Recognition | 19-ാം വയസിൽ വിമാനം പറത്തി അഭിമാനമായി മാറിയ മലപ്പുറത്തെ മറിയം ജുമാനയ്ക്ക് 10 കൊല്ലം മുമ്പ് പഠിച്ച കാഞ്ഞങ്ങാട്ടെ സ്‌കൂളിൽ ഹൃദ്യമായ അനുമോദനം

കാഞ്ഞങ്ങാട്: (KasargodVartha) പത്തൊൻപതാം വയസിൽ വിമാനം പറത്തി മലപ്പുറത്തിന്റെ മണ്ണിൽ നിന്നും ആകാശത്തിലേക്ക് ചിറകുവിരിച്ച് പറന്നുയർന്ന മറിയം ജുമാനയ്ക്ക് തന്റെ പഴയ വിദ്യാലയത്തിൽ  സ്നേഹോഷ്മളമായ സ്വീകരണം. സ്റ്റുഡന്റ് പൈലറ്റ് ലൈസൻസ് നേടി നാടിന്റെ അഭിമാനമായി മാറിയ ജുമാന, തന്റെ ബാല്യകാല സ്മരണകൾ ഉറങ്ങുന്ന കാഞ്ഞങ്ങാട് കടപ്പുറം പിപിടിഎസ് സ്കൂളിലാണ് അനുമോദനം ഏറ്റുവാങ്ങാനെത്തിയത്.

ഒരു ദശാബ്ദം മുൻപ്, മൂന്നാം ക്ലാസിലും നാലാം ക്ലാസിലും ഇവിടെ പഠിച്ചിരുന്ന ജുമാനയെ, അന്നത്തെ അധ്യാപിക ബിന്ദു ടീച്ചർ ഷാൾ അണിയിച്ച് സ്വീകരിച്ചു. സ്കൂൾ മാനേജ്മെൻറ് കമ്മിറ്റിയുടെയും, വിവിധ സാംസ്കാരിക-രാഷ്ട്രീയ സംഘടനകളുടെയും പ്രതിനിധികൾ ചടങ്ങിൽ പങ്കെടുത്തു. ജുമാനയുടെ പിതാവ് ഉമർ ഫൈസി ഖത്തീബായി കാഞ്ഞങ്ങാട് ജോലി ചെയ്തിരുന്ന കാലത്താണ് മറിയം ഇവിടെയെത്തി രണ്ട് വർഷം പഠിച്ചത്. ആ ദിവസങ്ങൾ ഇന്നും ജുമാനയുടെ ഓർമ്മകളിൽ പച്ചയായി നിൽക്കുന്നു.

ജുമാനയുടെ മാതാപിതാക്കളായ അബ്ദുൽ ഉമർ ഫൈസിയും ഉമൈബാനുവും മകളുടെ ഈ സന്തോഷ നിമിഷത്തിൽ പങ്കുചേരാൻ എത്തിയിരുന്നു. കുഞ്ഞുകാലത്ത് വിദ്യാരംഭം കുറിച്ച വിദ്യാലയത്തിന്റെ ആദരവ്, മറിയം ജുമാനയുടെ ജീവിതത്തിലെ അവിസ്മരണീയമായ ഒരനുഭവമായി മാറി. ചടങ്ങ് എൻ എ നെല്ലിക്കുന്ന് എം എൽ എ ഉദ്ഘാടനം ചെയ്തു. ഹെഡ്മാസ്റ്റർ പി രാജീവൻ സ്വാഗതം ആശംസിച്ചു. നഗരസഭ ചെയർപേഴ്സൺ കെ.വി. സുജാത അധ്യക്ഷത വഹിച്ച ചടങ്ങിൽ എ.ഇ.ഒ. മിനി ജോസഫ്, നഗരസഭ വൈസ് ചെയർമാൻ ബിൽടെക് അബ്ദുല്ല എന്നിവർ സംസാരിച്ചു. 

നഗരസഭ കൗൺസിലർമാരായ സി.കെ. അഷ്റഫ്, റസിയ ഗഫൂർ, സെവൻസ്റ്റാർ അബ്ദുറഹ്മാൻ, സ്കൂൾ മാനേജർ പി.കെ. സുബൈർ, മാനേജ് കമ്മിറ്റി പ്രസിഡന്റ് ഹസൈനാർ, സെക്രട്ടറി സി.എച്ച്. മുസ്തഫ, ട്രഷറർ എൽ.കെ. ഇബ്രാഹിം, സ്കൂൾ വികസന സമിതി ചെയർമാൻ സി.എച്ച്. അഹമ്മദ് കുഞ്ഞി ഹാജി, മുൻ നഗരസഭ ചെയർമാൻ അഡ്വ. എൻ.എ. ഖാലിദ്, പി.ടി.എ. പ്രസിഡന്റ് നജ്മുദ്ധീൻ സി.എച്ച്., മദർ പി.ടി.എ. പ്രസിഡന്റ് റസീന, സംയുക്ത ജമാഅത്ത് വൈസ് പ്രസിഡന്റ് പി.കെ. അബ്ദുല്ലക്കുഞ്ഞി, നൂറാനിയ മസ്ജിദ് പ്രസിഡന്റ് സി. യൂസുഫ് ഹാജി, എ. ഹമീദ് ഹാജി, സീനിയർ അസിസ്റ്റന്റ് അധ്യാപിക സുജ ടീച്ചർ തുടങ്ങിയവർ 
സന്നിഹിതരായിരുന്നു. അബ്ദുൽ ശരീഫ് മാസ്റ്റർ നന്ദി പറഞ്ഞു.

#MariamJumana #Pilot #Kerala #Aviation #SchoolFelicitation #Inspiration