റിപബ്ലിക് ദിനത്തിലെ ട്രാക്ടര് റാലി ചരിത്ര സംഭവമാക്കാന് കര്ഷക സംഘടനകള്; ഒരു ലക്ഷം ട്രാക്ടറുകള് അണിനിരക്കും
ന്യൂഡെല്ഹി: (www.kasargodvartha.com 25.01.2021) റിപബ്ലിക് ദിനത്തിലെ ട്രാക്ടര് റാലി ചരിത്ര സംഭവമാക്കാന് കര്ഷക സംഘടനകള്. ഡെല്ഹി പിടിച്ചെടുക്കുകയല്ല, ജനങ്ങളുടെ ഹൃദയം കീഴടക്കുകയാണ് ലക്ഷ്യമെന്ന് സംയുക്ത കിസാന് മോര്ച അറിയിച്ചു. ട്രാക്ടര് പരേഡില് പാലിക്കേണ്ട നിര്ദേശങ്ങള് കര്ഷകര്ക്ക് കൈമാറി. തലസ്ഥാന നഗരത്തെ വലയംവെക്കുംവിധം 100 കിലോമീറ്റര് ദൂരത്തില് റാലി സംഘടിപ്പിക്കാനാണ് കര്ഷക സംഘടനകളുടെ തീരുമാനം. ഒരു ലക്ഷത്തോളം ട്രാക്ടറുകളുടെ പങ്കാളിത്തം ഉണ്ടാകുമെന്ന് കര്ഷക സംഘടനകള് അറിയിച്ചു. രാജ്പഥിലെ റിപബ്ലിക് ദിനാഘോഷ പരേഡ് അവസാനിച്ചാല് റാലി തുടങ്ങും. വൈകീട്ട് ആറുമണിക്ക് അവസാനിപ്പിക്കും വിധമാണ് ക്രമീകരണം.
പൊലീസ് സുരക്ഷ ഒരുക്കും. പച്ച ജാകറ്റ് അണിഞ്ഞായിരിക്കും കര്ഷകര് റാലിയില് പങ്കെടുക്കുക. അതേസമയം, ട്രാക്ടര് റാലിക്ക് നേരെ ആക്രമണമുണ്ടായേക്കുമെന്ന റിപോര്ടുകളെ തുടര്ന്ന് ഡെല്ഹിയിലും അതിര്ത്തി മേഖലകളിലും സുരക്ഷ ശക്തമാക്കി. പാക് അട്ടിമറി സംശയിക്കുന്നതിനാല് വന് സുരക്ഷാ ക്രമീകരണങ്ങള് ഡെല്ഹി അതിര്ത്തികളില് ഒരുക്കിയിട്ടുണ്ട്. ഡെല്ഹി അതിര്ത്തികളിലെ പ്രക്ഷോഭം അറുപത്തിയൊന്നാം ദിവസത്തിലേക്ക് കടന്നു.
സമരം ചെയ്യുന്നതിന് പിന്നിലെ കാരണങ്ങള് രാജ്യത്തെ ബോധ്യപ്പെടുത്താനുള്ള അവസരമായി ട്രാക്ടര് റാലിയെ മാറ്റണമെന്ന് കര്ഷക സംഘടനകള് പ്രക്ഷോഭകരോട് ആവശ്യപ്പെട്ടു. കര്ഷകര്ക്ക് കൃത്യമായ നിര്ദേശങ്ങള് സംഘടനകള് നല്കി. അക്രമത്തിന്റേതായ ഒരു പ്രവണതയും വച്ചുപൊറുപ്പിക്കില്ല. സമാധാനപൂര്വമായ ട്രാക്ടര് റാലി നടത്തുന്നതിലാണ് വിജയമിരിക്കുന്നത്. നേതാക്കളും പൊലീസും നല്കുന്ന നിര്ദേശങ്ങള് കര്ഷകര് അനുസരിക്കണം. ഒരു ദിവസത്തേക്കുള്ള ഭക്ഷണവും വെള്ളവും ട്രാക്ടറുകളില് കരുതണം. ട്രാക്ടറുകളില് ദേശീയ പതാകയും, കര്ഷക സംഘടനകളുടെ കൊടിയും മാത്രമേ അനുവദിക്കുകയുള്ളു. രാഷ്ട്രീയ പാര്ട്ടികളുടെ കൊടികള് വിലക്കി. ആയുധങ്ങളോ, പ്രകോപനപരമായ ബാനറുകളോ പാടില്ല.
Keywords: News, National, India, New Delhi, Farmer, Protest, Republic day celebrations, Rally, Top-Headlines, Police, Threat, Attack, Farmers’ organizations to make Republic Day tractor rally a historic event
