ഒരു അറിയിപ്പ് ഉണ്ടാകുന്നത് വരെ തളങ്കര മാലിക് ദിനാര്‍ ജുമാ മസ്ജിദും ചുറ്റുവട്ടത്തുള്ള ജമാഅത്ത് പള്ളികളും പ്രാര്‍ത്ഥനയ്ക്കായി തുറന്ന് കൊടുക്കേണ്ടെന്ന് തീരുമാനം

കാസര്‍കോട്:  (www.kasargodvartha.com 07.06.2020) തളങ്കര മാലിക് ദിനാര്‍ ജുമാ മസ്ജിദും അഫിലിയേറ്റഡ് ആയിട്ടുള്ള പരിസരത്തെ ജമാഅത്ത് പള്ളികളും ഇനി ഒരു അറിയിപ്പ് ഉണ്ടാകുന്നത് വരെ പ്രാര്‍ത്ഥനയ്ക്കായി തുറന്ന് കൊടുക്കേണ്ടെന്ന് തീരുമാനം. ഖാസി ഫ്രൊഫസര്‍ ആലിക്കുട്ടി മുസ്ല്യാരുമായുള്ള ചർച്ചയ്ക്ക് ശേഷം അദ്ദേഹത്തിന്റെ നിര്‍ദ്ദേശപ്രകാരമാണ് ഈ തീരുമാനമെടുത്തതെന്ന് മാലിക് ദിനാര്‍ വലിയ ജുമാ മസ്ജിദ് പ്രസിഡന്റ് യഹ് യ തളങ്കര, ജനറൽ സിക്രട്ടറി എ അബ്ദുർ റഹ്മാൻ എന്നിവർ അറിയിച്ചു.

കോവിഡ് രോഗവുമായി ബന്ധപ്പെട്ട നാടിന്റെ അവസ്ഥയും രോഗവ്യാപന സാധ്യതയും കണക്കിലെടുത്താണ് ഈ തീരുമാനത്തിലെത്തിയതെന്ന് യഹ് യ തളങ്കര  കാസർകോട് വാർത്തയോട് പറഞ്ഞു. പുറമെ നിന്നുള്ളവരടക്കം ധാരാളം പേര്‍ എത്തുന്ന പ്രശസ്തമായ മഖ്ബറയുള്ള പള്ളിയാണ് മാലിക് ദിനാര്‍ ജുമാ മസ്ജിദ്. അതുകൊണ്ട് തന്നെ പെട്ടന്ന് പ്രാര്‍ത്ഥനയ്ക്കായി തുറന്ന് കൊടുത്താല്‍ എന്തെങ്കിലും സാഹചര്യത്തില്‍ രോഗ വ്യാപനം ഉണ്ടായാല്‍ അത് തെറ്റായ പ്രചരണങ്ങള്‍ക്കിടയാക്കുമെന്നും അദ്ദേഹം പറഞ്ഞു..