ഫോൺ സംഭാഷണത്തിനിടെ ഭീഷണി, പിറ്റേന്ന് രാവിലെ ജീവനറ്റ ശരീരം; നിഷാനയ്ക്ക് സംഭവിച്ചത് എന്ത്? യുവതിയുടെ ദുരൂഹമരണത്തിൽ ഭർതൃപിതാവും മാതാവും അടക്കം 3 പേർ അറസ്റ്റിൽ

മംഗളൂരു: (KasargodVartha) സുള്ള്യ സംപാജെയിൽ വിവാഹിതയായ യുവതിയെ ഭർതൃവീട്ടിൽ മരിച്ച നിലയിൽ കണ്ടെത്തിയ സംഭവത്തിൽ ദുരൂഹതയേറുന്നു. കേസിൽ യുവതിയുടെ ഭർതൃപിതാവ്, ഭർതൃമാതാവ്, ഭർത്താവിന്റെ സഹോദരി എന്നിവരെ സുള്ള്യ പൊലീസ് അറസ്റ്റ് ചെയ്തു. സംപാജെ സ്വദേശിനിയായ ഫാത്തിമത്ത് നിഷാന എന്ന യുവതിയാണ് ഭർതൃഗൃഹത്തിൽ ദുരൂഹ സാഹചര്യത്തിൽ മരണപ്പെട്ടത്. 

കേസിൽ സി പി അലവി (54), ഭാര്യ ആയിഷ സി എ, ഇവരുടെ മകൾ ഫസീലാ സി എ (29) എന്നിവരെയാണ് പൊലീസ് അറസ്റ്റ് ചെയ്തത്. സംഭവത്തിൽ ദുരൂഹമരണത്തിനും ഗാർഹിക പീഡനത്തിനും കേസെടുത്താണ് പൊലീസ് അന്വേഷണം പുരോഗമിക്കുന്നത്.

നാല് വർഷം മുൻപാണ് ഫാത്തിമത്ത് നിഷാനയും അലവിയുടെ മകനുമായി വിവാഹം നടന്നത്. വിവാഹത്തിന്റെ ആദ്യ നാളുകൾക്ക് ശേഷം ഭർതൃവീട്ടിൽ വച്ച് യുവതിക്ക് കടുത്ത മാനസികവും ശാരീരികവുമായ പീഡനങ്ങൾ നേരിടേണ്ടി വന്നിരുന്നതായി മരണപ്പെട്ട യുവതിയുടെ മാതാവ് പുത്തൂർ കേദുംബാടി സ്വദേശിനി സുബൈദ നൽകിയ പരാതിയിൽ വ്യക്തമാക്കുന്നു. 

ചെറിയ കാര്യങ്ങൾക്ക് പോലും ഭർതൃമാതാവും സഹോദരിയും ചേർന്ന് നിഷാനയെ നിരന്തരം ഉപദ്രവിച്ചിരുന്നുവെന്നും ഭർത്താവിന്റെയും കുടുംബത്തിന്റെയും അറിവോടെയും ഒത്താശയോടെയുമാണ് മാനസികമായി തകർത്തുകളയുന്ന തരത്തിലുള്ള ആക്രമണങ്ങൾ തുടർച്ചയായി നടന്നതെന്നുമാണ് വീട്ടുകാരുടെ ആരോപണം.

മരണത്തിന് തലേദിവസം,  ജൂലൈ 18-ന് രാത്രി ഫാത്തിമത്ത് നിഷാന തനിക്ക് നേരിടേണ്ടി വന്ന കടുത്ത പീഡനങ്ങളെക്കുറിച്ച് വിങ്ങിപ്പൊട്ടിക്കൊണ്ട് തന്നോട് ഫോണിൽ വിളിച്ചു പറഞ്ഞിരുന്നുവെന്ന് മാതാവ് സുബൈദ പറയുന്നു. 

'സംഭാഷണത്തിനിടയിൽ രോഷാകുലനായി എത്തിയ ഭർതൃപിതാവ് അലവി നിഷാനയുടെ കയ്യിൽ നിന്നും ഫോൺ ബലമായി പിടിച്ചെടുക്കുകയായിരുന്നു. തുടർന്ന് 'നിന്റെ മകളെ ഞാൻ കൊന്നു കളയും' എന്ന് ഫോണിലൂടെ ഉച്ചത്തിൽ ഭീഷണിപ്പെടുത്തിയ ശേഷം കോൾ വിച്ഛേദിച്ചു. ഇതിൽ പരിഭ്രാന്തരായ ബന്ധുക്കൾ പിറ്റേദിവസം രാവിലെ നിഷാനയുടെ ഭർതൃവീട്ടിൽ എത്തിയപ്പോൾ  യുവതി ജീവനറ്റ നിലയിൽ കിടക്കുന്നതാണ് കണ്ടത്', ബന്ധുക്കൾ ആരോപിച്ചു.

തുടർന്ന് ബന്ധുക്കൾ സുള്ള്യ പൊലീസ് സ്റ്റേഷനിൽ എത്തി പരാതി നൽകുകയായിരുന്നു. പരാതിയുടെ അടിസ്ഥാനത്തിൽ പൊലീസ് സ്ഥലത്തെത്തി പ്രാഥമിക മഹസ്സർ തയ്യാറാക്കുകയും മൃതദേഹം പോസ്റ്റ്‌മോർട്ടത്തിനായി താലൂക്ക് ആശുപത്രിയിലേക്ക് മാറ്റുകയും ചെയ്തു. ശാസ്ത്രീയ അന്വേഷണസംഘവും ഫോറൻസിക് വിദഗ്ദ്ധരും സംഭവസ്ഥലത്തെത്തി തെളിവുകൾ ശേഖരിച്ചു. പരാതിയിൽ നൽകിയിട്ടുള്ള തെളിവുകളുടെയും ഫോൺ രേഖകളുടെയും പ്രാഥമിക പരിശോധനയ്ക്ക് ശേഷമാണ് പ്രതികളായ മൂന്ന് പേരുടെയും അറസ്റ്റ് പൊലീസ് രേഖപ്പെടുത്തിയത്.

യുവതി ജീവനൊടുക്കിയതാണോ അതോ ഭർതൃവീട്ടുകാർ ചേർന്ന് കൊലപ്പെടുത്തിയതാണോ എന്ന കാര്യത്തിൽ പൊലീസിന് ഇപ്പോഴും സംശയങ്ങൾ നിലനിൽക്കുന്നുണ്ട്. മരണത്തിൽ മറ്റാരെങ്കിലും പങ്കാളികളായിട്ടുണ്ടോ എന്ന കാര്യവും പൊലീസ് പരിശോധിച്ച് വരികയാണ്. വിശദമായ പോസ്റ്റ്‌മോർട്ടം റിപ്പോർട്ടും ഫോറൻസിക് പരിശോധനാ ഫലവും ലഭിച്ച ശേഷമേ മരണത്തിന്റെ കൃത്യമായ കാരണം വ്യക്തമാകൂ എന്ന് സുള്ള്യ പൊലീസ് ഉദ്യോഗസ്ഥർ അറിയിച്ചു.

ഈ ക്രൈം വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതല്‍ വാർത്തകള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Three including in-laws were arrested after a woman was found dead in Sullia.

#SulliaNews #MangaluruPolice #CrimeNewsMalayalam #DomesticViolenceCase #KeralaNews #LocalNewsMalayalam #RenuNews