Rescued | തട്ടിക്കൊണ്ടുപോയ സ്‌കൂൾ വിദ്യാർഥിയെ പൊലീസിന്റെ സഹായത്തിൽ രക്ഷപ്പെടുത്തി; 2 പേർ അറസ്റ്റിൽ; ആവശ്യപ്പെട്ടത് 10 ലക്ഷം രൂപ

മംഗ്ളുറു: (www.kasargodvartha.com) തട്ടിക്കൊണ്ട് പോയ സ്‌കൂൾ വിദ്യാർഥിയെ പൊലീസ് രക്ഷപ്പെടുത്തി. രണ്ട് പേരെ അറസ്റ്റ് ചെയ്തു. കർണാടക കലബുറഗിയിലാണ് സംഭവം നടന്നത്. ജനുവരി നാലിന് നാലാം ക്ലാസ് വിദ്യാർഥിയായ കുട്ടിയെ പ്രതികൾ തട്ടിക്കൊണ്ടുപോയി മാതാപിതാക്കളിൽ നിന്ന് 10 ലക്ഷം രൂപ ആവശ്യപ്പെട്ടെന്നാണ് കേസ്. കലബുറഗി ജില്ലയിലെ അരുൺ ഭജന്ത്രി, ലക്ഷ്മണ ഭജന്ത്രി എന്നിവരാണ് അറസ്റ്റിലായത്. സംഭവം സ്‌കൂളിൽ പോകുന്ന കുട്ടികളുള്ള രക്ഷിതാക്കളിൽ ആശങ്കയുണ്ടാക്കിയിരുന്നു.
  
പൊലീസ് പറയുന്നത് ഇങ്ങനെ: സിദ്ധേശ്വര കോളനിയിൽ താമസക്കാരനും അധ്യാപകനുമായ ഗുരുനാഥ് റാത്തോഡിന്റെ മകൻ സുദർശനെയാണ് സ്‌കൂളിൽ പോകുമ്പോൾ പ്രതികൾ തട്ടിക്കൊണ്ടുപോയത്. കുട്ടി വീട്ടിൽ നിന്ന് ഇറങ്ങി സ്കൂൾ ബസ് കാത്തുനിൽക്കുകയായിരുന്നു. ആശുപത്രിയുടെ വിലാസം ചോദിക്കാനെന്ന വ്യാജേന ഓടോറിക്ഷയിൽ എത്തിയ പ്രതികൾ കുട്ടിയുമായി സംസാരിക്കുകയും തട്ടിക്കൊണ്ടുപോകുകയുമായിരുന്നു.

പ്രതികൾ പിന്നീട് കുട്ടിയുടെ പിതാവിനെ വിളിച്ച് 10 ലക്ഷം രൂപ ആവശ്യപ്പെടുകയും വിസമ്മതിച്ചാൽ മകനെ കൊല്ലുമെന്ന് ഭീഷണിപ്പെടുത്തുകയും ചെയ്തു. പൊലീസിൽ അറിയിക്കരുതെന്നും മുന്നറിയിപ്പ് നൽകി.