NIA investigation | മംഗ്ളുറു കുകർ സ്ഫോടനം: കേസിലെ പ്രതിയുമായി എൻഐഎ ഷിവമോഗ്ഗയിൽ

മംഗ്ളുറു: (www.kasargodvartha.com) കഴിഞ്ഞ നവംബർ 19ന് മംഗ്ളുറു കങ്കനാടി പൊലീസ് സ്റ്റേഷൻ പരിധിയിൽ ഓടോറിക്ഷയിൽ പ്രഷർ കുകർ പൊട്ടിത്തെറിച്ച സംഭവത്തിലെ പ്രതി എച് മുഹമ്മദ് ശാരിഖിനെ എൻഐഎ സംഘം തെളിവെടുപ്പിനായി ബുധനാഴ്ച ഷിവമോഗ്ഗയിൽ കൊണ്ടുവന്നു. ബെംഗ്ളൂറു ആശുപത്രിയിൽ ചികിത്സ കഴിഞ്ഞ് തിങ്കളാഴ്ച പുറത്തിറങ്ങിയ ശാരിഖിനെ എൻഐഎ പ്രത്യേക കോടതി 10 ദിവസം അന്വേഷണ ഏജൻസിയുടെ കസ്റ്റഡിയിൽ വിട്ടതിനെത്തുടർന്നാണിത്.

ആഗോള ഭീകര പ്രവർത്തനവുമായി ബന്ധമുള്ള സ്ഫോടനമാണ് മംഗ്ളൂറിൽ നടന്നതെന്നാണ് എൻഐഎ അന്വേഷണത്തിൽ കണ്ടെത്തിയത്. ഓടോറിക്ഷയിൽ യാത്രക്കാരനായിരുന്നു ശാരിഖ്. ബികോം ബിരുദ ധാരിയായ യുവാവ് ഓൺലൈൻ ബിസിനസ് രംഗത്താണ് പ്രവർത്തിച്ചത്. കുകർ സ്ഫോടനത്തിന് ആഗോള ഭീകര പ്രവർത്തന ബന്ധമുള്ളതായി കർണാടക പൊലീസിന് തെളിവുകൾ ലഭിച്ചിട്ടില്ലെന്ന് ക്രമസമാധാന ചുമതലയുള്ള എഡിജിപി അലോക് കുമാറിനെ ഉദ്ധരിച്ച് ഉദയവാണി പത്രം റിപോർട് ചെയ്തു.