ബംഗ്ളൂരിൽ നിന്നും അഹമ്മദാബാദിലേക്ക് പുറപ്പെടാനിരുന്ന ഇൻഡിഗോ വിമാനത്തിൽ വ്യാജ ബോംബ് ഭീഷണി; ശുചിമുറിയിൽ നിന്ന് ലഭിച്ച കത്തിന് പിന്നാലെ പൊലീസ് കേസെടുത്തു

ബംഗ്ളൂരു: (KasargodVartha) അന്താരാഷ്ട്ര വിമാനത്താവളത്തിൽ നിന്നും അഹമ്മദാബാദിലേക്ക് പുറപ്പെടാൻ തയ്യാറെടുത്ത ഇൻഡിഗോ വിമാനത്തിൽ വ്യാജ ബോംബ് ഭീഷണി. സംഭവത്തിൽ പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. വ്യാഴാഴ്ച (16.7.2026) രാത്രി എട്ട് മണിക്ക് പുറപ്പെടേണ്ടിയിരുന്ന ഇൻഡിഗോയുടെ 6E-6423 വിമാനത്തിലാണ് സുരക്ഷാ ഭീഷണിയുണ്ടായത്.

ശുചിമുറിയിൽ ഭീഷണി സന്ദേശം

വിമാനം പുറപ്പെടുന്നതിന് മുൻപ് രാത്രി 7.35 ഓടെ വിമാനത്തിൻ്റെ ശുചിമുറിയിൽ നിന്നാണ് ജീവനക്കാർക്ക് ഭീഷണി നിറഞ്ഞ ഒരു കുറിപ്പ് ലഭിക്കുന്നത്. കൈപ്പടയിൽ എഴുതിയ കത്തിൽ കുറിച്ചിരുന്നത് 'ദയവായി പോകരുത്, ബോംബ് ഉണ്ട്' എന്നായിരുന്നു. കത്ത് ലഭിച്ചയുടൻ ജീവനക്കാർ വിവരം സുരക്ഷാ ഏജൻസികളെയും വിമാനത്താവള അധികൃതരെയും അറിയിക്കുകയായിരുന്നു.

ബോംബ് സ്ക്വാഡിൻ്റെ പരിശോധന

കുറിപ്പ് ശ്രദ്ധയിൽപ്പെട്ടയുടൻ യാത്രക്കാരെയും ജീവനക്കാരെയും വിമാനത്തിൽ നിന്ന് പുറത്തേക്ക് മാറ്റി. ഇതിന് ശേഷം ബോംബ് സ്ക്വാഡും സുരക്ഷാ ഉദ്യോഗസ്ഥരും വിമാനത്തിൽ വിശദമായ പരിശോധന നടത്തി. എന്നാൽ സംശയാസ്പദമായ രീതിയിൽ യാതൊന്നും കണ്ടെത്താൻ കഴിഞ്ഞില്ല. ഇതോടെയാണ് സന്ദേശം വ്യാജമാണെന്ന് സുരക്ഷാ ഉദ്യോഗസ്ഥർ സ്ഥിരീകരിച്ചത്.

എഫ് ഐ ആർ രജിസ്റ്റർ ചെയ്തു

ഭീഷണിയെ തുടർന്ന് വിമാന സർവീസ് തടസ്സപ്പെടുകയും യാത്രക്കാരുടെ സുരക്ഷയിൽ ആശങ്കയുണ്ടാക്കുകയും ചെയ്തതായി കാണിച്ച് ഇൻഡിഗോ അധികൃതർ പോലീസിൽ പരാതി നൽകി. സംഭവത്തിന് പിന്നിൽ പ്രവർത്തിച്ച വ്യക്തിയെ കണ്ടെത്തുന്നതിനായി സിസിടിവി ദൃശ്യങ്ങൾ ഉൾപ്പെടെ പരിശോധിച്ച് വിശദമായ അന്വേഷണം നടത്തണമെന്നും നിയമനടപടികൾ സ്വീകരിക്കണമെന്നും ഇൻഡിഗോ ആവശ്യപ്പെട്ടിട്ടുണ്ട്. വിമാനക്കമ്പനിയുടെ പരാതിയിൽ എഫ് ഐ ആർ രജിസ്റ്റർ ചെയ്ത പൊലീസ് അന്വേഷണം ഊർജജിതമാക്കിയിട്ടുണ്ട്.

കൂടുതല്‍ ദേശീയ വാർത്തകള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: A fake bomb threat on an Ahmedabad-bound Indigo flight from Bengaluru led to an FIR.

#IndigoAirlines #BombThreat #BengaluruAirport #AviationNews #FakeThreat #NationalNews #RenuNews