എഴുത്തുകാരന്‍ കാഞ്ച ഇളയ്യയ്‌ക്കെതിരെ വൈശ്യകളുടെ ആക്രമണം

വാറങ്കല്‍:(www.kasargodvartha.com 24.09.2017) പ്രശസ്ത എഴുത്തുകാരന്‍ കാഞ്ച ഇളയ്യയ്‌ക്കെതിരെ വൈശ്യകളുടെ ആക്രമണം. അംബേദ്കര്‍ സ്‌ക്വയറില്‍ വെച്ചാണ് സംഭവം. 200 ഓളം വരുന്ന വൈശ്യകള്‍ കാഞ്ച ഇളയ്യ സഞ്ചരിക്കുകയായിരുന്ന കാര്‍ തടഞ്ഞ് കല്ലുകളും ചെരിപ്പുകളും എറിയുകയായിരുന്നു. സംഭവ സ്ഥലത്തു നിന്നും രക്ഷപ്പെട്ട കാഞ്ച ഇളയ്യ വധശ്രമത്തിന് പോലീസില്‍ പരാതി നല്‍കി.

'വൈശ്യകള്‍ സാമൂഹിക കൊള്ളക്കാര്‍' എന്ന പുസ്തകത്തില്‍ വൈശ്യ സമുദായത്തെക്കുറിച്ച് മോശം പരാമര്‍ശം നടത്തുന്നുവെന്ന ആരോപണം ഉന്നയിച്ചാണ് കാഞ്ച ഇളയ്യയ്‌ക്കെതിരെ ആക്രമണമുണ്ടായത്. തങ്ങളെക്കുറിച്ച് മോശമായി എഴുതിയ കാഞ്ച ഇളയ്യയെ തൂക്കിക്കൊല്ലണമെന്ന ആവശ്യമുന്നയിച്ചാണ് വൈശ്യര്‍ സംഘടിച്ചെത്തിയത്.

അതേസമയം കാഞ്ച ഇളയ്യയുടെ നേരെ ഉണ്ടായ ആക്രമണത്തില്‍ പ്രതിഷേധിച്ച് നിരവധി ആളുകള്‍ പോലീസ് സ്റ്റേഷന് മുന്നില്‍ തടിച്ചുകൂടി. ആക്രമികള്‍ക്കെതിരെ എത്രയും പെട്ടെന്ന് നടപടി എടുക്കണമെന്നാവശ്യപ്പെട്ട് ഇവര്‍ ആവശ്യപ്പെട്ടു.