Arrested | കട കുത്തിത്തുറന്ന് അരലക്ഷത്തോളം രൂപയുടെ ചോക്ലേറ്റ് മോഷ്ടിച്ച കേസിൽ 3 പേർ അറസ്റ്റിൽ; പിടിയിലായവരിൽ പ്രായപൂർത്തിയാകാത്ത കൗമാരക്കാരനും!

കാഞ്ഞങ്ങാട്: (KasargodVartha) കട കുത്തിതുറന്ന് അരലക്ഷത്തോളം രൂപയുടെ ചോക്ലേറ്റ് മോഷ്ടിച്ച കേസിൽ പ്രായപൂർത്തിയാകാത്ത കൗമാരക്കാരൻ ഉൾപെടെ മൂന്ന് പേർ അറസ്റ്റിൽ. ഹൊസ്ദുർഗ് പൊലീസ് സ്റ്റേഷൻ പരിധിയിലെ ഫസല്‍ റഹ്‌മാന്‍ (19), ബി വിവിഷ് (19) എന്നിവരും 17 കാരനുമാണ് പിടിയിലായത്. സംഘത്തിൽ പെട്ടതായി പറയുന്ന ആസിഫ് (23) എന്ന യുവാവിന് വേണ്ടി പൊലീസ് തിരച്ചിൽ നടത്തിവരികയാണ്. ഇയാൾ ഗോവയിലേക്ക് കടന്നതായാണ് സംശയിക്കുന്നത്.
ജനുവരി 14നാണ് കാഞ്ഞങ്ങാട് കോട്ടച്ചേരി ആക്‌സസ് ബാങ്കിന് സമീപത്തെ മൊണാര്‍ക് എന്റര്‍പ്രൈസസിന്റെ ഷടര്‍ തകര്‍ത്ത് അകത്ത് കടന്ന് വിലകൂടിയ ഡയറി മില്‍കിന്റെ സില്‍ക് ചോക്ലേറ്റ് മോഷ്ടിച്ചത്. 42,430 രൂപയുടെ ചോക്ലേറ്റും വലിപ്പിലുണ്ടായിരുന്ന 1,680 രൂപയുമാണ് നഷ്ടമായത്. സമീപത്തെ തുണിക്കടയിലെ സിസിടിവിയില്‍ പതിഞ്ഞ ദൃശ്യങ്ങളാണ് കേസ് അന്വേഷണത്തിൽ നിർണായകമായത്.