ഫേസ് ബുക്കിലൂടെ സൗഹൃദം സ്ഥാപിച്ച് പ്രായപൂര്‍ത്തിയാകാത്ത പെണ്‍കുട്ടിയെ പീഡിപ്പിച്ചയാള്‍ അറസ്റ്റില്‍

ഉഡുപ്പി: (www.kasargodvartha.com 17.11.2014) സോഷ്യല്‍ മിഡിയയിലൂടെ സൗഹൃദം സ്ഥാപിച്ച പെണ്‍കുട്ടിയെ പീഡിപ്പിച്ച കാര്‍ ഡ്രൈവര്‍ അറസ്റ്റില്‍. കുര്‍ക്കള്‍ സ്വദേശി ഹരിഷാണ് അറസ്റ്റിലായത്.

നിരന്തരം പെണ്‍കുട്ടിയുമായി ഫേസ് ബുക്കില്‍ ചാറ്റ് ചെയ്യാറുണ്ടായിരുന്ന ഹരിഷ് നവംബര്‍ പതിമൂന്നിന് കര്‍ക്കലയില്‍ വച്ച് നേരില്‍ കാണണമെന്ന് പെണ്‍കുട്ടിയോട് ആവശ്യപ്പെട്ടു. ഇതിനെത്തുടര്‍ന്ന് ബസില്‍ കര്‍ക്കലയില്‍ എത്തിചേര്‍ന്ന പെണ്‍കുട്ടിയുമായി ഹിരിയഡുക്കയിലെ കാട്ടിലേക്ക് പുറപ്പെട്ട ഹരിഷിനെ പിന്തുടര്‍ന്ന നാട്ടുക്കാര്‍ വിവരം പോലീസില്‍ അറിയിക്കുകയും സ്ഥലത്തെത്തിയ പോലീസ് ഹരിഷിനെ അറസ്റ്റ് ചെയ്യുകയുമായിരുന്നു. പ്രതിയെ പതിനഞ്ച് ദിവസത്തെ ജുഡിഷ്യല്‍ കസ്റ്റഡിയില്‍ വിട്ടു.

ഇതിനുമുമ്പും നിരവധി തവണ പെണ്‍കുട്ടിയുമായി ശാരീരികബന്ധത്തിലേര്‍പ്പെട്ടിരുന്നതായി ചോദ്യം ചെയ്യലില്‍ പ്രതി സമ്മതിച്ചിട്ടുണ്ട്. പെണ്‍കുട്ടിയെ വൈദ്യപരിശോധനയ്ക്ക് വിധേയമാക്കി.