Bravery | നഗരം ഉറങ്ങുമ്പോൾ ജീവനും കൊണ്ട് മൻഷിദ ബാനു സ്വന്തം സ്‌കൂട്ടറിൽ കുതിച്ചു; കയ്യടി നേടി പൊലീസ് കോൺസ്റ്റബിളിന്റെ ധീരത

മംഗ്ളുറു: (KasargodVartha) വനിതാ പൊലീസ് കോൺസ്റ്റബിൾ മൻഷിദ ബാനുവിന്റെ ധീരതയ്ക്ക് സമൂഹമാകെ അഭിനന്ദനവുമായി രംഗത്ത്. ബുധനാഴ്ച പുലർച്ചെ, കർണാടക ഗവ. പോളിടെക്നിക് കോളേജ് പരിസരത്തുണ്ടായ വാഹനാപകടത്തിൽ പെട്ട ഒരാളുടെ ജീവൻ രക്ഷിച്ചത് മൻഷിദയാണ്.

പുലർച്ചെ മൂന്നേകാലിന്, കണ്ടെയ്നർ ലോറി പിക്കപ്പ് വാനുമായി കൂട്ടിയിടിച്ചാണ് ക്ലീനർക്ക് പരുക്കേറ്റത്. അതിനിടെ കദ്രി പൊലീസ് സ്റ്റേഷനിലേക്ക് അപകട വിവരം അറിയിച്ച് ഫോൺവിളി വന്നു.

അന്ത്യയാമത്തിൽ, പലരും അത്തരം അടിയന്തര സന്ദേശങ്ങൾ അവഗണിക്കുകയോ വൈകി പ്രതികരിക്കുകയോ പതിവാണ്. എന്നാൽ മൻഷിദ അങ്ങനെ ചെയ്തില്ല. പൊലീസ് വാഹനം ആവശ്യപ്പെടുക പോലും ചെയ്യാതെ, തന്റെ സ്വന്തം സ്കൂട്ടറിൽ തന്നെ അപകടസ്ഥലത്തേക്ക് പാഞ്ഞെത്തി. 

പരുക്കേറ്റയാളെ സുരക്ഷിതമായി സ്കൂട്ടറിൽ ഇരുത്തി അടുത്തുള്ള ആശുപത്രിയിലേക്ക് ഓടിച്ചു. ഡോക്ടർമാർ പറയുന്നതനുസരിച്ച്, മൻഷിദ അല്പം കൂടി വൈകിയെങ്കിൽ അയാളുടെ ജീവൻ നഷ്ടപ്പെടുമായിരുന്നു. മൻഷിദയുടെ ഈ ധീരമായ പ്രവൃത്തിക്ക് മംഗളൂരു സിറ്റി പൊലീസ് കമ്മീഷണർ അനുപം അഗർവാൾ അഭിനന്ദനം അറിയിച്ചു. 

സമൂഹ മാധ്യമങ്ങളിലും മൻഷിദയെ പുകഴ്ത്തുന്ന പോസ്റ്റുകൾ നിറഞ്ഞു. പൊലീസ് ഉദ്യോഗസ്ഥർ തങ്ങളുടെ കർത്തവ്യം എത്രത്തോളം ഉത്തരവാദിത്തത്തോടെ നിർവഹിക്കണം എന്നതിന് മൻഷിദ ഒരു ഉദാഹരണമായി മാറിയിരിക്കുന്നുവെന്നാണ് നെറ്റിസൻസിന്റെ പ്രതികരണം.  മൻഷിദയുടെ പ്രവൃത്തി, ധൈര്യത്തിന്റെയും മനുഷ്യത്വത്തിന്റെയും ഉദാഹരണമായാണ് അവർ ചൂണ്ടിക്കാട്ടുന്നത്.

#police #bravery #rescue #accident #Karnataka #Mangaluru #hero #selflessact