‘ശ്വാസകോശ ഉപകരണങ്ങളുമായി എങ്ങനെ വിദേശത്ത് ജോലി ചെയ്യും?'; മുൻ ഡിജിപി ടോമിൻ ജെ തച്ചങ്കരിക്ക് ഹൈകോടതിയുടെ രൂക്ഷവിമർശനം

കൊച്ചി: (KasargodVartha) വിദേശത്ത് ജോലി ചെയ്യുന്നതിനായി ജാമ്യ വ്യവസ്ഥയിൽ ഇളവ് തേടിയ മുൻ ഡിജിപി ടോമിൻ ജെ തച്ചങ്കരിക്ക് ഹൈകോടതിയുടെ രൂക്ഷ വിമർശനം. അനധികൃത സ്വത്ത് സമ്പാദന കേസിൽ ശിക്ഷിക്കപ്പെട്ട് നിലവിൽ ജാമ്യത്തിലാണ് തച്ചങ്കരി. ഇതിനിടെയാണ് വിദേശത്ത് പോകാൻ അനുമതി തേടി അദ്ദേഹം കോടതിയെ സമീപിച്ചത്. കേസിൽ ജയിലിലായെങ്കിലും കടുത്ത ആരോഗ്യപ്രശ്നങ്ങൾ ചൂണ്ടിക്കാട്ടി ആശുപത്രി സെല്ലിലായിരുന്നു തച്ചങ്കരി കഴിഞ്ഞിരുന്നത്.

അസുഖമുള്ളയാൾക്ക് വിദേശത്ത് എന്ത് ജോലി?

തച്ചങ്കരിക്ക് എന്തൊക്കെയാണ് ആരോഗ്യപ്രശ്നങ്ങൾ എന്ന കോടതിയുടെ ചോദ്യത്തിന് ശ്വാസംമുട്ട് അടക്കമുള്ള കടുത്ത ആരോഗ്യ പ്രശ്നങ്ങളുണ്ടെന്ന് തച്ചങ്കരിയുടെ അഭിഭാഷകൻ മറുപടി നൽകി. വിദേശത്തേക്ക് പോകുമ്പോൾ ശ്വസന സഹായത്തിനാവശ്യമായ ഉപകരണം കൂടി കൊണ്ടുപോകേണ്ടതുണ്ടെന്നും അഭിഭാഷകൻ അറിയിച്ചു. ഇതോടെ ശ്വാസം മുട്ടുള്ളയാൾ വിദേശത്ത് പോയിട്ട് എന്ത് ചെയ്യാനാണെന്നും, ഇത്തരം ആരോഗ്യപ്രശ്നങ്ങൾ നേരിടുന്നയാൾ എങ്ങനെ ജോലിക്കായി വിദേശത്തേക്ക് പോകുമെന്നും കോടതി ചോദിച്ചു.

ഒരു സാധാരണ പൗരൻ ഉന്നയിക്കുന്ന സംശയവും ചോദ്യവുമാണ് കോടതി ഇപ്പോൾ ഉന്നയിക്കുന്നതെന്ന് ജസ്റ്റിസ് എ ബദറുദ്ദീൻ വ്യക്തമാക്കി. ഇതിന് പിന്നാലെ, ജാമ്യവ്യവസ്ഥയിൽ ഇളവ് വേണമെന്ന അപേക്ഷ പിൻവലിക്കാൻ തച്ചങ്കരിയുടെ അഭിഭാഷകൻ കോടതിയുടെ അനുമതി തേടി. എന്നാൽ ഹർജി പിൻവലിച്ചാലും ഇക്കാര്യത്തിൽ വെറുതേ വിടില്ലെന്ന് കോടതി മുന്നറിയിപ്പ് നൽകി. എന്താണ് തച്ചങ്കരിയുടെ യഥാർഥ രോഗമെന്ന് സ്ഥിരീകരിക്കാൻ മെഡിക്കൽ ബോർഡ് മുഖേന പരിശോധനയ്ക്ക് ഉത്തരവിടുമെന്നും കോടതി വ്യക്തമാക്കി.

ഗൂഢാലോചനയുണ്ടോ എന്ന് കോടതി

'ഏതെങ്കിലും യഥാർഥ രോഗത്തിൻ്റെ പേരിലാണോ തച്ചങ്കരിയെ ജയിൽ ആശുപത്രിയിൽ പ്രവേശിപ്പിച്ചത്? അതോ മറ്റെന്തെങ്കിലും ഗൂഢാലോചനയുണ്ടോ? അവിടെയുള്ള ഡോക്ടർക്ക് ഇതിൽ പങ്കുണ്ടോ? ജയിൽ സൂപ്രണ്ടോ പോലീസിലെ മറ്റാരെങ്കിലുമോ ഇതിൽ ഉൾപ്പെട്ടിട്ടുണ്ടോ? ഇതെല്ലാം അന്വേഷിക്കേണ്ട കാര്യങ്ങളാണ്'- എന്ന് കോടതി പറഞ്ഞു.

തച്ചങ്കരി ജയിൽമുറി കണ്ടിട്ടുള്ളത് അദ്ദേഹം ഡിജിപി ആയിരുന്നപ്പോൾ മാത്രമാണെന്നും, ശിക്ഷിക്കപ്പെട്ട ശേഷം അദ്ദേഹം ജയിൽ കണ്ടിട്ടില്ലെന്നും കോടതി പരിഹസിച്ചു. ഈ വിമർശനങ്ങൾക്ക് പിന്നാലെ, ജാമ്യാപേക്ഷയിൽ ഇളവ് തേടിയുള്ള തച്ചങ്കരിയുടെ ഉപഹർജി ഹൈകോടതി വിധി പറയാനായി മാറ്റി.

കൂടുതല്‍ വാർത്തകളും വിശേഷങ്ങളും അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് കമൻ്റായി രേഖപ്പെടുത്തുക. 

Article Summary: High Court strongly criticizes former DGP Tomin J Thachankary's plea to travel abroad for work while on bail in DA case.

#TominJThachankary #KeralaHighCourt #DisproportionateAssetsCase #KeralaPolice #KochiNews #MalayalamLegalNews #JusticeABadharudeen #RenuNews