Controversy | ‘കർഷകനെതിരായ നടപടി അനീതി; പുലി ചത്തത് വനം വകുപ്പിന്റെ അലംഭാവം കാരണം’

ദേലംപാടി: (KasargodVartha) മല്ലംപാറയിൽ കമ്പിയിൽ കുടുങ്ങി ചത്ത പുലി സംഭവത്തിൽ കർഷകനെതിരെ കേസെടുക്കാനുള്ള നീക്കം അനീതിയാണെന്ന് അഖിലേന്ത്യ കിസാൻ സഭ ആരോപിച്ചു. കാസർകോട് ജില്ലാ കമ്മിറ്റിയുടെ യോഗത്തിൽ ഈ വിഷയം ചർച്ച ചെയ്ത് കർഷകനെ പിന്തുണയ്ക്കാൻ തീരുമാനിച്ചു.

വന്യജീവികളിൽ നിന്ന് കൃഷിയെ സംരക്ഷിക്കാൻ കർഷകർ കമ്പിവേലി നിർമ്മിക്കുന്നത് പതിവാണ്. ഈ സംഭവത്തിൽ കാട്ടുപന്നിക്ക് കെണിവച്ചതായി പറയുന്നുണ്ടെങ്കിലും, അത് കർഷകനല്ല മറ്റാരെങ്കിലുമായിരിക്കാം കെണി വച്ചതെന്നാണ് യാഥാർത്ഥ്യം. പുലി കുടുങ്ങിയ വിവരം അറിയിച്ചിട്ടും മണിക്കൂറുകൾക്ക് ശേഷമാണ് വനം വകുപ്പ് ഉദ്യോഗസ്ഥർ എത്തിയത്. അപ്പോഴേക്കും പുലി ചത്തതിനാൽ, വനം വകുപ്പിന്റെ അലംഭാവമാണ് ഇതിന് കാരണം.

നിരപരാധിയായ കർഷകനെ കേസിൽ കുടുക്കാൻ വനം വകുപ്പ് ശ്രമിക്കുന്നത് അംഗീകരിക്കാൻ കഴിയില്ലെന്ന് കിസാൻ സഭ വ്യക്തമാക്കി.

ജില്ലാ പ്രസിഡന്റ് എം അസിനാർ അധ്യക്ഷത വഹിച്ച യോഗത്തിൽ സംസ്ഥാന വൈസ് പ്രസിഡന്റ് ബങ്കളം കുഞ്ഞികൃഷ്ണൻ സംസ്ഥാന കമ്മിറ്റി തീരുമാനങ്ങൾ വിശദീകരിച്ചു. കെ പി സഹദേവൻ, കെ കുഞ്ഞിരാമൻ, എം വി കുഞ്ഞമ്പു, പി പി പി.ശ്രീധരൻ മണിയാട്ട് എന്നിവർ സംസാരിച്ചു.