Insurance Policy | ഇൻഷുറൻസ് മേഖലയിൽ വലിയ മാറ്റം സംഭവിക്കുന്നു! ആരോഗ്യം മുതൽ സ്വത്ത് വരെ എല്ലാം പരിരക്ഷിക്കുന്ന ഒറ്റ പോളിസി അവതരിപ്പിക്കാൻ ഒരുങ്ങി ഐആർഡിഎഐ

ജനറൽ ഇൻഷുറൻസ് കൗൺസിലിനും ലൈഫ് ഇൻഷുറൻസ് കൗൺസിലിനും ഒപ്പം ഐആർഡിഎഐ ഇതിനായി പ്രവർത്തിക്കുകയാണെന്ന് ഐആർഡിഎ മേധാവി ദേവാശിഷ് ​​പാണ്ഡ പറഞ്ഞു. ജനങ്ങളുടെ എല്ലാ അപകടസാധ്യതകളും ഒരു പോളിസിയിൽ ഉൾപ്പെടുത്തണമെന്ന് ഞങ്ങൾ ആഗ്രഹിക്കുന്നു. ഇതുകൂടാതെ, ഈ പോളിസി ജനങ്ങൾക്ക് എളുപ്പത്തിൽ ലഭ്യമാകുകയും അതിന്റെ പ്രീമിയം ആളുകൾക്ക് താങ്ങാനാവുന്നതായുമായിരിക്കും. ക്ലെയിമുകളുടെ തീർപ്പും വേഗത്തിലായിരിക്കുമെന്നും അദ്ദേഹം വ്യക്തമാക്കി. ഇതുമൂലം ഇൻഷുറൻസ് മേഖലയിൽ ജോലി സാധ്യതയും വർധിക്കുമെന്നാണ് പ്രതീക്ഷ.

വിവിധ മേഖലകളിലെ ഇൻഷുറൻസ് പോളിസികൾക്കായി സാധാരണക്കാർ അലയേണ്ടതില്ല എന്നതാണ് ഐആർഡിഎയുടെ പദ്ധതിയുടെ പ്രത്യേകത. ഇതിനായി ബീമാ സുഗം ഡിജിറ്റൽ പ്ലാറ്റ്‌ഫോം സൃഷ്ടിക്കും, അതിൽ പോളിസികൾ വിൽക്കുന്ന കമ്പനികൾക്കും പോളിസികൾ വാങ്ങുന്ന ആളുകൾക്കും വിതരണക്കാർക്കും ചേരാനാകും. പോളിസി ഫീച്ചറുകളും   പ്രീമിയവും സംബന്ധിച്ച് സുതാര്യത ഉണ്ടാകുമെന്നതാണ് ഇതിന്റെ നേട്ടം. പോളിസി എടുക്കാനും വിൽക്കാനും എളുപ്പമായിരിക്കും.