അയൽക്കാരിയെ വെട്ടിക്കൊന്നെന്ന കേസിൽ അച്ഛനും മകനും അറസ്റ്റിൽ; സംഭവം കേടായ തക്കാളി റോഡിൽ വലിച്ചെറിയുന്നതിനെച്ചൊല്ലിയുള്ള വഴക്കിനിടെ

മംഗ്ളുറു: (www.kasargodvartha.com 14.03.2022) കെട്ട തക്കാളി വഴിയരികിൽ എറിഞ്ഞതിന് അയൽക്കാരിയെ വെട്ടിക്കൊന്നെന്ന കേസിൽ മധ്യവയസ്കനേയും മകനേയും പൊലീസ് അറസ്റ്റ് ചെയ്തു. മൈസൂറു ജില്ലയിലെ ശിവരാജ് (57), മകൻ ഗിരീഷ് (29)എന്നിവരെ തമിഴ്നാട് ധർമപുരിയിൽ നിന്നാണ് ഉദയഗിരി പൊലീസ് സംഘം അറസ്റ്റ് ചെയ്തത്.കഴിഞ്ഞ ഫെബ്രുവരി രണ്ടിന് ക്യാത്തമറഹള്ളി വിനായക റോഡിൽ അയൽപക്കത്ത് താമസിക്കുന്ന വിജയകുമാറിന്റെ ഭാര്യ സുനിതയെ (30) ഇരുവരും ചേർന്ന് കൊന്നെന്നാണ് കേസ്.

    


പൊലീസ് പറയുന്നതിങ്ങനെ: 'സംഭവശേഷം ബെംഗ്ളൂറിലും കൂടുതൽ ദിവസങ്ങൾ കേരളത്തിൽ പലഭാഗത്തും കഴിഞ്ഞ അച്ഛനും മകനും കർണാടക ചാമരാജ നഗറിൽ തിരിച്ചെത്തി തമിഴ്നാട്ടിലേക്ക് കടക്കുകയായിരുന്നു. അക്രമം തടുക്കാൻ ശ്രമിച്ച സുനിതയുടെ മാതാവ് ഭാരതിക്ക് പരുക്കേറ്റിരുന്നു. ഭാരതി തെരുവിലും വീടിനോട് ചേർന്ന കടയിലും തക്കാളി വിൽപ്പന നടത്തുന്നുണ്ട്. റോഡിന് ഇരുവശത്ത് അഭിമുഖമായാണ് പ്രതികളുടേയും അക്രമത്തിന് ഇരയായവരുടേയും വീടുകൾ. കേടായ തക്കാളി റോഡിൽ വലിച്ചെറിയുന്നതിനെച്ചൊല്ലിയുള്ള വഴക്കിനിടെ ശിവരാജ് മകനെ പ്രകോപിപ്പിക്കുകയായിരുന്നു. നീളമുള്ള വടിവാൾ ഉപയോഗിച്ചാണ് ഇരുവരും അക്രമിച്ചത്'.

ഇൻസ്പെക്ടർ പി കെ രാജു, എസ് ഐമാരായ സുനിൽ, നാഗരാജ് നായക്, കോൺസ്റ്റബിൾമാരായ ശങ്കർ, സിദ്ദീഖ് അഹ്‌മദ്‌, സോമശേഖർ, പുട്ടരാജു, ഗോപാൽ, ആനന്ദ്, റാതോഡ്, മോഹൻകുമാർ, ശിവരാജപ്പ, സമീറ എന്നിവരടങ്ങിയ പ്രത്യേക അന്വേഷണ സംഘമാണ് പ്രതികളെ പിടികൂടിയത്.


Keywords:  Mangalore, Karnataka, News, Top-Headlines, Mysore, Arrest, Police, Murder, Murder-case, Father, Woman killed in Mysuru: two arrested. < !- START disable copy paste -->