Stock Market | അദാനി പിന്മാറിയതോടെ ഓഹരി വിപണിയിലുണ്ടായ തകർച്ചയ്ക്ക് ശേഷം വീണ്ടും ഉണർവ്; ആഗോള ഓഹരിവിപണികളിൽ ഇന്ത്യ അഞ്ചാം സ്ഥാനം തിരിച്ചുപിടിച്ചു

ന്യൂഡെൽഹി:  (www.kasargodvartha.com) അദാനി ഗ്രൂപ്പിന്റെ ഓഹരികൾ വിറ്റഴിച്ചതിനെത്തുടർന്ന് ഇന്ത്യൻ ഓഹരി വിപണിയിലുണ്ടായ തകർച്ചയ്ക്ക് ശേഷം വീണ്ടും ഉണർവ്. ലോകത്തെ മുൻനിര ഓഹരി വിപണികളുടെ പട്ടികയിൽ ഇന്ത്യ വീണ്ടും അഞ്ചാം സ്ഥാനത്തെത്തി. നേരത്തെ ഈ സ്ഥാനം കുറച്ചുകാലം ഫ്രാൻസ് കൈവശം വച്ചിരുന്നു. ഇന്ത്യയുടെ വിപണി മൂലധനം വെള്ളിയാഴ്ച 3.15 ട്രില്യൺ ഡോളറായി ഉയർന്നു. ഇത് ഫ്രാൻസിനേക്കാൾ കൂടുതലാണ്. ബ്ലൂംബെർഗ് സമാഹരിച്ച കണക്കുകൾ പ്രകാരം ബ്രിട്ടൻ ഏഴാം സ്ഥാനത്ത് തുടരുന്നു. ഓരോ രാജ്യത്തെയും പ്രൈമറി ലിസ്റ്റ് ചെയ്ത കമ്പനികളുടെ മൊത്തം ആസ്തി കണക്കിലെടുത്താണ് ഈ കണക്കുകൾ തയ്യാറാക്കിയിരിക്കുന്നത്.
നവംബർ മുതൽ ഇന്ത്യൻ ഓഹരി വിപണികളിൽ നിന്ന് ഫണ്ട് പിൻവലിച്ചതിന് ശേഷം, ഈ മാസം ഫെബ്രുവരി ഒമ്പത് വരെയുള്ള ഏഴ് സെഷനുകളിൽ രണ്ട് സെഷനുകളിലും വിദേശ നിക്ഷേപകർ അറ്റാദായം (Net) വാങ്ങുന്നവരായിരുന്നു. മൂലധന ചിലവ് വർധിപ്പിക്കാനുള്ള സർക്കാരിന്റെ പദ്ധതിയെ തുടർന്നായിരുന്നു ഇത്.

ഏറ്റവും പുതിയ ത്രൈമാസ റിപ്പോർട്ടിംഗ് സീസൺ തുടരുമ്പോൾ, ഈ വർഷം എംഎസ്‌സിഐ ഇന്ത്യ കമ്പനികളുടെ ഒരു ഷെയറിന്റെ വരുമാനം 14.5% വർധിക്കുമെന്ന് വിദഗ്ധർ കണക്കാക്കുന്നു. ഇത് ചൈനയുടെ പ്രതീക്ഷകൾക്ക് അനുസൃതവും മിക്ക പ്രധാന വിപണികളേക്കാൾ മികച്ചതുമാണ്. നേരെമറിച്ച്, യുഎസ് സ്ഥാപനങ്ങളുടെ ഇപിഎസ് ഒരുപക്ഷേ 0.8% വർധിച്ചേക്കും.