ട്രാന്‍സ്‌ഫോര്‍മറില്‍ നിന്ന് തീപ്പൊരിവീണ് അഞ്ച് മത്സ്യബന്ധന ബോട്ടുകള്‍ കത്തിനശിച്ചു

മംഗലാപുരം: ട്രാന്‍സ്‌ഫോര്‍മറില്‍ നിന്ന് തീപ്പൊരിവീണ് അഞ്ച് മത്സ്യബന്ധന ബോട്ടുകള്‍ കത്തിനശിച്ചു. മല്‍പെ പദുകരെ കടപ്പുറത്ത് ചൊവ്വാഴ്ചയാണ് സംഭവം. 40 ലക്ഷത്തോളം രൂപയുടെ നഷ്ടം കണക്കാക്കുന്നു. മത്സ്യബന്ധനബോട്ടുകള്‍ കടപ്പുറത്ത്കയറ്റിവെച്ച് ടാര്‍പോളിന്‍ കൊണ്ട് മൂടിവെച്ചതായിരുന്നു. അവിടേക്കാണ് തൊട്ടടുത്ത ട്രാന്‍സ്‌ഫോര്‍മറില്‍ നിന്ന് തീപ്പൊരിവീണ് പടര്‍ന്നത്.

നാല് വലിയ ബോട്ടുകളും ഒരു ചെറിയ ബോട്ടുമാണ് അഗ്നിക്കിരയായത്. തീ ഉയരുന്നത്കണ്ട് നാട്ടുകാരും ഫയര്‍ഫോഴ്‌സും പോലീസും ഏറെ പരിശ്രമിച്ചാണ് തീയണച്ചത്. അപ്പോഴേക്കും ബോട്ടുകളെല്ലാം കത്തിചാരമായിരുന്നു.

42 അംഗ മത്സ്യതൊഴിലാളികളുടെ ഉടമസ്ഥതയിലുള്ളതാണ് ബോട്ടുകള്‍. പ്രദേശത്ത് തദ്ദേശ ബോട്ടുകളില്‍ മത്സ്യബന്ധനം നടത്തുന്നതിന് വിലക്കുള്ളതിനാലാണ് അവ കരക്കുകയറ്റിവെച്ചിരുന്നത്. മത്സ്യത്തൊഴിളി സംഘടനാ നേതാക്കള്‍, വകുപ്പ് ഉദ്യോഗസ്ഥര്‍ തുടങ്ങിയവര്‍ സ്ഥലം സന്ദര്‍ശിച്ചു. മല്‍പെ പോലീസ് കേസെടുത്തു.