മംഗളൂരു റെയിൽവേ മേഖലയുടെ കൈമാറ്റം; സേവനങ്ങൾ തടസ്സപ്പെടാതിരിക്കാൻ പാലക്കാട്–മൈസൂരു ഡിആർഎംമാരുടെ നിർണായക ചർച്ച

-കുഞ്ഞിക്കണ്ണൻ മുട്ടത്ത്

കാസർകോട്: (KasargodVartha) 2026 ഒക്ടോബർ 1 മുതൽ മംഗളൂരു മേഖലയിലെ റെയിൽവേ അധികാരപരിധിയിൽ മാറ്റം വരുന്നതിൻ്റെ പശ്ചാത്തലത്തിൽ ട്രെയിൻ സർവീസുകളും റെയിൽവേ പ്രവർത്തനങ്ങളും തടസ്സപ്പെടാതെ മുന്നോട്ടുകൊണ്ടുപോകുന്നതിനുള്ള നടപടികൾ മംഗളൂരുവിൽ ചേർന്ന യോഗം ചർച്ച ചെയ്തു.

ദക്ഷിണ റെയിൽവേയുടെ പാലക്കാട് ഡിവിഷൻ ഡിവിഷണൽ റെയിൽവേ മാനേജർ മധുകർ റാവത്തും ദക്ഷിണ പശ്ചിമ റെയിൽവേയുടെ മൈസൂരു ഡിവിഷൻ ഡിആർഎം മുടിത് മിത്തലും തമ്മിലാണ് ചർച്ച നടത്തിയത്. മംഗളൂരുവിൻ്റെ അധികാര കൈമാറ്റം യാത്രക്കാരെ ബാധിക്കാതിരിക്കാൻ റെയിൽവേ ബോർഡ് നിർദേശങ്ങൾ നൽകിയിട്ടുണ്ട്.

ഏകോപനം ലക്ഷ്യം

അധികാരപരിധിയിലെ മാറ്റം പ്രാബല്യത്തിൽ വരുമ്പോൾ ട്രെയിൻ സർവീസുകൾ സാധാരണ നിലയിൽ തുടരുന്നതിനായി ആവശ്യമായ മുന്നൊരുക്കങ്ങളും ഏകോപന നടപടികളും പൂർത്തിയാക്കുമെന്ന് റെയിൽവേ അറിയിച്ചു. മെക്കാനിക്കൽ, ഇലക്ട്രിക്കൽ, ഓപ്പറേഷൻസ്, കൊമേഴ്സ്യൽ, എൻജിനീയറിങ് തുടങ്ങിയ വിഭാഗങ്ങളിലെ ഉദ്യോഗസ്ഥരും ഇരു ഡിവിഷനുകളിലെ ഡിആർഎംമാരോടൊപ്പം യോഗത്തിൽ പങ്കെടുത്തു.

ട്രെയിൻ സർവീസുകളുടെ നടത്തിപ്പ്, റെയിൽവേ ആസ്തികൾ, രേഖകൾ, നിയന്ത്രണ സംവിധാനങ്ങൾ, ജീവനക്കാരുടെ വിന്യാസം എന്നിവ യോഗത്തിൽ ചർച്ചയായി. പുതിയ ട്രെയിനുകൾ അനുവദിക്കുന്നതിനും അടിസ്ഥാന സൗകര്യ വികസനത്തിനും ഈ ഏകോപനം സഹായകമാകുമെന്നാണ് പ്രതീക്ഷിക്കുന്നത്.

മംഗളൂരിലെ സൗകര്യങ്ങൾ ഉപയോഗിക്കും

അധികാരപരിധി മാറിയാലും മംഗളൂരു മേഖലയിലെ നിലവിലുള്ള റെയിൽവേ അടിസ്ഥാന സൗകര്യങ്ങൾ തുടർന്നും പ്രയോജനപ്പെടുത്തുന്നതിനുള്ള സാധ്യതയും ചർച്ചയിൽ ഉയർന്നു. ട്രെയിൻ അറ്റകുറ്റപ്പണിക്കും പരിപാലനത്തിനുമായി പാലക്കാട് ഡിവിഷൻ മംഗളൂരുവിൽ ഒരുക്കിയിട്ടുള്ള സൗകര്യങ്ങൾ ഒഴിവാക്കുന്നത് ട്രെയിൻ സർവീസുകളെ ബാധിക്കാനിടയുണ്ട്.

മംഗളൂരു മേഖലയിലെ കോച്ചിങ് സൗകര്യങ്ങൾ ഉപയോഗിച്ചാണ് പാലക്കാട് ഡിവിഷൻ കേരളത്തിലേക്കും തമിഴ്നാട്ടിലേക്കുമായി ഓടിക്കുന്ന ഇരുപതോളം ജോഡി ട്രെയിനുകളുടെ പരിപാലനം നിർവഹിച്ചിരുന്നത്. ഷൊർണൂർ ജങ്ഷനിലുള്ള നിലവിലെ സൗകര്യങ്ങൾ മാത്രം ഉപയോഗിച്ച് ഇത്രയും ട്രെയിനുകളുടെ പരിപാലനം നടത്തുന്നത് പ്രായോഗികമായി ബുദ്ധിമുട്ടാകുമെന്നാണ് വിലയിരുത്തൽ.

അതിനാൽ പുതിയ കോച്ചിങ് സൗകര്യങ്ങൾ പാലക്കാട് ഡിവിഷൻ്റെ അധികാരപരിധിയിൽ സജ്ജമാകുന്നതുവരെ മംഗളൂരുവിലെ സൗകര്യങ്ങൾ ഉപയോഗിക്കാൻ മൈസൂരു ഡിവിഷനോട് സമയം ആവശ്യപ്പെട്ടതായാണ് സൂചന. നിലവിലുള്ള അടിസ്ഥാന സൗകര്യങ്ങൾ പരമാവധി പ്രയോജനപ്പെടുത്തണമെന്ന നിലപാടാണ് മൈസൂരു ഡിവിഷനും സ്വീകരിച്ചതെന്നാണ് വിവരം.

ബാലസ്റ്റ് ഡിപ്പോയും ജീവനക്കാരുടെ വിന്യാസവും

മംഗളൂരു ബന്തർ മേഖലയിലെ ഗുഡ്സ് ഷെഡ് ഉപയോഗപ്പെടുത്തി പാലക്കാട് ഡിവിഷൻ അടുത്തിടെ സ്ഥാപിച്ച ബാലസ്റ്റ് ഡിപ്പോയും അധികാരപരിധി മാറ്റവുമായി ബന്ധപ്പെട്ട വിഷയമാണ്. വടക്കൻ കേരളത്തിലെ റെയിൽവേ പാതകളുടെ അറ്റകുറ്റപ്പണികൾക്കും നിർമാണ പ്രവർത്തനങ്ങൾക്കും ആവശ്യമായ ബാലസ്റ്റ് എത്തിക്കുന്നതിൽ ഈ ഡിപ്പോ പങ്ക് വഹിക്കുന്നുണ്ട്.

ബന്തറിൽ നിന്ന് ബാലസ്റ്റ് ഡിപ്പോ മാറ്റി പാലക്കാട് ഡിവിഷൻ്റെ പുതിയ അധികാരപരിധിയിൽ മറ്റൊരു സംവിധാനം ഒരുക്കുന്നതിനും സമയം ആവശ്യമാണ്. അതുവരെ നിലവിലുള്ള ഡിപ്പോ ഉപയോഗിക്കാൻ അനുവദിക്കണമെന്ന ആവശ്യവും ചർച്ചയിലുണ്ട്.

അധികാരപരിധി മാറ്റത്തിൻ്റെ ഭാഗമായി നിലവിലുള്ള ജീവനക്കാർക്ക് ദക്ഷിണ റെയിൽവേയിൽ തുടരണമോ, ദക്ഷിണ പശ്ചിമ റെയിൽവേയിൽ ചേരണമോ എന്ന കാര്യത്തിൽ തിരഞ്ഞെടുക്കാൻ അവസരം നൽകുമെന്ന് ഡിആർഎംമാർ വ്യക്തമാക്കി. റെയിൽവേ ബോർഡ് നിശ്ചയിച്ചിട്ടുള്ള ചട്ടങ്ങളും നടപടിക്രമങ്ങളും പാലിച്ചായിരിക്കും ജീവനക്കാരുടെ വിന്യാസം നടത്തുക.

സംഘടനകളുടെ ആശങ്ക

യോഗത്തിന് ശേഷം സതേൺ റെയിൽവേ മസ്ദൂർ യൂണിയൻ , ദക്ഷിണ റെയിൽവേ എംപ്ലോയീസ് സംഘ് പ്രതിനിധികളും ഇരു ഡിവിഷനുകളിലെ ഉദ്യോഗസ്ഥരുമായി കൂടിക്കാഴ്ച നടത്തി. അധികാരപരിധി മാറുന്നതിനെ തുടർന്ന് ജീവനക്കാരെ സ്ഥലംമാറ്റാനുള്ള സാധ്യത സംബന്ധിച്ച ആശങ്കകൾ സംഘടനാ പ്രതിനിധികൾ അറിയിച്ചു.

എന്നാൽ ട്രെയിൻ സർവീസുകൾ തടസ്സമില്ലാതെ നടത്താൻ നിലവിലുള്ള ജീവനക്കാരുടെ സേവനം ഇരു ഡിവിഷനുകൾക്കും ആവശ്യമാണ്. അതിനാൽ ജീവനക്കാർക്ക് ദക്ഷിണ റെയിൽവേയിലോ ദക്ഷിണ പശ്ചിമ റെയിൽവേയിലോ തുടരുന്നതിനുള്ള അവസരം നൽകുമെന്ന് മുതിർന്ന റെയിൽവേ ഉദ്യോഗസ്ഥർ സംഘടനാ പ്രതിനിധികളെ അറിയിച്ചു. ജീവനക്കാരുടെ അവകാശങ്ങൾ സംരക്ഷിച്ചുകൊണ്ട് ഭരണപരമായ മാറ്റം നടപ്പിലാക്കാനാണ് റെയിൽവേ അധികൃതർ ശ്രമിക്കുന്നത്.

ഈ റെയിൽവേ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതല്‍ വാർത്തകള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. 

Article Summary: Mangaluru rail zone transfers to Mysuru division on October 1, 2026.

#KasargodVartha #MangaluruRailway #PalakkadDivision #MysuruDivision #SouthernRailway #KeralaNews #RenuNews