Demand | മംഗ്ളുറു റെയിൽവേ സ്റ്റേഷൻ പാലക്കാട് ഡിവിഷനിൽ നിന്ന് മാറ്റി മൈസൂറിൽ ലയിപ്പിക്കണമെന്ന് ദക്ഷിണ കന്നഡ ലോക്‌സഭയിൽ

മംഗ്ളുറു: (KasargodVartha) ദക്ഷിണ റെയിൽവേയുടെ കീഴിലുള്ള മംഗ്ളുറു സെൻട്രൽ റെയിൽവേ സ്റ്റേഷൻ മൈസൂരു ആസ്ഥാനമായ സൗത്ത് വെസ്റ്റേൺ റെയിൽവേ ഡിവിഷനിൽ ലയിപ്പിക്കണമെന്ന് ദക്ഷിണ കന്നഡ എംപി ബ്രിജേഷ് ചൗട്ട ലോക്സഭയിൽ ആവശ്യപ്പെട്ടു. ദീർഘകാലമായി കന്നടിഗർ ഉന്നയിക്കുന്ന ആവശ്യമാണിത്. മംഗ്ളുറു റെയിൽവേ സ്റ്റേഷൻ പാലക്കാട് ഡിവിഷനിൽ നിന്ന് വേർപ്പെടുത്തി മൈസൂരുവിൽ ലയിപ്പിക്കുന്നത് റെയിൽവേയുടെ കാര്യക്ഷമത വർദ്ധിപ്പിക്കുമെന്നും മികച്ച ഏകോപനം സാധ്യമാകുമെന്നും അദ്ദേഹം കൂട്ടിച്ചേർത്തു.

മൈസൂരു ഡിവിഷന്റെ ഭാഗമാവുന്നതോടെ അടിസ്ഥാന സൗകര്യ വികസനം ഉറപ്പുവരുത്താൻ സാധിക്കും. ഇത് യാത്രക്കാർക്ക് കൂടുതൽ സൗകര്യങ്ങൾ ഒരുക്കുന്നതിന് സഹായിക്കും. ഗതാഗത ചെലവ് കുറക്കുന്നതിനും വ്യാപാര കാര്യക്ഷമത മെച്ചപ്പെടുത്തുന്നതിനും ന്യൂ മംഗ്ളുറു തുറമുഖത്തിനും ബംഗളൂരുവിനും ഇടയിൽ ഒരു പ്രത്യേക ചരക്ക് ഇടനാഴി സ്ഥാപിക്കണം. കൊങ്കൺ റെയിൽവേ കോർപറേഷൻ ലിമിറ്റഡ് ഇന്ത്യൻ റെയിൽവേയുമായി ലയിപ്പിച്ച് അതിന്റെ സാമ്പത്തിക പരിമിതികളും 2,589 കോടി രൂപയുടെ കടബാധ്യതയും ലഘൂകരിക്കാൻ കഴിയുമെന്നും അദ്ദേഹം ആവശ്യപ്പെട്ടു.

മംഗ്ളുറു റെയിൽവേ സ്റ്റേഷൻ മൈസൂരു ഡിവിഷനിലേക്ക് മാറ്റുന്നതിലൂടെ കൂടുതൽ വികസന പ്രവർത്തനങ്ങൾ സാധ്യമാവുമെന്നും അദ്ദേഹം അഭിപ്രായപ്പെട്ടു. ഇതിലൂടെ കന്നടനാടിന്റെ തീരപ്രദേശങ്ങളിലേക്കുള്ള റെയിൽവേ ഗതാഗതം കൂടുതൽ മെച്ചപ്പെടുത്താൻ സാധിക്കുമെന്നും എംപി ചൂണ്ടിക്കാട്ടി.

ഈ വാർത്തയെ കുറിച്ച് നിങ്ങളുടെ അഭിപ്രായങ്ങൾ കമന്റുകളായി രേഖപ്പെടുത്തുക.

South Kannada MP demands the transfer of Mangalore Railway Station from Palakkad Division to Mysore Division in Lok Sabha, aiming for better efficiency and development.

#MangaloreRailway, #MysoreDivision, #SouthKannada, #RailwayDevelopment, #IndianRailways, #Transportation