Wild Boar | കൃഷിക്കും ജീവനും ഭീഷണിയായി കാട്ടുപന്നി; മുള്ളേരിയയിൽ യുവതിക്ക് നേരെയുണ്ടായത് കടുത്ത ആക്രമണം; സർകാർ അനാസ്ഥയെന്ന് എൻ എ നെല്ലിക്കുന്ന് എംഎൽഎ

മുള്ളേരിയ: (KasargodVartha) കൃഷിക്കും ജീവനും ഭീഷണിയായി കാട്ടുപന്നികളുടെ വിഹാരം. വനാതിർത്തിയോട് ചേർന്ന ഭൂരിഭാഗം പ്രദേശത്തും രാപകൽ വ്യത്യാസമില്ലാതെ പന്നിയുടെ സാന്നിധ്യമുണ്ട്. കൃഷിക്കാർ രാത്രിയിൽ കാവലിരുന്നിട്ടും പണം മുടക്കി വേലികൾ നിർമിച്ചിട്ടും ദുരിതത്തിന് അവസാനമില്ലാത്ത അവസ്ഥയാണ്. ജീവന് തന്നെ ഭീഷണിയായതോടെ പലരും പുറത്തിറങ്ങാൻ തന്നെ ഭയക്കുന്നു.
  
ഇതിന്റെ ഒടുവിലത്തെ ഉദാഹരണമാണ് കഴിഞ്ഞ ദിവസം മുള്ളേരിയയിൽ റോഡരികിൽ ബസ് കാത്ത് നിൽക്കുകയായിരുന്ന യുവതിയെ കാട്ടുപന്നി ആക്രമിച്ച് ഗുരുതരമായി പരുക്കേൽപ്പിച്ച സംഭവം. ചെർക്കള ജാൽസൂർ സംസ്ഥാന പാതയിൽ മുള്ളേരിയ ആദൂർ സി എ നഗറിന് സമീപം പാമ്പാട്ടിയിൽ തിങ്കളാഴ്ച ഉച്ചയ്ക്ക് മൂന്ന് മണിയോടെയാണ് സംഭവം നടന്നത്. ആദൂർ ബെള്ളൂറടുക്കയിലെ മാലതിക്ക് നേരെയാണ് ആക്രമണം ഉണ്ടായത്.

കാട്ടുപന്നി മാലതിയെ ഇടിച്ചുവീഴ്ത്തുകയായിരുന്നു. ഇടിയുടെ ആഘാതത്തിൽ ഉയർന്നു പൊങ്ങി റോഡിലേക്ക് തെറിച്ചുവീണു. റോഡിൽ കമിഴ്ന്ന് വീണ മാലതിയുടെ പല്ലുകൾ പൂർണമായും തകർന്നു. മുൻ നിരയിലെ മുകൾ ഭാഗത്തെ നാല് പല്ലുകൾ സംഭവ സ്ഥലത്ത് തന്നെ ചിതറി വീണു. താഴെ ഭാഗത്തെ നാലെണ്ണം ഇളകിയാടുന്നുണ്ട്. ഇതേ സമയം അഡൂർ ഭാഗത്ത് നിന്ന് വരികയായിരുന്ന മുസ്ത്വഫ ഹാജി, വിശ്വനാഥൻ എന്നിവർ ചേർന്നാണ് മാലതിയെ മുള്ളേരിയ ആശുപത്രിയിലെത്തിച്ചത്.

കാറഡുക്ക ബ്ലോക് പഞ്ചായത് പ്രസിഡന്റ് സിജിമാത്യു, കാറഡുക്ക പഞ്ചായത് പ്രസിഡന്റ് കെ ഗോപാലകൃഷ്ണ, പഞ്ചായത് സ്ഥിരം സമിതി ചെയർമാൻ കെ നാസർ, പൊതുപ്രവർത്തകനായ എ പി കുശലൻ, വാരിജാക്ഷൻ എന്നിവർ സന്ദർശിച്ചു. കാസർകോട് റേൻജ് ഫോറസ്ററ് ഓഫീസർ വിനോദ് കുമാർ, സ്പെഷ്യൽ ഡ്യൂടി എസ്എഫ്ഒ ബാബു, കാറഡുക്ക സ്റ്റാഫ് അജിൻ എന്നിവരും ആശുപത്രിയിലെത്തിയിരുന്നു.