Tragedy | ബേലൂരിൽ കെട്ടിടം തകർന്ന് രണ്ട് മരണം; 3 പേർക്ക് പരിക്ക്

മംഗ്ളുറു: (KasargodVartha) ഹാസന് അടുത്ത ബേലൂരിൽ ഞായറാഴ്ച വൈകുന്നേരം പഴയ കെട്ടിടം തകർന്ന് വീണ് രണ്ടുപേർ മരിക്കുകയും മൂന്നുപേർക്ക് ഗുരുതരമായി പരിക്കേൽക്കുകയും ചെയ്തു. ബേലൂർ ബസ് സ്റ്റാൻഡിന് സമീപമുള്ള വ്യാപാര കേന്ദ്രമാണ് തകർന്നത്. അവശിഷ്ടങ്ങൾക്കിടയിൽ കുടുങ്ങിയവരെ അഗ്നിരക്ഷാ സേനയും പൊലീസും നാട്ടുകാരും ചേർന്നാണ് പുറത്തെടുത്തത്. അമർനാഥ് (42), നസീർ (48) എന്നിവരാണ് ദാരുണമായി മരിച്ചത്. ഇവർ കെട്ടിടത്തിന്റെ അവശിഷ്ടങ്ങൾക്കിടയിൽ കുടുങ്ങിപ്പോയിരുന്നു. നീലമ്മ, ജ്യോതി, ശിൽപ്പ എന്നിവർക്കാണ് ഗുരുതരമായി പരിക്കേറ്റത്. ഇവരെ അടുത്തുള്ള ആശുപത്രിയിൽ പ്രവേശിപ്പിച്ചു.

75 വർഷം പഴക്കമുള്ള ഈ കെട്ടിടത്തിൽ നാല് കടമുറികൾ ഉണ്ടായിരുന്നു. എന്നാൽ കഴിഞ്ഞ കുറേ വർഷങ്ങളായി ഇവ അടച്ചിട്ടിരിക്കുകയായിരുന്നു. എങ്കിലും, പഴം, പച്ചക്കറി, പൂവ് എന്നിവ വിൽക്കുന്ന ചെറുകച്ചവടക്കാർ കെട്ടിടത്തിന്റെ മുൻവശത്ത് സ്ഥാപനങ്ങൾ ഇട്ടിരുന്നു. കെട്ടിടം തകർന്നുവീണപ്പോൾ ഇവരാണ് അപകടത്തിൽപ്പെട്ടത്. കെട്ടിടം തകർന്ന വിവരം അറിഞ്ഞയുടൻ പൊലീസും അഗ്നിരക്ഷാസേനയും അടിയന്തര സേവന വിഭാഗവും സ്ഥലത്തെത്തി രക്ഷാപ്രവർത്തനം ആരംഭിച്ചു. അവശിഷ്ടങ്ങൾക്കിടയിൽ കുടുങ്ങിക്കിടക്കുന്നവരെ രക്ഷിക്കാനുള്ള ശ്രമങ്ങൾ ഏറെനേരം തുടർന്നു.

ബേലൂർ എം.എൽ.എ എച്ച്.കെ സുരേഷ് സ്ഥലം സന്ദർശിച്ചു. അപകടസ്ഥലം പരിശോധിച്ച ശേഷം പഴയ കെട്ടിടത്തിന് സമീപം കടകൾ സ്ഥാപിക്കാൻ അനുമതി നൽകിയ ബേലൂർ ടൗൺ മുനിസിപ്പൽ കൗൺസിൽ ഉദ്യോഗസ്ഥരെ അദ്ദേഹം വിമർശിച്ചു. ഉദ്യോഗസ്ഥരുടെ അനാസ്ഥയാണ് അപകടത്തിന് കാരണമെന്ന് എം.എൽ.എ കുറ്റപ്പെടുത്തി. ഉന്നത ഉദ്യോഗസ്ഥരും സ്ഥലം സന്ദർശിച്ചു.

Two people died and three were injured when an old building collapsed in Belur near Hassan. The collapsed building was a commercial center near the Belur bus stand. MLA criticized the officials for negligence.

#BelurCollapse, #BuildingCollapse, #Tragedy, #KarnatakaNews, #Accident, #Negligence