Missing | വിവാഹത്തിന് തൊട്ടുമുമ്പ് വരനെ കാണാതായി!

മംഗ്ളുറു:  (KasargodVartha) വിവാഹത്തിന് തൊട്ടുമുമ്പ് വരനെ കാണാതായി. ഉപ്പുണ്ട സ്വദേശിയും ഭട്കൽ അലിവ് കോടിയിലെ യുവാവും തമ്മിലുള്ള വിവാഹമാണ് അവസാന നിമിഷത്തിൽ റദ്ദായത്. ഒരു സ്വകാര്യ കംപനിയിൽ ജോലി ചെയ്യുന്ന വരൻ രണ്ടു കുടുംബങ്ങളുടെയും സമ്മതത്തോടെ വിവാഹത്തിന് സമ്മതിച്ചിരുന്നു.

ഓഗസ്റ്റ് 18-ന് വരന്റെ വീട്ടിൽ മെഹന്ദി ചടങ്ങിനുള്ള ഒരുക്കങ്ങൾ നടന്നുവരികയായിരുന്നു. സ്വർണക്കടയിൽ നിന്ന് ആവശ്യമായ സ്വർണാഭരണങ്ങൾ വാങ്ങിയ വരൻ 20,000 രൂപ കടയിൽ ബാക്കി നൽകാനുണ്ടായിരുന്നുവെന്നാണ് പറയുന്നത്. കുറച്ച് വസ്തുക്കൾ കൂടി വാങ്ങാനുണ്ട് എന്നു പറഞ്ഞ് മൊബൈൽ ഫോണും സ്വർണവളയും വീട്ടിൽ വച്ചുപോയി വരൻ പുറത്തുപോയതായി ബന്ധുക്കൾ പറയുന്നു.

തിരിച്ചെത്താത്തതിനെ തുടർന്ന് ആശങ്കയിലായ വീട്ടുകാർ യുവാവിനെ വിവിധയിടങ്ങളിൽ തിരഞ്ഞു. പിന്നീടാണ് കാണാതായതായി മനസിലായത്. യുവാവിന് മാനസിക പ്രയാസങ്ങൾ ഉണ്ടായിരുന്നുവെന്ന് സുഹൃത്തുക്കൾ പറഞ്ഞു. വരനെ കാണാതായ വിവരം അറിഞ്ഞതോടെ വിവാഹത്തിന് എത്തിയവർ തിരിച്ചുപോയി. പൊലീസ് കൂടുതൽ അന്വേഷണം നടത്തിവരികയാണ്.
 

#missingperson #wedding #mangaluru #india #mentalhealth #police