Down Syndrome | ലോക ഡൗൺ സിൻഡ്രോം ദിനം കാസർകോട്ട് ആചരിച്ചു; എന്താണിത്?

 കാസർകോട്: (KasargodVartha) ലോക ഡൗൺ സിൻഡ്രോം ദിനം ജില്ലയിൽ വിപുലമായ പരിപാടികളോടെ ആചരിച്ചു. ഇന്ത്യൻ അക്കാദമി ഓഫ് പീഡിയാട്രിക്സ് (ഐഎപി) കാസർകോട് ഘടകത്തിന്റെയും വിവിധ ആശുപത്രികളുടെയും സാമൂഹിക സംഘടനകളുടെയും നേതൃത്വത്തിൽ ബോധവൽക്കരണ ക്ലാസുകൾ, കലാപരിപാടികൾ, സമ്മാനദാനങ്ങൾ എന്നിവ സംഘടിപ്പിച്ചു. ഡൗൺ സിൻഡ്രോമിനെക്കുറിച്ച് അവബോധം നൽകുക, രോഗബാധിതരായ കുട്ടികളെയും അവരുടെ കുടുംബങ്ങളെയും പിന്തുണയ്ക്കുക എന്ന ലക്ഷ്യത്തോടെയാണ് പരിപാടികൾ നടന്നത്.

കാസർകോട് ജനറൽ ആശുപത്രിയിലെ പരിപാടികൾ ശ്രദ്ധേയമായി

ഇന്ത്യൻ അക്കാദമി ഓഫ് പീഡിയാട്രിക്സ് കാസർകോട്  ബ്രാഞ്ചിന്റെയും കാസർകോട്  ജനറൽ ആശുപത്രിയുടെയും ബി.ആർ.സി കാസർകോടിന്റെയും സംയുക്താഭിമുഖ്യത്തിൽ ലോക ഡൗൺ സിൻഡ്രോം ദിനം ആശുപത്രിയിലെ പീഡിയാട്രിക് ഡിപ്പാർട്ട്മെന്റിൽ വെച്ച് ആചരിച്ചു. ആശുപത്രി സൂപ്രണ്ട് ഡോ. ശ്രീകുമാർ മുകുന്ദൻ പരിപാടി ഉദ്ഘാടനം ചെയ്തു. 

സ്റ്റാഫ് കൗൺസിൽ പ്രസിഡന്റ് ഡോ. ഷെറീന പി.എ അധ്യക്ഷത വഹിച്ചു. ഡെപ്യൂട്ടി സൂപ്രണ്ട് ഡോ. ജമാൽ അഹമ്മദ് എ, ഡോ. വാസന്തി കെ, ഡോ. ഷഹാന കെ.ടി, സ്പെഷ്യൽ സ്കൂൾ ടീച്ചർ നീനു, ബി.ആർ.സി അംഗം ഫിലോമിന ടീച്ചർ, നഴ്സിംഗ് സൂപ്രണ്ട് ലത, ജെ.പി.എച്ച്.എൻ സ്കൂൾ ടീച്ചർ സബിത എന്നിവർ സംസാരിച്ചു. കുട്ടികളുടെ പെയിന്റിംഗ് മത്സരം, കലാപരിപാടികൾ, സമ്മാനദാനം എന്നിവയും നടന്നു. 

ഐഎപി കാസർകോടിന്റെ വിവിധ കേന്ദ്രങ്ങളിലെ ബോധവൽക്കരണ ക്ലാസുകൾ

ഐഎപി കാസർകോട് യുണൈറ്റഡ് മെഡിക്കൽ സെന്ററിൽ ഡൗൺ സിൻഡ്രോം ബോധവൽക്കരണ പരിപാടി സംഘടിപ്പിച്ചു. ഐഎപി സെക്രട്ടറി ഡോ. മാഹിൻ പി. അബ്ദുല്ല ബോധവൽക്കരണ ക്ലാസ് നയിച്ചു. ഡൗൺ സിൻഡ്രോം രോഗികളുടെ കുടുംബങ്ങൾ ആരോഗ്യം, വിദ്യാഭ്യാസം, ജോലി തുടങ്ങിയ മേഖലകളിൽ അനുഭവിക്കുന്ന ബുദ്ധിമുട്ടുകളെക്കുറിച്ചും ചടങ്ങിൽ ചർച്ച ചെയ്തു. ഡൗൺ സിൻഡ്രോം ബാധിച്ചവരെയും അവരുടെ കുടുംബങ്ങളെയും സഹായിക്കാൻ ആവശ്യമായ നടപടികൾ സ്വീകരിക്കണമെന്ന് ഐഎപി കാസർകോട് സർക്കാരിനോട് അഭ്യർത്ഥിച്ചു. 

ജില്ലാ സഹകരണ ആശുപത്രിയിൽ ഐഎപി കാസർകോട് ലോക ഡൗൺസ് സിൻഡ്രോം ബോധവൽക്കരണ ക്ലാസ് നടത്തി. ഐഎപി കാസർകോട് പ്രസിഡന്റ് ഡോ. കെ ദിവാകര റായ് ഡൗൺസ് സിൻഡ്രോമിനെക്കുറിച്ച്  ക്ലാസ് എടുത്തു. ഹെഡ് നഴ്‌സ് സരസ്വതി സ്വാഗതം പറഞ്ഞു. 

ഐഎപി കാസർകോട് വിൻടച്ച് മൾട്ടിസ്പെഷ്യാലിറ്റി ആശുപത്രിയിലും ഡൗൺ സിൻഡ്രോം അവബോധ പരിപാടി സംഘടിപ്പിച്ചു. ഡോ. നജ്യ നസ്രിൻ, ഡോ. ഉദയ് ശ്രീനിവാസൻ എന്നിവർ ബോധവൽക്കരണ ക്ലാസുകൾ നയിച്ചു. 

അക്കര ഫൗണ്ടേഷൻ സെന്ററിൽ ക്ലാസ് സംഘടിപ്പിച്ചു 

മുളിയാർ കോട്ടൂരിലെ അക്കര ഫൗണ്ടേഷൻ സെന്റർ ഫോർ ചൈൽഡ് ഡെവലപ്‌മെന്റിൽ ലോക ഡൗൺ സിൻഡ്രോം ദിനം ആചരിച്ചു. ഡോ. ഹംസ കുട്ടി ക്ലാസ് എടുത്തു. കുട്ടികൾക്കായി മൊമെന്റോകൾ, ടി-ഷർട്ടുകൾ, ലഘുഭക്ഷണങ്ങൾ എന്നിവ വിതരണം ചെയ്തു.

എന്താണ് ഡൗൺ സിൻഡ്രോം? അറിയേണ്ടതെല്ലാം

ഡൗൺ സിൻഡ്രോം എന്നത് ഒരു ജനിതക അവസ്ഥയാണ്. സാധാരണയായി ഒരു വ്യക്തിക്ക് 23 ജോഡി ക്രോമസോമുകൾ (ആകെ 46) ഉണ്ടാകും. എന്നാൽ ഡൗൺ സിൻഡ്രോം ഉള്ളവരിൽ 21-ാമത്തെ ജോഡിയിൽ ഒരു അധിക ക്രോമസോം കൂടി ഉണ്ടാകുന്നു (ആകെ 47). ഇത് അവരുടെ ശാരീരികവും മാനസികവുമായ വളർച്ചയെ ബാധിക്കുന്നു. ഡൗൺ സിൻഡ്രോം ഉള്ളവർക്ക് ബുദ്ധിപരമായ വൈകല്യമുണ്ടാകാനും ചില ആരോഗ്യപ്രശ്നങ്ങൾ കൂടുതലായി കാണാനും സാധ്യതയുണ്ട്. 

ലോകമെമ്പാടുമുള്ള ഡൗൺ സിൻഡ്രോം ബാധിച്ച പലർക്കും ആവശ്യമായ പിന്തുണ ലഭിക്കുന്നില്ലെന്നും അവരുടെ അവകാശങ്ങൾ സംരക്ഷിക്കപ്പെടണമെന്നും വിദഗ്ധർ അഭിപ്രായപ്പെടുന്നു. ഡൗൺ സിൻഡ്രോം ബാധിച്ച വ്യക്തികളെ സമൂഹത്തിൽ ഉൾപ്പെടുത്തുന്നതിനും അവർക്ക് മെച്ചപ്പെട്ട ജീവിതം നയിക്കുന്നതിനും ആവശ്യമായ പിന്തുണ നൽകേണ്ടത് അത്യാവശ്യമാണ്.
 

ലക്ഷണങ്ങൾ

താഴ്ന്ന പേശീബലം, ചെറിയ ശരീരം, മുകളിലേക്ക് ചരിഞ്ഞ കണ്ണുകൾ, പരന്ന മൂക്ക്, ചെറിയ ചെവികൾ, വായിൽ നാവിൻ്റെ തടസം എന്നിവ സാധാരണ ലക്ഷണങ്ങളാണ്. കൂടാതെ ബുദ്ധിപരമായ വെല്ലുവിളികളും ഉണ്ടാകാം.

ചികിത്സ

ഡൗൺ സിൻഡ്രോമിന് പ്രത്യേക ചികിത്സയില്ല. എന്നിരുന്നാലും, ശരിയായ പരിചരണവും പിന്തുണയും നൽകുന്നതിലൂടെ കുട്ടിയുടെ ജീവിതനിലവാരം മെച്ചപ്പെടുത്താൻ സാധിക്കും.

ഫിസിയോതെറാപ്പി: പേശീബലം വർദ്ധിപ്പിക്കുന്നതിനും ശാരീരിക വികാസം പ്രോത്സാഹിപ്പിക്കുന്നതിനും.

സ്പീച്ച് തെറാപ്പി: ആശയവിനിമയ കഴിവുകൾ മെച്ചപ്പെടുത്തുന്നതിന്.

വിദ്യാഭ്യാസ പിന്തുണ: പ്രത്യേക വിദ്യാഭ്യാസ പരിപാടികളിലൂടെ പഠന വൈകല്യങ്ങളെ മറികടക്കാൻ സഹായിക്കുന്നു.

വൈദ്യ പരിശോധനകൾ: ഹൃദയസംബന്ധമായ പ്രശ്നങ്ങൾ, കേൾവിക്കുറവ് തുടങ്ങിയ ആരോഗ്യ പ്രശ്നങ്ങൾ നേരത്തേ കണ്ടെത്തി ചികിത്സിക്കുന്നതിന്.

പ്രതിരോധം

ഡൗൺ സിൻഡ്രോം ഒരു ജനിതക അവസ്ഥയായതിനാൽ, ഇതിനെ പൂർണ്ണമായും പ്രതിരോധിക്കാൻ സാധ്യമല്ല. എന്നിരുന്നാലും, ഗർഭാവസ്ഥയിൽ നടത്തുന്ന ജനിതക പരിശോധനകളിലൂടെ ഈ അവസ്ഥ നേരത്തേ കണ്ടെത്താൻ സാധിക്കും.

ഡൗൺ സിൻഡ്രോം ബാധിച്ച കുട്ടികൾക്കും അവരുടെ കുടുംബങ്ങൾക്കും പിന്തുണയും അവബോധവും നൽകുന്നതിനായി എല്ലാ വർഷവും മാർച്ച് 21 ലോക ഡൗൺ സിൻഡ്രോം ദിനമായി ആചരിക്കുന്നു.

ഈ വാർത്ത പങ്കുവെക്കുകയും അഭിപ്രയങ്ങൾ രേഖപ്പെടുത്തുകയും ചെയ്യുക 

World Down Syndrome Day was observed in Kasaragod by the Indian Academy of Pediatrics, Kasaragod General Hospital, and BRC Kasaragod. The event aimed to raise awareness about Down Syndrome, a genetic condition caused by an extra copy of chromosome 21, leading to physical and intellectual challenges. Early detection through prenatal genetic testing and providing proper care and support can improve the quality of life for individuals with Down Syndrome.

#WorldDownSyndromeDay, #DownSyndromeAwareness, #Kasaragod, #GeneticDisorder, #Inclusion, #Support