സ്‌കൗട്സ് ആൻഡ് ഗൈഡ്‌സ് പരിപാടിക്ക് യാത്രാ സൗകര്യം ഒരുക്കാനുള്ള ചുമതല കർണാടക ആർടിസിക്ക്; ഡിസംബർ 26 മുതൽ 28 വരെ കാസർകോട് - മംഗ്ളുറു അന്തർസംസ്ഥാന പാതയിൽ ബസ് സർവീസിനെ ബാധിക്കും; യാത്രക്കാർ സഹകരിക്കണമെന്ന് അധികൃതർ

മംഗ്ളുറു: (www.kasargodvartha.com) മൂഡബിദ്രി ആൽവാസ് കോളജിൽ നടക്കുന്ന സ്‌കൗട്സ് ആൻഡ് ഗൈഡ്‌സ് ജംബോറി പരിപാടിയിൽ പങ്കെടുക്കാൻ രാജ്യത്തിന്റെ വിവിധ ഭാഗങ്ങളിൽ വരുന്ന ആയിരക്കണക്കിന് വിദ്യാർഥികൾക്കും രക്ഷിതാക്കൾക്കും അധ്യാപകർക്കും യാത്രാ സൗകര്യം ഒരുക്കാനുള്ള ചുമതല കർണാടക ആർടിസിക്ക്. ഇതിന്റെ ഫലമായി ഡിസംബർ 26 മുതൽ 28 വരെ കാസർകോട് - മംഗ്ളുറു അന്തർസംസ്ഥാന പാതയിൽ കെഎസ്‌ആർടിസി ബസ് സർവീസിനെ ബാധിക്കുമെന്ന് അധികൃതർ അറിയിച്ചു. ധർമ്മസ്ഥല, ഉപ്പിനങ്ങാടി, സുബ്രഹ്മണ്യ, എന്നിവിടങ്ങളിലേക്കുള്ള കെഎസ്‌ആർടിസി ബസ് സർവീസുകൾക്കും നിയന്ത്രണം ഉണ്ടാവും.
        
കർണാടക റോഡ് ട്രാൻസ്‌പോർട് കോർപറേഷനോടും (KSRTC) നോർത് വെസ്റ്റേൺ കർണാടക റോഡ് ട്രാൻസ്‌പോർട് കോർപറേഷനോടും (NWKRTC) ഡിസംബർ 27 വരെ നടക്കുന്ന പരിപാടിക്കായി ബസുകൾ ഒരുക്കാൻ നിർദേശിച്ചിട്ടുണ്ട്. പങ്കെടുക്കുന്നവരെ വിവിധ സ്ഥലങ്ങളിലേക്കും റെയിൽവേ സ്റ്റേഷനുകളിലേക്കും മറ്റും എത്തിക്കേണ്ട ചുമത്ത കെഎസ്ആർടിസി വഹിക്കും.
              

കാസർകോട് അടക്കം പോകുന്ന ബസുകൾക്ക് റൂട് മാറ്റം വരുത്തിയതായി കെഎസ്ആർടിസി മംഗ്ളുറു ഡിവിഷനിലെ സീനിയർ ട്രാഫിക് കൺട്രോളറുടെ വാർത്താകുറിപ്പിൽ പറയുന്നു. ഇക്കാര്യത്തിൽ പൊതുജനങ്ങളുടെ സഹകരണം കെഎസ്ആർടിസി ഡിവിഷണൽ കൺട്രോളർ അഭ്യർഥിച്ചു.