജന കമ്മീഷൻ രൂപവത്കരിച്ച് കേരളം

തിരുവനന്തപുരം: (KasargodVartha) രാജ്യത്താദ്യമായി വയോജന കമ്മീഷൻ രൂപവത്കരിക്കുന്ന സംസ്ഥാനമായി കേരളം. ഒരു ചെയർപേഴ്സനും നാല് അംഗങ്ങളും ഉൾപ്പെടുന്നതാണ് കമ്മീഷൻ. ഇത് സംബന്ധിച്ച സർക്കാർ വിജ്ഞാപനം പുറത്തിറങ്ങി. 

മുൻ രാജ്യസഭാ എം.പി. എം.പി. സോമപ്രസാദാണ് ചെയർപേഴ്സൺ. നേരത്തേ ഇദ്ദേഹം കൊല്ലം ജില്ലാ പഞ്ചായത്ത് പ്രസിഡന്റുമായിരുന്നു. മറ്റു നാല് അംഗങ്ങളെയും നിയമിച്ചിട്ടുണ്ട്. വിവിധ മേഖലകളിൽ പ്രവർത്തിച്ച് പരിചയമുള്ളവരാണ് മറ്റു നാല് അംഗങ്ങൾ.

തിരുവനന്തപുരത്തായിരിക്കും കമ്മീഷന്റെ ആസ്ഥാനം. മൂന്നുവർഷത്തേക്കാണ് ചെയർപേഴ്സന്റെയും അംഗങ്ങളുടെയും ഔദ്യോഗിക കാലാവധി. ചെയർപേഴ്സന് സർക്കാർ സെക്രട്ടറിയുടെ പദവി ഉണ്ടാകും.

വയോജനങ്ങളുടെ ക്ഷേമം, സംരക്ഷണം, പുനരധിവാസം എന്നിവ ഉറപ്പാക്കാനും, അവരുടെ ഉത്പാദനക്ഷമതയും, മൗലികവും നൂതനവുമായ ആശയങ്ങളും, കഴിവും പരിചയസമ്പത്തും സമൂഹത്തിന് ഉപയോഗപ്പെടുത്താനുമായിട്ടാണ് വയോജന കമ്മീഷൻ രൂപവത്കരിക്കുന്നതെന്ന് സാമൂഹിക നീതി വകുപ്പ് മന്ത്രി ഡോ. ആർ. ബിന്ദു പറഞ്ഞു.

രാജ്യത്തെ മറ്റു സംസ്ഥാനങ്ങളെക്കാൾ ജനസംഖ്യാ വളർച്ചാ നിരക്ക് കൂടുതലുള്ള കേരളത്തിൽ ഒരു വർഷത്തിനകം ആകെ ജനസംഖ്യയുടെ കാൽഭാഗം മുതിർന്നവരായിരിക്കുമെന്നാണ് കണക്കുകൾ സൂചിപ്പിക്കുന്നത്. ഈ സാഹചര്യംകൂടി കണക്കിലെടുത്താണ് സംസ്ഥാന സർക്കാരിന്റെ ഇടപെടൽ. 

വയോജനങ്ങളുടെ എല്ലാ വിഷയങ്ങളിലും കമ്മീഷന്റെ ഇടപെടലുകളുണ്ടാകും. നിർബന്ധിച്ച് വയോജനങ്ങളെ വൃദ്ധസദനങ്ങളിലും മറ്റും തളച്ചിടുന്നവർക്കെതിരെ ശക്തമായ ഇടപെടലുകളുണ്ടാകുമെന്നതാണ് ഏറ്റവും ശ്രദ്ധേയം.

വൃദ്ധസദനങ്ങളിലേക്ക് നിർബന്ധിച്ച് അയയ്ക്കുന്നതിനെക്കുറിച്ചുള്ള ഈ പുതിയ തീരുമാനത്തെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കൂ.

Article Summary: Kerala forms India's first Senior Citizen Commission to protect elderly.

#Kerala #SeniorCitizenCommission #ElderlyCare #MPsomaprasad #KeralaGovernment #SocialJustice