കാപ്പിത്തോട്ടത്തിൽ ഒറ്റപ്പെട്ട പിഞ്ചുകുഞ്ഞിനെ വളർത്തുനായ് കണ്ടെത്തി: രണ്ടു ദിവസത്തെ തിരച്ചിലിന് ശുഭകരമായ അന്ത്യം

മംഗളൂരു: (KasargodVartha) കുടക് വീരാജ്പേട്ട കൊങ്കണ ഗ്രാമത്തിലെ കാപ്പിത്തോട്ടത്തിൽ രാപ്പകൽ ഒറ്റപ്പെട്ട പിഞ്ചുകുഞ്ഞിനെ വളർത്തുനായ് കണ്ടെത്തി. മാതാപിതാക്കളും നാട്ടുകാരും വനപാലകരും അരിച്ചുപെറുക്കിയിട്ടും ചെന്നെത്താത്ത തോട്ടത്തിന്റെ മധ്യഭാഗത്ത് നിന്നാണ് രണ്ടു വയസുകാരി സുനന്യയെ 'ഓറിയോ' എന്ന നായ് മണംപിടിച്ചു കയറി കണ്ടെത്തിയത്.

ശാരി ഗണപതിയുടെ ഉടമസ്ഥതയിലുള്ള തോട്ടത്തിൽ ജോലി ചെയ്യുന്ന സുനിലിന്റെയും നാഗിനിയുടെയും മകളാണ് സുനന്യ. കഴിഞ്ഞ ദിവസം ജോലി കഴിഞ്ഞ് മൊബൈൽ ഫോണിൽ ശ്രദ്ധിച്ചിരുന്ന നാഗിനി, ഇരുട്ട് വീണിട്ടും മകൾ അരികിൽ നിന്ന് പോയത് അറിഞ്ഞില്ല. സുനിൽ മകളെ കാണാഞ്ഞ് തിരക്കിയിറങ്ങിയെങ്കിലും കണ്ടെത്താനായില്ല. ഗ്രാമീണരും വനപാലകരും ചേർന്ന് അന്വേഷണം വ്യാപിപ്പിച്ചെങ്കിലും ഫലമുണ്ടായില്ല.

തുടർന്നാണ് വളർത്തുനായ്ക്കളെ തിരച്ചിലിനായി ഉപയോഗിച്ചത്. കാണാതായ കുഞ്ഞ് ഉപയോഗിച്ച ഉടുപ്പിന്റെ മണം പിടിച്ച് അവ കാപ്പിത്തോട്ടങ്ങളിൽ അലഞ്ഞു. അനിൽ കലപ്പ എന്നയാളുടെ 'ഓറിയോ' എന്ന വളർത്തുനായ് ഒടുവിൽ ലക്ഷ്യത്തിലെത്തി. തോട്ടത്തിന്റെ മധ്യഭാഗത്ത് ക്ഷീണിച്ച് ഇഴഞ്ഞുനീങ്ങുകയായിരുന്ന സുനന്യയുടെ അടുത്തേക്ക് ഓറിയോ എത്തുകയായിരുന്നു.

രാപ്പകലുകൾ തോട്ടത്തിൽ കഴിഞ്ഞതിന്റെ ക്ഷീണവും പരിഭ്രമവുമല്ലാതെ കുട്ടിയുടെ ദേഹത്ത് പരിക്കുകൾ ഉണ്ടായിരുന്നില്ല. സുനന്യയെ മാതാവ് വാരിപ്പുണർന്ന നിമിഷത്തിൽ നാട് ഒന്നടങ്കം രക്ഷകനായ നായയെ അരുമയോടെ തലോടി.

വളർത്തുനായ് രക്ഷകനായ ഈ വാർത്ത നിങ്ങൾക്ക് എങ്ങനെ തോന്നുന്നു? കമൻ്റ് ചെയ്യുക. സുഹൃത്തുക്കൾക്ക് പങ്കുവെക്കൂ. 

Article Summary: Pet dog 'Oreo' found a 2-year-old girl lost for two days in a Kodagu coffee plantation.

#Kodagu #DogHero #MissingChild #CoffeePlantation #RescueDog #Oreo