കന്നുകാലി മോഷ്ടാക്കളാണെന്നാരോപിച്ച് മര്‍ദനം; സഹോദരന്‍മാര്‍ ആശുപത്രിയില്‍

മംഗലാപുരം: കന്നുകാലി മോഷ്ടക്കളാണെന്നാരോപിച്ച് സഹോദരന്‍മാര്‍ക്ക് ക്രൂര മര്‍ദനം. കുന്താപുരം കൈക്കമ്പാടിയിലാണ് സംഭവം. മോനു സാഹിബിന്റെ മക്കളായ ബഷീര്‍ (20), ബാതിഷ (30) എന്നിവരെയാണ് ഒരു സംഘമാളുകള്‍ അടിച്ചു പരിക്കേല്‍പിച്ചത്. ഇരുവരും ഇപ്പോള്‍ ആശുപത്രിയില്‍ ചികിത്സയിലാണ്. ഇതില്‍ ബഷീറിന്റെ നില ഗുരുതരമാണ്.

രണ്ട് ദിവസം മുമ്പ് ഇവരുടെ വീട്ടിലെ എരുമയെ കാണാതായിരുന്നു. ഇതിനെ അന്വേഷിച്ചു നടക്കുന്നതിനിടയില്‍ ഒരു പറമ്പില്‍ ഇവരുടെ എരുമയെ കെട്ടിയിട്ടിരിക്കുന്നതായി കണ്ടു. ഇതിനെ വാഹനത്തില്‍ കയറ്റി കൊണ്ടുപോകുന്നതിനിടയിലായിരുന്നു മോഷ്ടാക്കളാണെന്നാരോപിച്ച് ഒരു സംഘം മര്‍ദിച്ചത്.

Basheer

Bathisha

കഴിഞ്ഞ ദിവസം തൊഴുത്തില്‍ നിന്നും കെട്ടഴിഞ്ഞ് പോയ എരുമ പുഴ നീന്തിക്കടക്കുന്നത് ശ്രദ്ധയില്‍പെട്ട വൈദ്യുതി ബോര്‍ഡ് ലൈന്‍മാനായ നരസിംഹ മൊഗാവീര ഒരു കുറ്റിയില്‍ അതിനെ കെട്ടിയിടുകയായിരുന്നു. അന്വേഷിച്ചു നടക്കുകയായിരുന്ന ബഷീറും ബാതിഷയും എരുമയെ കാണുകയും ചെയ്തു.

കെട്ടഴിച്ച് എരുമയെ കൊണ്ടുപോകാനുള്ള ശ്രമത്തിനിടയിലായിരുന്നു മര്‍ദനം. ഇതിനിടയില്‍ എരുമ തങ്ങളുടേതാണെന്ന് പലതവണ വിളിച്ചു പറഞ്ഞെങ്കിലും സംഘം കൂട്ടാക്കിയില്ല. സംഭവത്തില്‍ മോനു സാഹിബിന്റെ പരാതിയില്‍ കുന്താപുരം പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.

Also read:
പത്ത് ഇന്ത്യന്‍ പോസ്റ്റുകള്‍ക്കുനേരെ പാക് ആക്രമണം

Advertisement: