Poonam Kaur | ഭാരത് ജോഡോ യാത്രക്കിടെ നടി പൂനം കൗറിനെ കൈകോര്‍ത്തു പിടിച്ചുള്ള രാഹുല്‍ ഗാന്ധിയുടെ ചിത്രം സമൂഹ മാധ്യമങ്ങളില്‍ പങ്കിട്ട് മോശം കമന്റിട്ടു; ബിജെപി വനിതാ നേതാവിന് ചുട്ട മറുപടിയുമായി താരം; പിന്നാലെ മറ്റ് നേതാക്കളും

ന്യൂഡെല്‍ഹി: (www.kvartha.com) ഭാരത് ജോഡോ യാത്രക്കിടെ നടി പൂനം കൗറിനെ കൈകോര്‍ത്തു പിടിച്ചുള്ള രാഹുല്‍ ഗാന്ധിയുടെ ചിത്രം സമൂഹ മാധ്യമങ്ങളില്‍ പങ്കിട്ട് മോശം കമന്റിട്ട ബിജെപി വനിതാ നേതാവിന് ചുട്ട മറുപടിയുമായി താരം, പിന്നാലെ വിമര്‍ശനങ്ങളുമായി മറ്റ് നേതാക്കളും.

തെലങ്കാനയിലെ ഭാരത് ജോഡോ യാത്രക്കിടയിലുള്ള ചിത്രം ബിജെപി നേതാവ് പ്രീതി ഗാന്ധിയാണ് പങ്കുവെച്ചത്. 'രാഹുല്‍ ഗാന്ധി തന്റെ മുത്തച്ഛന്റെ പാത പിന്തുടരുകയാണ്' എന്ന പരിഹാസത്തോടെയായിരുന്നു ട്വീറ്റ്. ഇതിനെതിരെയാണ് നടി രംഗത്തെത്തിയത്.

ബിജെപി നേതാവിന്റെ ട്വീറ്റ് തീര്‍ത്തും അപകീര്‍ത്തിപ്പെടുത്തുന്നതാണെന്ന് പറഞ്ഞ പൂനം കൗര്‍ താന്‍ നടക്കുന്നതിനിടയില്‍ വീഴാന്‍ പോയപ്പോഴാണ് രാഹുല്‍ ഗാന്ധി തന്റെ കൈപിടിച്ചതെന്നും വ്യക്തമാക്കി.

പ്രധാനമന്ത്രി നാരീശക്തിയെ കുറിച്ച് പറഞ്ഞത് ബിജെപി നേതാവ് ഓര്‍ക്കുന്നത് നന്നായിരിക്കുമെന്നും പൂനം ട്വിറ്ററില്‍ കുറിച്ചു. മുതിര്‍ന്ന നേതാവ് ജയറാം രമേശും പ്രീതി ഗാന്ധിക്കെതിരെ വിമര്‍ശനവുമായി രംഗത്തുവന്നു. പ്രീതിയുടേത് വികൃതമായ മനസാണെന്നായിരുന്നു അദ്ദേഹത്തിന്റെ ട്വീറ്റ്.

ശരിയാണ് രാഹുല്‍ ഗാന്ധി അദ്ദേഹത്തിന്റെ മുത്തച്ഛന്റെ പാത പിന്തുടരുകയാണെന്നും രാജ്യത്തെ ഒന്നിപ്പിക്കുകയാണെന്നും കോണ്‍ഗ്രസ് വക്താവ് സുപ്രിയ ഷിന്‍ഡെ കുറിച്ചു. നിങ്ങള്‍ക്ക് അടിയന്തരമായി ചികിത്സ വേണ്ടതുണ്ടെന്നും സുപ്രിയ ട്വീറ്റ് ചെയ്തു. നിങ്ങളുടെ മാനസികാവസ്ഥ കുടുംബത്തിനും സുഹൃത്തുക്കള്‍ക്കുമെല്ലാം ഹാനികരമാണെന്നായിരുന്നു പവന്‍ ഖേരയുടെ പ്രതികരണം.'