തിരുവനന്തപുരത്തെ കുപ്രസിദ്ധ ഗുണ്ട കാതില്‍ കമ്മലിട്ട സുനി കാസര്‍കോട്ട് അറസ്റ്റില്‍

By Desk DeltaJun 19, 2014, 12:31 IST

കാസര്‍കോട്: (www.kasargodvartha.com 19.06.2014) തിരുവനന്തപുരത്തെ വിറപ്പിച്ച കുപ്രസിദ്ധ ഗുണ്ട കാതില്‍ കമ്മലിട്ട സുനി എന്ന ബിജു (39) കാസര്‍കോട്ട് അറസ്റ്റിലായി. തിരുവനന്തപുരം തുമ്പ മംഗ്ലാവില്‍ വീട്ടില്‍ മുടിയിറക്ക് ബിജു എന്നുകൂടി വിളിപ്പേരുള്ള ബിജുവിനെ ബേഡകത്തുവെച്ചാണ് ബേഡകം എസ്.ഐ. അനന്തന്‍, കാസര്‍കോട് ഡി.വൈ.എസ്.പിയുടെ സ്‌ക്വാഡ് അംഗങ്ങളായ പ്രദീപ് ചവറ, സുനില്‍ അബ്രഹാം, പി.വി. ഷാജു, സിനീഷ് സിറിയക്ക് എന്നിവര്‍ ചേര്‍ന്ന് അറസ്റ്റുചെയ്തത്.

തിരുവനന്തപുരത്ത് 19 ഓളം ക്രിമിനല്‍ കേസുകളില്‍ പ്രതിയാണ് ബിജുവെന്ന് പോലീസ് പറഞ്ഞു. ഒരുകൊലക്കേസിലും 12 ഓളം വെട്ടുകേസിലും ബിജു ഉള്‍പെട്ടിട്ടുള്ളതായാണ് വിവരം. ശ്രീകാര്യത്ത് ബോംബേറ് കേസിലും, പേട്ടയില്‍ വധശ്രമക്കേസിലും പ്രതിയാണ്. ഈ രണ്ട് സ്റ്റേഷനുകളിലും ബിജുവിനെതിരെ വാറണ്ട് നിലനില്‍ക്കുന്നുണ്ട്. 2007ല്‍ വഞ്ചിയൂര്‍ കോടതിയില്‍ ഹാജരാക്കാന്‍ കൊണ്ടുപോകുമ്പോള്‍ പോലീസിനെ വെട്ടിച്ചുകടന്നുകടന്ന കാതില്‍ കമ്മലിട്ട സുനി കാസര്‍കോട് ബേഡകം ചുള്ളിയില്‍ ഒരു ദളിത് യുവതിയെ വിവാഹംകഴിച്ച് ബേഡകത്ത് തന്നെ താമസിച്ചുവരികയായിരുന്നു. ബേഡകത്തെ കല്‍പണയിലാണ് ജോലിചെയ്തുവന്നിരുന്നത്.

ഇതിനിടയില്‍ കല്‍പണയില്‍ നിന്നും കല്ലുകൊണ്ടുപോയി ഇറക്കുന്ന ഒരു വീട് നേരത്തെ കണ്ടുവെച്ച് അവിടെ ഉറങ്ങിക്കിടക്കുകയായിരുന്ന ഒരു കുട്ടിയുടെ ഒന്നര പവന്റെ മാല രാത്രിയില്‍ കവര്‍ചചെയ്ത കേസിലാണ് സുനി എന്ന ബിജു അറസ്റ്റിലായത്. കൂടുതല്‍ ചോദ്യംചെയ്തപ്പോഴാണ് തിരുവനന്തപുരത്തെ വിറപ്പിച്ച കുപ്രസിദ്ധ ഗുണ്ടയാണെന്ന് വ്യക്തമായത്. കവര്‍ചചെയ്ത സ്വര്‍ണം തിരുവനന്തപുരത്ത് വിറ്റതായി പ്രതി പോലീസിനോട് സമ്മതിച്ചു. പ്രതിയെ വ്യാഴാഴ്ച വൈകീട്ടോടെ കോടതിയില്‍ ഹാജരാക്കുമെന്ന് പോലീസ് പറഞ്ഞു.