മൂന്ന് യുദ്ധങ്ങളെ അതിജീവിച്ച കരാർ; ലോകബാങ്കിന്റെ മധ്യസ്ഥതയിൽ ഒപ്പുവച്ച സിന്ധു നദീജല ഉടമ്പടിക്ക് തിരശ്ശീല വീഴുന്നുവോ?

 സോണി കല്ലറയ്ക്കൽ

(KasargodVartha) ലോക മനഃസാക്ഷിയെ ഞെട്ടിച്ച പഹൽഗാമിലെ ഭീകരാക്രമണത്തിന് പിന്നാലെ ഇന്ത്യ പാകിസ്താനെതിരെ നിർണായക നീക്കവുമായി മുന്നോട്ട് പോകുകയാണ്. ജമ്മു കശ്മീരിലെ അനന്ത്നാഗ് ജില്ലയിലെ പഹൽഗാമിൽ നടന്ന ഭീകരാക്രമണത്തിൽ നിരവധി വിനോദസഞ്ചാരികൾക്ക് ജീവൻ നഷ്ടപ്പെടുകയും പലർക്കും പരിക്കേൽക്കുകയും ചെയ്തു.

ഈ ഹീനകൃത്യത്തെ അപലപിച്ച് ലോകരാജ്യങ്ങൾ ഒന്നടങ്കം രംഗത്തെത്തി. ഈ സാഹചര്യത്തിൽ, പാകിസ്താനെതിരെ ശക്തമായ നടപടികളുമായി മുന്നോട്ട് പോവുകയാണ് ഇന്ത്യ. അതിൻ്റെ ആദ്യപടിയെന്നോണം സിന്ധു നദീജല ഉടമ്പടി റദ്ദാക്കിയിരിക്കുന്നുവെന്നാണ് ലഭിക്കുന്ന വിവരം. ഇത് പാകിസ്താന് ഭാവിയിൽ വലിയ തിരിച്ചടിയായേക്കാം. എന്താണ് ഇന്ത്യയും പാകിസ്താനും തമ്മിലുള്ള ഈ സിന്ധു നദീജല ഉടമ്പടി എന്ന് നമുക്ക് പരിശോധിക്കാം.

എന്താണ് സിന്ധു നദീജല ഉടമ്പടി?

ലോകബാങ്കിൻ്റെ (International Bank for Reconstruction and Development) മധ്യസ്ഥതയിൽ ഇന്ത്യയും പാകിസ്താനും തമ്മിൽ ഒപ്പുവച്ച ഒരു ജലവിതരണ കരാറാണ് സിന്ധു നദീജല ഉടമ്പടി (Indus Waters Treaty). 1947-ലെ ഇന്ത്യാ-പാക് വിഭജനം സിന്ധു നദീതടത്തെ രണ്ടായി വിഭജിച്ചു.

ഈ മേഖലയിലെ ജനങ്ങളുടെ പ്രധാന ജലസ്രോതസ്സും ജലസേചനത്തിനുള്ള ആശ്രയവും സിന്ധു നദീതടമായിരുന്നു. അതിനാൽത്തന്നെ ജലം പങ്കിടുന്നതുമായി ബന്ധപ്പെട്ട് ഒരു ധാരണ അനിവാര്യമായിരുന്നു. ഈ ആവശ്യകതയാണ് സിന്ധു നദീജല കരാറിലേക്ക് നയിച്ചത്. 1960 സെപ്റ്റംബർ 19-ന് കറാച്ചിയിൽ വെച്ച് ഇന്ത്യൻ പ്രധാനമന്ത്രി ജവഹർലാൽ നെഹ്‌റുവും പാകിസ്താൻ പ്രസിഡൻ്റ് അയ്യൂബ് ഖാനും ഈ ഉടമ്പടിയിൽ ഒപ്പുവച്ചു.

ഈ കരാർ പ്രകാരം കിഴക്കോട്ടൊഴുകുന്ന ബിയാസ്, രവി, സത്ലജ് എന്നീ നദികളുടെ നിയന്ത്രണം ഇന്ത്യയ്ക്കും, പടിഞ്ഞാറോട്ടൊഴുകുന്ന സിന്ധു, ചിനാബ്, ഝലം എന്നീ നദികളുടെ നിയന്ത്രണം പാകിസ്താനും ലഭിച്ചു. ഏറ്റവും കൂടുതൽ തർക്കങ്ങൾക്ക് വഴിവെച്ചത് ജലം എങ്ങനെ പങ്കുവെക്കുമെന്നതായിരുന്നു.

പാകിസ്താനിലേക്ക് ഒഴുകുന്ന നദികൾ ആദ്യം ഇന്ത്യയിലൂടെയാണ് കടന്നുപോകുന്നത്. അതിനാൽ ഈ നദികളിലെ ജലം ജലസേചനത്തിനും, യാത്രാമാർഗ്ഗത്തിനും, വൈദ്യുതി ഉൽപ്പാദനത്തിനും ഉപയോഗിക്കാൻ ഇന്ത്യയ്ക്ക് അനുമതി നൽകുന്ന വ്യവസ്ഥകൾ ഉടമ്പടിയിലുണ്ടായിരുന്നു.

എന്നാൽ ഇന്ത്യ തങ്ങളുടെ ഭാഗത്തുകൂടി ഒഴുകുന്ന നദികളെ തിരിച്ചുവിട്ട് പാകിസ്താനിൽ വരൾച്ചയും പട്ടിണിയും സൃഷ്ടിക്കുമോ എന്ന ഭയം, പ്രത്യേകിച്ചും യുദ്ധകാലത്ത്, പാകിസ്താനുണ്ടായിരുന്നു. ഈ ആശങ്കയിൽ നിന്നുമാണ് ഇത്തരമൊരു കരാർ രൂപംകൊണ്ടത്.

1960-ൽ ഈ കരാർ അംഗീകരിച്ചതിനുശേഷം ഇന്ത്യയും പാകിസ്താനും ജലത്തിനായി യുദ്ധം ചെയ്തിട്ടില്ല എന്നത് ശ്രദ്ധേയമാണ്. കരാറിലെ വ്യവസ്ഥകൾക്കുള്ളിൽ നിന്ന് കൊണ്ട് തന്നെ ഇരു രാജ്യങ്ങൾക്കുമിടയിലെ പരാതികളും തർക്കങ്ങളും പരിഹരിക്കാൻ സാധിച്ചിട്ടുണ്ട്.

ഇന്ന് ലോകത്തിലുള്ള നദീജല പങ്കുവെക്കൽ കരാറുകളിൽ ഏറ്റവും വിജയകരമായ ഒന്നായി സിന്ധു നദീജല ഉടമ്പടിയെ കണക്കാക്കുന്നു. എങ്കിലും കാലാവസ്ഥാ വ്യതിയാനവും മറ്റു ചില കാര്യങ്ങളും പരിഗണിച്ച് കരാർ പുതുക്കേണ്ടതുണ്ടെന്ന അഭിപ്രായങ്ങൾ നിലവിലുണ്ട്. നിലവിലെ കരാർ പ്രകാരം സിന്ധു നദിയിലെ 20 ശതമാനം വെള്ളം മാത്രമേ ഇന്ത്യയ്ക്ക് ഉപയോഗിക്കാൻ അനുവാദമുള്ളൂ.

1965, 1971, 1999 എന്നീ വർഷങ്ങളിൽ ഇന്ത്യയും പാകിസ്താനും തമ്മിൽ മൂന്ന് വലിയ യുദ്ധങ്ങൾ നടന്നപ്പോഴും ഈ ഉടമ്പടി തകരാതെ നിലനിന്നു. എന്നാൽ അതിർത്തികളിൽ പാകിസ്താന്റെ തുടർച്ചയായ പ്രകോപനങ്ങൾ കരാറിനെ വീണ്ടും ചർച്ചയിലേക്ക് കൊണ്ടുവന്നു. കൂടാതെ ഇന്ത്യ നിർമ്മിക്കുന്ന ജലവൈദ്യുത പദ്ധതികളെ പാകിസ്താൻ എതിർക്കുകയും ചെയ്തു.

ഇതിൽ 330 മെഗാവാട്ടിൻ്റെ കിഷൻഗംഗ പദ്ധതിയും 850 മെഗാവാട്ടിൻ്റെ രത്‌ലെ ജലവൈദ്യുത പദ്ധതിയും ഉൾപ്പെടുന്നു. ഈ പദ്ധതികൾ യാഥാർത്ഥ്യമാകുന്നതോടെ തങ്ങളുടെ ഭാഗത്തേക്കുള്ള ജലത്തിൻ്റെ ഒഴുക്ക് കുറയുമെന്നതായിരുന്നു പാകിസ്താന്റെ പ്രധാന വാദം.

അതേസമയം, കരാറിൽ ഭേദഗതി വരുത്തണമെന്ന് ഇന്ത്യ വളരെക്കാലമായി ആവശ്യപ്പെടുന്ന കാര്യമാണ്. കഴിഞ്ഞ വർഷം ഓഗസ്റ്റിൽ, ഉടമ്പടി പുനഃപരിശോധിക്കണമെന്ന് ആവശ്യപ്പെട്ട് ഇന്ത്യ പാകിസ്താന് നോട്ടീസ് നൽകിയിരുന്നു. മൂന്ന് യുദ്ധങ്ങളെ അതിജീവിച്ച ഈ കരാറാണ് ഇപ്പോൾ ഇന്ത്യ റദ്ദാക്കിയിരിക്കുന്നത്.

എന്തായാലും ഈ കരാർ റദ്ദാക്കിയതുമൂലം ഏറ്റവും കൂടുതൽ ദുരിതത്തിലാകുന്നത് പാകിസ്താനിലെ സാധാരണ ജനങ്ങളാണ്. ഇത് ആ രാജ്യത്ത് വലിയ തോതിലുള്ള പ്രശ്നങ്ങൾക്ക് കാരണമായേക്കാം എന്നതിൽ സംശയമില്ല. ഭീകരാക്രമണങ്ങൾ ആരുടെ ഭാഗത്തുനിന്നുണ്ടായാലും അത് അംഗീകരിക്കാൻ കഴിയില്ല. ലോകം ഒറ്റക്കെട്ടായി ഇതിനെ എതിർത്ത് തോൽപ്പിക്കേണ്ടത് അനിവാര്യമാണ്.

ഈ വാർത്തയെക്കുറിച്ചുള്ള അഭിപ്രായങ്ങളും ഇത് സംബന്ധിച്ച് നിങ്ങൾ അറിയുന്ന മറ്റ് കാര്യങ്ങളും കമന്റ് ബോക്സിൽ പങ്കുവെക്കുക. സുഹൃത്തുകൾക്ക് ഈ വിവരങ്ങൾ എത്താനായി ഷെയർ ചെയ്യാനും മറക്കരുത്.

Summary: Following the Pahalgam terror attack, reports suggest India may revoke the Indus Waters Treaty, a water-sharing agreement between India and Pakistan mediated by the World Bank in 1960. The article discusses the treaty's history, its survival through three wars, and the potential consequences of its revocation for Pakistan.

#IndusWatersTreaty, #IndiaPakistan, #PahalgamAssault, #WaterSharing, #WorldBank, #Geopolitics