Controversy | മുംബൈയിൽ ധാരാവി ചേരി പ്രദേശത്തെ വികസന പദ്ധതിയുമായി അദാനി ഗ്രൂപ്പ് മുന്നോട്ട്; സുപ്രീംകോടതിയുടെ വിധി നിർണായകമായി

മുംബൈ: (KasargodVartha) ചേരി പ്രദേശമായ ധാരാവിയിലെ അദാനി ഗ്രൂപ്പിന്റെ പുനർവികസന പദ്ധതി നിർത്തിവക്കാനാവില്ലെന്ന സുപ്രീംകോടതി വിധി നിർണായകമായി. ധാരാവി പുനർവികസനവുമായി ബന്ധപ്പെട്ട് ധാരാളം വിവാദങ്ങൾ ഉയർന്നുവന്നിരുന്നു. ധാരാവി പുനർവികസന പദ്ധതി റദ്ദാക്കണമെന്ന ദുബൈ ആസ്ഥാനമായ സെക്ലിങ്ക് ടെക്നോളജി കോർപ്പറേഷൻ നൽകിയ ഹർജിയാണ് ജസ്റ്റിസുമാരായ സഞ്ജീവ് ഖന്ന, എം.എം. സുന്ദരേശ് എന്നിവരടങ്ങുന്ന ബെഞ്ച് തള്ളിയത്.

കഴിഞ്ഞ ഡിസംബർ 20ലെ ബോംബെ ഹൈകോടതിവിധി ചോദ്യം ചെയ്തുള്ള ഹരജിയിലാണ് സുപ്രധാന വിധിയുണ്ടായത്. വിഷയത്തിൽ മഹാരാഷ്ട്ര സർക്കാരിൽ നിന്നും, അദാനി പ്രോപ്പർട്ടീസ് പ്രൈവറ്റ് ലിമിറ്റഡിൽ നിന്നും പ്രതികരണവും സുപ്രീംകോടതി തേടിയിട്ടുണ്ട്. ചേരി പുനർ വികസനത്തിൽ ഒട്ടേറെ കമ്പനികൾ ടെൻഡർ നൽകിയിരുന്നു. മാനദണ്ഡങ്ങൾ പാലിക്കാതെ ഇത് അദാനി ഗ്രൂപ്പിന് സർക്കാർ നൽകിയെന്നാണ് വിമർശനം ഉയർന്നത്. എന്നാൽ മുംബൈ ഹൈകോടതി അദാനി ഗ്രൂപ്പിന് നൽകിയ ടെൻഡർ ശരിവെക്കുകയും ചെയ്തു. ഇതിനെ ചോദ്യംചെയ്ത് നൽകിയ ഹരജിയിലാണ് സുപ്രീം കോടതിയുടെ നിരീക്ഷണം.

പദ്ധതിയുടെ പ്രവർത്തനങ്ങൾ ഇതിനോടകം ആരംഭിച്ചതിനാൽ തൽസ്ഥിതി തുടരാനുള്ള ഉത്തരവ് നൽകാൻ കഴിയില്ലെന്ന് കോടതി വ്യക്തമാക്കി. അദാനി ഗ്രൂപ്പിന് വേണ്ടി ഹാജരായ മുതിർന്ന അഭിഭാഷകൻ മുകുൾ റോഹ്‌തഗി, കോടിക്കണക്കിന് രൂപയുടെ യന്ത്രസാമഗ്രികൾ വാങ്ങുകയും നൂറുകണക്കിന് തൊഴിലാളികൾ സൈറ്റിൽ ജോലി ആരംഭിക്കുകയും ചെയ്തുവെന്ന് കോടതിയെ അറിയിച്ചു. സൈറ്റിലെ ഇന്ത്യൻ റെയിൽവേ ക്വാർട്ടേഴ്സുകൾ പൊളിച്ചുമാറ്റുന്ന ജോലികൾ പുരോഗമിക്കുകയാണെന്നും അദ്ദേഹം പറഞ്ഞു. പദ്ധതിയുമായി ബന്ധപ്പെട്ട എല്ലാ പണമിടപാടുകളും ഒരൊറ്റ എസ്‌ക്രോ അക്കൗണ്ടിലൂടെ നടത്തണമെന്നും, കൃത്യമായ ഇൻവോയ്‌സുകളും ബ്രോഷറുകളും സൂക്ഷിക്കണമെന്നും കോടതി അദാനി ഗ്രൂപ്പിന് നിർദ്ദേശം നൽകി.

സീലിങ്കിന് വേണ്ടി ഹാജരായ മുതിർന്ന അഭിഭാഷകൻ സി ആര്യമ സുന്ദരം, തങ്ങളുടെ 7,200 കോടിയുടെ ലേലം 20 ശതമാനം വർധിപ്പിച്ച് 8,640 കോടി രൂപയാക്കാമെന്ന് കോടതിയെ അറിയിച്ചു. പുതുക്കിയ ഓഫർ വിശദീകരിച്ച് സത്യവാങ്മൂലം സമർപ്പിക്കാൻ കോടതി അദ്ദേഹത്തോട് ആവശ്യപ്പെട്ടു. 259 ഹെക്ടർ വരുന്ന ഈ ചേരി പ്രദേശം പുതുക്കി പണിയാനുള്ള ടെൻഡർ 2022 നവംബറിലാണ് അദാനി പ്രോപ്പർട്ടീസ് നേടിയത്. 5,069 കോടി രൂപയായിരുന്നു അദാനി ഗ്രൂപ്പ് ടെൻഡറിൽ വെച്ച തുക. കൂടാതെ, റെയിൽവേക്ക് നൽകാനുള്ള 2,800 കോടി രൂപയും ചേർത്താണ് മൊത്തം 7,869 കോടി രൂപയുടെ ഉയർന്ന ലേലം അദാനി ഗ്രൂപ്പ് നേടിയത്. സുപ്രീം കോടതിയുടെ പുതിയ ഉത്തരവോടെ അദാനി ഗ്രൂപ്പിന് ഇനി പദ്ധതിയുമായി മുന്നോട്ട് പോകാനാകും.

ഈ വാർത്ത പങ്കുവെക്കാനും അഭിപ്രായങ്ങൾ രേഖപ്പെടുത്താനും മറക്കല്ലേ!

The Supreme Court has allowed the Adani Group to proceed with the Dharavi redevelopment project in Mumbai. The court rejected a petition seeking to cancel the project, stating that work had already begun. The court also asked the Adani Group to maintain transparency in all financial transactions related to the project.

#DharaviRedevelopment #AdaniGroup #SupremeCourt #Mumbai #Development #Controversy