MLC polls | കർണാടക എംഎൽസി തിരഞ്ഞെടുപ്പ്: കോൺഗ്രസ് സ്ഥാനാർഥികളായി മുൻ മുഖ്യമന്ത്രി ജഗദീഷ് ഷെട്ടാറും മന്ത്രി ബൊസെരാജുവും തിപ്പണ്ണപ്പയും പത്രിക സമർപിച്ചു

ബെംഗ്ളുറു: (www.kasargodvartha.com) ഒഴിവു വരുന്ന കർണാടക ലെജിസ്ലേറ്റീവ് കൗൺസിൽ സീറ്റുകളിലേക്ക് കോൺഗ്രസ് സ്ഥാനാർഥികളായ മുൻ മുഖ്യമന്ത്രി ജഗദീഷ് ഷെട്ടാറും മന്ത്രി എൻ എസ് ബൊസെരാജുവും തിപ്പണ്ണപ്പ കമക്നൂറും പത്രിക സമർപിച്ചു. മൂവരുടെയും പേരുകൾക്ക് ഹൈകമാൻഡ് തിങ്കളാഴ്ച അന്തിമ അംഗീകാരം നൽകിയിരുന്നു. നിയമസഭാ സെക്രടറിയും റിടേണിംഗ് ഓഫീസറുമായ എം കെ വിശാലാക്ഷി മുമ്പാകെയാണ് നാമനിർദേശ പത്രിക നൽകിയത്. മുഖ്യമന്ത്രി സിദ്ധരാമയ്യ, ഉപമുഖ്യമന്ത്രി ഡി കെ ശിവകുമാർ, മന്ത്രിമാരായ എം ബി പാട്ടീൽ, മധു ബംഗാരപ്പ, കെ എച് മുനിയപ്പ എന്നിവർ സംബന്ധിച്ചു.

തെലങ്കാന സംസ്ഥാന ചുമതലയുള്ള എഐസിസി ജെനറൽ സെക്രടറിയാണ് 66കാരനായ ബൊസെരാജു. നിലവിൽ മന്ത്രിയായ അദ്ദേഹം സ്ഥാനത്ത് തുടരണമെങ്കിൽ സത്യപ്രതിജ്ഞ ചെയ്ത ദിവസം മുതൽ ആറു മാസത്തിനകം നിയമസഭയിലോ നിയമ കൗൺസിലിലോ അംഗമാവേണ്ടതുണ്ട്. ബാബു റാവു, ആർ ശങ്കർ, ലക്ഷ്മൺ സവാദി എന്നിവർ രാജിവെച്ച ഒഴിവുകളിലേക്കാണ് ഈ മാസം 30ന് എംഎൽസി തിരഞ്ഞെടുപ്പ് നടക്കുന്നത്. അന്നുതന്നെ ഫലപ്രഖ്യാപനവും നടക്കും.