ബംഗളൂരുവില്‍ ആ സുവര്‍ണ ഭാഗ്യം ലഭിച്ച കുട്ടി ഇവളാണ്

By Web Desk - MainJan 2, 2018, 13:10 IST

ബംഗളൂരു: (www.kasargodvartha.com 02.01.2018) പുതുവര്‍ഷത്തില്‍ ആദ്യം ജനിക്കുന്ന കുഞ്ഞിന് സൗജന്യ വിദ്യാഭ്യാസമെന്ന സുവര്‍ണ ഭാഗ്യം ലഭിച്ചത് ഗോപി- പുഷ്പ ദമ്പതികളുടെ മകള്‍ക്ക്. പുതുവത്സരം പിറന്ന് അഞ്ചു മിനുട്ട് കഴിഞ്ഞാണ് പുഷ്പ പെണ്‍കുഞ്ഞിന് ജന്മം നല്‍കിയത്. രാജാജി നഗര്‍ സര്‍ക്കാര്‍ ആശുപത്രിയിലായിരുന്നു പുഷ്പയുടെ പ്രസവം.

ഡിഗ്രി വരെ സൗജന്യ വിദ്യാഭ്യാസമാണ് കുഞ്ഞിന് ലഭിച്ചിരിക്കുന്നത്. ഇവരുടെ അക്കൗണ്ടിലേക്ക് ബിബിഎംപിയുടെ അഞ്ചു ലക്ഷം രൂപ ഡെപോസിറ്റ് ചെയ്തിട്ടുണ്ട്. ഇതില്‍ നിന്നും ലഭിക്കുന്ന പലിശപ്പണം കുട്ടിയുടെ വിദ്യാഭ്യാസത്തിനായി ഉപയോഗിക്കാം. പുതുവത്സരാഘോഷത്തിന്റെ ഭാഗമായാണ് ബൃഹത് ബംഗളൂരു മഹാനഗര പാലികെ പുതുവത്സരം പിറന്ന് ആദ്യം ജനിക്കുന്ന കുഞ്ഞിന് സൗജന്യ വിദ്യാഭ്യാസം പ്രഖ്യാപിച്ചത്.

പാവപ്പെട്ട ജനങ്ങളുടെ ക്ഷേമത്തിനും പാവപ്പെട്ട കുടുംബത്തിലെ കുട്ടികള്‍ക്ക് ഉന്നത വിദ്യഭ്യാസം ലഭിക്കുക എന്ന ലക്ഷ്യത്തോടെയുമാണ് ഇങ്ങനെയൊരു പ്രഖ്യാപനം നടത്തിയതെന്ന് അധികൃതര്‍ പറഞ്ഞു. സെക്രട്ടറിയേറ്റില്‍ കോണ്‍ക്രീറ്റ് ജോലിക്കാരാണ് ഗോപിയും പുഷ്പയും. കുഞ്ഞിന് സൗജന്യ വിദ്യാഭ്യാസം ലഭിച്ചത് ഏറെ സന്തോഷിപ്പിച്ചെന്ന് ഗോപി പറഞ്ഞു.