ഇന്ത്യയുടെ കടുത്ത നടപടിക്ക് മറുപടി നൽകുമെന്ന് പാകിസ്ഥാൻ; സൈന്യത്തിന് ജാഗ്രതാ നിർദ്ദേശം

ദില്ലി: (KasargodVartha) പഹൽഗാം ഭീകരാക്രമണത്തിന്റെ പശ്ചാത്തലത്തിൽ ഇന്ത്യ സ്വീകരിച്ചിട്ടുള്ള കടുത്ത നടപടികളെക്കുറിച്ച് ചർച്ച ചെയ്യാൻ പാകിസ്ഥാൻ വ്യാഴാഴ്ച ദേശീയ സുരക്ഷാ കൗൺസിൽ യോഗം വിളിച്ചു ചേർക്കും. പ്രധാനമന്ത്രി ഷെഹ്ബാസ് ഷെരീഫിന്റെ നേതൃത്വത്തിലായിരിക്കും യോഗം നടക്കുക. ഇന്ത്യക്ക് ഉചിതമായ മറുപടി നൽകുമെന്ന് പാകിസ്ഥാൻ പ്രതിരോധ മന്ത്രി ഖ്വാജ ആസിഫ് ഇസ്ലാമാബാദിൽ മാധ്യമങ്ങളോട് പ്രതികരിച്ചു.

പാക് സൈന്യത്തിന് ജാഗ്രതാ നിർദ്ദേശം നൽകിയിട്ടുണ്ടെന്ന് അറിയിച്ച മന്ത്രി, ഭീകരാക്രമണത്തിൽ പാകിസ്ഥാന്റെ പങ്ക് എന്താണെന്നതിന് തെളിവുണ്ടോ എന്നും ചോദിച്ചു. ഭീകരവാദത്തിന്റെ ഏറ്റവും വലിയ ഇരകളിൽ ഒന്നാണ് പാകിസ്ഥാനെന്നും, ഭീകര സംഘടനകൾ പ്രവർത്തിക്കുന്നത് ഇന്ത്യയിലാണെന്നും അദ്ദേഹം കുറ്റപ്പെടുത്തി. ഇന്ത്യയുടെ ഈ നടപടിയിൽ പ്രതിഷേധം അറിയിക്കുന്നതിനായി പാകിസ്ഥാനിലെ ഇന്ത്യൻ ഹൈക്കമ്മീഷൻ ഉദ്യോഗസ്ഥനെ വ്യാഴാഴ്ച പാകിസ്ഥാൻ വിളിച്ചുവരുത്തുമെന്നാണ് കരുതുന്നത്.

ഇന്ത്യ-പാക് യുദ്ധങ്ങൾ നടന്നപ്പോൾ പോലും റദ്ദാക്കാത്ത സിന്ധു നദീജല കരാർ 65 വർഷങ്ങൾക്ക് ശേഷം ഇന്ത്യ മരവിപ്പിക്കാൻ തീരുമാനിച്ചത് പാകിസ്ഥാന് വലിയ തിരിച്ചടിയായിരിക്കുകയാണ്. ഈ വിഷയത്തിൽ പാകിസ്ഥാനിലെ മുതിർന്ന മന്ത്രിമാർ ബുധനാഴ്ച ശക്തമായ പ്രതികരണങ്ങൾ നടത്തിയിരുന്നു. ഇതിനോടനുബന്ധിച്ച്, പാക് പൗരന്മാർക്ക് വിസ നൽകുന്നത് ഇന്ത്യ നിർത്തിവയ്ക്കുകയും, വാഗാ-അട്ടാരി അതിർത്തി അടച്ചിടുകയും ചെയ്യും. പാകിസ്ഥാൻ ഹൈക്കമ്മീഷനിലെ പ്രതിരോധ ഉദ്യോഗസ്ഥരെ ഒരാഴ്ചയ്ക്കുള്ളിൽ പുറത്താക്കാനും, ഇന്ത്യ തങ്ങളുടെ ഉദ്യോഗസ്ഥരെ തിരികെ വിളിക്കാനും തീരുമാനിച്ചിട്ടുണ്ട്. പാകിസ്ഥാനിലെ ഇന്ത്യൻ ഹൈക്കമ്മീഷനിലെ അംഗങ്ങളുടെ എണ്ണം 55 ൽ നിന്ന് 30 ആയി കുറയ്ക്കാനും തീരുമാനിച്ചിട്ടുണ്ട്.

ഈ വാർത്ത നിങ്ങളുടെ സുഹൃത്തുക്കളുമായി പങ്കുവെക്കുക. അഭിപ്രായങ്ങൾ കമൻറ് ബോക്സിൽ രേഖപ്പെടുത്തുക.

Following the Pahalgam attack, Pakistan's National Security Council will meet to discuss India's strong actions. Pakistan's defense minister has vowed retaliation, while India's decision to freeze the Indus Water Treaty has escalated tensions.

#IndiaPakistan, #SecurityCouncil, #IndusWaterTreaty, #PahalgamAttack, #Kashmir, #Diplomacy