5 വയസുകാരിയെ ക്ലാസ് മുറിയില്‍ പീഡിപ്പിച്ചു; പ്യൂണ്‍ അറസ്റ്റില്‍

ന്യൂഡല്‍ഹി: (www.kasargodvartha.com 10.09.2017) അഞ്ചു വയസുകാരിയെ ക്ലാസ് മുറിയില്‍ പീഡിപ്പിച്ച പ്യൂണിനെ പോലീസ് അറസ്റ്റു ചെയ്തു. വടക്കന്‍ ഡല്‍ഹിയില്‍ ശനിയാഴ്ചയാണ് സംഭവമുണ്ടായത്. സ്‌കൂളിലെ പ്യൂണ്‍ വികാസി (40)നെയാണ് പോലീസ് അറസ്റ്റു ചെയ്തത്. ശനിയാഴ്ച ഉച്ചയോടെ അധ്യാപകര്‍ക്ക് ഭക്ഷണം നല്‍കിയ ശേഷം കോറിഡോറിലൂടെ നടക്കുന്നതിനിടെയാണ് വികാസ് അഞ്ചു വയസുകാരിയായ കുട്ടിയെ കണ്ടത്. തുടര്‍ന്ന് പെണ്‍കുട്ടിയെ ഇയാള്‍ ആളില്ലാത്ത ക്ലാസ് മുറിയിലേക്ക് കൂട്ടിക്കൊണ്ടുപോവുകയായിരുന്നു. ഇവിടെ വെച്ചാണ് പീഡനത്തിനിരയാക്കിയത്.

വീട്ടിലെത്തിയ പെണ്‍കുട്ടി സ്വകാര്യ ഭാഗങ്ങളില്‍ നിന്ന് രക്തം വരുന്നുണ്ടെന്നും വേദനിക്കുന്നുവെന്നും വീട്ടുകാരോട് പറയുകയായിരുന്നു. ഇതിന്റെ അടിസ്ഥാനത്തില്‍ വീട്ടുകാര്‍ ആശുപത്രിയിലെത്തിക്കുകയും പരിശോധനയില്‍ കുട്ടി പീഡനത്തിനിരയായതായി കണ്ടെത്തുകയുമായിരുന്നു. തുടര്‍ന്ന് കുട്ടിക്ക് നല്‍കിയ കൗണ്‍സിലിംഗില്‍ തൊപ്പി ധരിച്ചയാള്‍ പീഡിപ്പിച്ചതായി കുട്ടി മൊഴി നല്‍കുകയും ചെയ്തു. ഇതിന്റെ അടിസ്ഥാനത്തില്‍ പോലീസ് നടത്തി അന്വേഷണത്തിലാണ് വികാസിനെ അറസ്റ്റു ചെയ്തത്.

മൂന്നു വര്‍ഷമായി സ്‌കൂളിലെ ജീവനക്കാരനാണ് വികാസ്. നേരത്തെ സ്‌കൂളിലെ സുരക്ഷാ ജീവനക്കാരനായിരുന്നു.