അഷ്റഫ്, അബ്ദുറഹ്മാൻ വധം: കെപിസിസി ജനറൽ സെക്രട്ടറി ഉൾപ്പെടെയുള്ളവർ രാജിവെച്ചു; മംഗളൂരു കോൺഗ്രസിൽ പ്രതിസന്ധി

മംഗളൂരു: (KasargodVartha) കർണാടകത്തിലെ ഭരണകക്ഷിയായ കോൺഗ്രസിന്റെ ദക്ഷിണ കന്നട ജില്ലയിലെ നിരവധി മുസ്ലീം നേതാക്കളും പ്രധാന ഭാരവാഹികളും വ്യാഴാഴ്ച കൂട്ടത്തോടെ തങ്ങളുടെ സ്ഥാനങ്ങൾ രാജിവെച്ചു. 

മലപ്പുറം വേങ്ങര സ്വദേശി അഷ്റഫിന്റെ ആൾക്കൂട്ടക്കൊലപാതകം, ചൊവ്വാഴ്ച നടന്ന അബ്ദുറഹ്മാന്റെ കൊലപാതകം തുടങ്ങിയ സംഭവങ്ങളോട് സർക്കാർ സംവിധാനങ്ങൾ സ്വീകരിക്കുന്ന നിലപാടിൽ പ്രതിഷേധിച്ചാണ് നേതാക്കളുടെ കൂട്ടരാജി.

കെപിസിസി ജനറൽ സെക്രട്ടറി എം.എസ്. മുഹമ്മദ്, ദക്ഷിണ കന്നട ജില്ലാ കോൺഗ്രസ് ന്യൂനപക്ഷ സെൽ പ്രസിഡന്റ് കെ.കെ. ഷാഹുൽ ഹമീദ് എന്നിവരുടെ നേതൃത്വത്തിലാണ് രാജി പ്രഖ്യാപനം നടന്നത്. മംഗളൂരു ബോളാറിലെ ഷാദി മഹൽ ഓഡിറ്റോറിയത്തിൽ ചേർന്ന അടിയന്തര യോഗത്തിൽ, പാർട്ടി പ്രവർത്തകർ നേതാക്കൾക്ക് രാജിക്ക് മേൽ സമ്മർദ്ദം ചെലുത്തുകയായിരുന്നു.

കഴിഞ്ഞ മാസം 27ന് ഒരു മലയാളി യുവാവിനെ ആൾക്കൂട്ടം മർദ്ദിച്ച് കൊലപ്പെടുത്തിയ സംഭവത്തിൽ പോലീസും ഭരണകൂടവും സ്വീകരിച്ച സമീപനം, അബ്ദുറഹ്മാന്റെ കൊലപാതകത്തിലും ആവർത്തിക്കുകയാണെന്ന് നഗരത്തിലെയും പരിസരങ്ങളിലെയും വിവിധ തൊഴിൽ മേഖലകളിൽ നിന്നുള്ള പ്രവർത്തകർ രോഷത്തോടെ ആരോപിച്ചു.

മുഖ്യമന്ത്രിയുമായി സംസാരിച്ചെന്നും, പ്രശ്നപരിഹാരത്തിന് അദ്ദേഹം സമയം ആവശ്യപ്പെട്ടെന്നും നേതാക്കൾ അറിയിച്ചെങ്കിലും, പ്രവർത്തകർ ശാന്തരാവാതെ കൂടുതൽ പ്രകോപിതരായി വേദിയിലേക്ക് ഇരച്ചുകയറി. സമുദായത്തോടൊപ്പം നിൽക്കണമെന്നാവശ്യപ്പെട്ട് മുദ്രാവാക്യങ്ങൾ ഉയർന്നു. ഈ സാഹചര്യത്തിൽ നേതാക്കൾ വഴങ്ങുകയും പ്രവർത്തകർ ശാന്തരാവുകയും ചെയ്തു.

ബൂത്ത് തല പ്രവർത്തകർ മുതൽ ജില്ലാ, സംസ്ഥാന ഭാരവാഹികൾ വരെയുള്ള കോൺഗ്രസ് നേതാക്കളും പ്രവർത്തകരും യോഗത്തിൽ പങ്കെടുത്തു. കെപിസിസി ജനറൽ സെക്രട്ടറി എം.എസ്. മുഹമ്മദ്, കെ.കെ. ഷാഹുൽ ഹമീദ്, മുൻ കോർപ്പറേഷൻ കൗൺസിലർ അബ്ദുൽ റൗഫ്, സുഹൈൽ കണ്ടക് തുടങ്ങിയവർ സംസാരിച്ചു. 

സുഹൈൽ കണ്ടക് ആണ് ആദ്യം രാജി പ്രഖ്യാപിച്ചത്. തുടർന്ന് ഷാഹുൽ ഹമീദ്, എം.എസ്. മുഹമ്മദ് തുടങ്ങിയ നേതാക്കൾ ഓരോരുത്തരായി പാർട്ടി സ്ഥാനങ്ങളിൽ നിന്ന് രാജി അറിയിച്ചു. ഈ കൂട്ടരാജി കോൺഗ്രസ് നേതൃത്വത്തിനും സംസ്ഥാന സർക്കാരിനുമുള്ള ശക്തമായ സന്ദേശമാണെന്ന് സമ്മേളനം പ്രഖ്യാപിച്ചു.

അഷ്റഫ് വധത്തെത്തുടർന്ന് മംഗളൂരിൽ എത്തിയ കോൺഗ്രസ് മുസ്ലീം നേതാക്കൾ, സർക്യൂട്ട് ഹൗസിൽ ആഭ്യന്തര മന്ത്രി ഡോ. ജി. പരമേശ്വരനെ വളഞ്ഞ് പോലീസ്, ഭരണകൂട നിലപാടുകളോടുള്ള പ്രതിഷേധം അറിയിച്ചിരുന്നു.

കോൺഗ്രസ് നേതാക്കളുടെ രാജി രാഷ്ട്രീയത്തിൽ എന്ത് മാറ്റങ്ങൾ വരുത്തും? ഇത്തരം സംഭവങ്ങൾ ആവർത്തിക്കാതിരിക്കാൻ എന്ത് നടപടികൾ സ്വീകരിക്കണം? ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.
 

Article Summary: Congress Muslim leaders resigned in Mangalore protesting government stance.

#MangalorePolitics, #CongressResignations, #MuslimLeaders, #KarnatakaGovernment, #Protest, #PoliticalCrisis.