മാറില്‍ സൂചി കയറി യുവതി ആശുപത്രിയിലെത്തി, ഡോക്ടര്‍ പരിശോധിക്കവേ തേള്‍ പുറത്തു ചാടി

കാസര്‍കോട്: (www.kasargodvartha.com 19.04.2014) സാല്‍വാറിനു ബട്ടണ്‍ വെക്കുന്നതിനിടെ സൂചി മാറില്‍ തറഞ്ഞുകയറി അസഹ്യമായ വേദന അനുഭവപ്പെട്ട് ആശുപത്രിയിലെത്തിയ ഭര്‍തൃമതിയുടെ ദേഹത്തുനിന്ന് കണ്ടെടുത്തത് കൂറ്റന്‍ തേള്‍! എരിഞ്ഞിപ്പുഴയിലെ 27കാരിയുടെ വസ്ത്രത്തിനുള്ളില്‍ നിന്നാണ് ഡോക്ടര്‍ പരിശോധിക്കുന്നതിനിടെ കൂറ്റന്‍ കരിന്തേള്‍ പുറത്തേക്കു ചാടിയത്.

വെള്ളിയാഴ്ച സന്ധ്യയ്ക്കു വീട്ടിലിരുന്ന് ധരിച്ചിരുന്ന സാല്‍വാറിന്റെ പൊട്ടിപ്പോയ ബട്ടണ്‍ വെക്കുന്നതിനിടെ മാറില്‍ സൂചി തറഞ്ഞു കയറി എന്നാണ് യുവതി പറഞ്ഞത്. തുടര്‍ന്ന് അസഹ്യമായ വേദനയും അനുഭവപ്പെട്ടു തുടങ്ങി. സംഭവം ഭര്‍ത്താവിനെ യുവതി അറിയിക്കുകയും രാത്രി തന്നെ ജനറല്‍ ആശുപത്രിയിലെത്തുകയും ചെയ്തു.

വനിതാഡോക്ടര്‍ പരിശോധിക്കുന്നതിനിടെയാണ് വാല്‍ പൊക്കിപ്പിടിച്ച് വസ്ത്രത്തിനുള്ളില്‍ നിന്നു കരിന്തേള്‍ പുറത്തേക്കു ചാടിയത്. കരിന്തേളിനെ കണ്ടതോടെ പ്രതി തേളായി. തേളിനെ ഉടന്‍ ആശുപത്രി ജീവനക്കാര്‍ തല്ലിക്കൊല്ലുകയും യുവതിക്ക് തേളു കടിക്കുള്ള ചികിത്സ ആരംഭിക്കുകയും ചെയ്തു.